Mle nambey Ches li Xaa Tubka Nak
40
Zee ngunii Xaa Tubka Nak lo Ches nu nzhé xaa:2 —Mbizh yilotlaka lo mbee yilo, zoli lu li na pa zhaal gu kwaan na. 3 Nu zob lu kaj cheen trat nu kee lu tub lee ler ndok kwaan saaw paro yoya. 4 Nu cheep