Xab ngwleyy
28
&Lo rese xaa Israel na mleey wech lu Aarón nu re xgann xaa: Nadab, Abiú, Eleazar nu Itamar. Kwezh lu xaa zee gak xaa xngwleyy na. 2 Dexkwaa ler nzhul gak wech lu Aarón, zee nlu non xaa nu le xaa respet xaa. 3 Guzh lo rese xaa nzho doo yek, xaa kwaan mza na yalnzhak lo, zee dexkwaa xaa xab Aarón, zee gak nzhul xaa nu gak xaa xngwleyy na. 4 Lee xab xaa kwaan dexkwaa gak: kwaan ke laz xab ngwleyy, xab xaa kwaan nzhak mod mandil, ler sul, xab xaa kwaan noll, kwaan nral yek xaa nu xsindor xaa. Dexkwaa lu re ler nzhul ne kwaan gak Aarón wech lu nu re xgann xaa, zee gak xaa xngwleyy na. 5 Re xaa ndexkwaa re ler nzhaal lexchinn xaa or, ler sul, ler naxne nagaas, ler naxne nu ler non doo.6 &Nu lee ler kwaan nak mod mandil dexkwaa xaaya kwaan or, ler sul, ler naxne, ler naxne nagaas nu ler kwaan non doo. 7 Nu kanoya chop lee ler kwaan zhaal naz xuka, nu sbaa tuka zhaala. 8 Nu ler kwaan sii lextoo xab xaa gak tubka kwaan ler kwaan gak mod mandil, zee dexkwaa xaaya kwaan or, ler sul, ler naxne nagaas, ler naxne nu ler kwaan non doo.
9 &Lee chiibchop xgaan Israel nzhaal ke le lo rop ke kwaan le onise; 10 xoop le xaa ke lo tub ke, nu xoop le xaa ke lo stub ke, modxa ngol xaa. 11 Lee xaa kwaan ndexkwaa re kwaan nak or, nzhaal lal kee xaa le xgaan Israel lo rop ke, modxa ndexkwaa xaa sey, nu dub welt ke dexkwaa kwaan or. 12 Nu zob gu rop ke xuk kwaan gak mod mandil, zee selazh xaa re xaa Israel, nu lo xuk xab Aarón wee xaa le re xaa lo na, Xaa Tubka Nak, zee selazh na xaa. 13 Nu kwaan or dexkwaa paro zhaala. 14 Nu dexkwaa gu chop kaden kwaan gak or, kwaan dexkwaa kwenta kwaan nya, zee zen nye kaden paro zhaala.
15 &Sbaaka dexkwaa kwaan ke laz xab ngwleyy, kwaan naab xaa lo na, nu dexkwaaya kwaan nak mod mandil: kwaan gak or, ler sul, ler naxne nagaas, ler naxne nu ler non doo. 16 Nu lal na re taya, nu tub good gak nolla nu leeka stub good gak nanyaga. 17 Nu kee lu tap baal ke kwaan chul nzhak loya, lee baal tub zob ke kwaan le rubi, topasio nu esmeralda. 18 Lee baal rop zob ke kwaan le granate, zafiro nu diamante; 19 lee baal yon zob ke kwaan le jasinto, agata nu amatista; 20 Lee baal dap zob ke kwaan le berilo, onise nu jaspe. Rese ke ne cheep xaa leen kwaan dexkwaa gu kwaan or. 21 Nu nkin gaka chiibchop ke, nel chiibchop le re xgaan Israel, nu kad lo tub ke kee lu le re chiibchop xgaan Israel, modxa dexkwaa xaa sey.
22 &Nu kee lu lo kwaan ke laz xab ngwleyy lak kaden kwaan gak mod kwaan nliib kwaan nak nebse or. 23 Noka dexkwaa chop argoy kwaan nak or kwaan ke laz xab ngwleyy; 24 nu chaal lu rop kaden kwaan nak or lo rop argoy rop skin kwaan ke laz xab ngwleyy; 25 zee chaal lu rop kaden or nu chaal luya naz lo xuk xab xaa kwaan ke cho kwaan gak mod mandil. 26 Noka dexkwaa lu xchop argoy or kwaan zob lu rop skin kwaan ke cho laz xab xaa, kwaan luu naz yat lo xab xaa kwaan gak mod mandil, 27 Sbaaka dexkwaa lu xchop argoy or kwaan zob xaa naz delant lo xuk xab xaa kwaan gak mod mandil, naz yat xeep gax roo leen xab xaa, tich ler kwaan gak mod mandil sii lu tub lee ler kwaan sii lextoo xab xaa. 28 Lee argoy kwaan nzen kwaan nke laz xab ngwleyy, zhaal kwaan argoy kwaan nzob cho mandil kwaan tub doo sul, zee tira nye zena cho laz mandil zee nagabta cho xab xaa. 29 Nu wee Aarón le re xgaan Israel lo kwaan ke laz xaa kwaan naab xaa lo na, gorna zeeb xaa Pa Nambey, zee tubka selazh na xaa, na nak Xaa Tubka Nak. 30 Zob Urim nu Tumima naz leen kwaan ke laz xab xaa, kwaan le zee nen cho kwaan yé na, zee keya laz Aarón gorna zhin xaa lo na, Xaa Tubka Nak, zee tubka wee Aarón kwaan naab xaa lo na kwent cheen re xaa Israel.
31 &Nu dexkwaa lu kwaan nak mod mandil nebse kwaan yil sul. 32 Nu rolta xsawwa naz ya nkin yed yeer paro ded yenn xaa, nu rop xkwaa diba, zee nye gak paro ded yenn xaa, zee narazta. 33 Nu dub welt niiya ke kwaan gak kwenta garnad kwaan dexkwaa lu kwaan ler sul, ler naxne nagaas, nu ler naxne nu ke kampan tik kwaan nak or dub niiya, 34 zee gaka tub kampan nu tub garnad nu stub kampan nu stub garnad kwaan gak or, ke dubse nii ler sul. 35 Nu gak Aarón ler gorna le xaa zhiin leen li na Pa Nambey, zee kwezha gorna zeeb xaa nu gorna roo xaa lo na, Xaa Tubka Nak, zee nayeta xaa.
36 &Noka dexkwaa gu tub lam kwaan gak or nu ke loya: "NAMBEY DOO NAK XAA NE LO XAA TUBKA NAK". 37 Lee lam ne zhaal kwaan yil sul lachuzh xaa, lo kwaan nral yek xaa. 38 Lee lam kwaan tubka ke lachuzh Aarón le zee kayaa xaa jwalt cheen xaa Israel leezha teed xaa ma lo na, zee nzho mod kayaa na xaa, na nak Xaa Tubka Nak.
39 &Nu kwaan ler kwaan non doo tib gu tub lee ler noll. Nu noka diba kwaan ler non doo kwaan nral dub yek xaa, noka dib tub xsindor xaa. 40 Noka dexkwaa lu xab re xgann Aarón ler noll, xsindor xaa nu kwaan kado yek xaa, zee luu non xaa nu le xaa respet xaa.
41 &Snee nzhaal segak lu wech lu Aarón ler, nu re xgann xaa; nu gorna teeb lu nseyt cho xaa, zee gak non xaa nu zee kayaa xaa yanabeyy mod ngwleyy, zee gak xaa xngwleyy na. 42 Noka dexkwaa tub xkalsonsi xaa kwaan ler kwaan non doo kaan xaa, kwaan saaw garlen xaa nu la axta yek xub xaa 43 Nu lee Aarón nu re xgann xaa gaka gorna zeeb xaa leen li na, o gorna bii xaa gax lo mdo zee le xaa zhiin leen Pa Nambey, nu chelee xaa nagakta xaaya telise yet xaa.Kwaane nak tub ley kwaan le Aarón nu re xtii xaa tira.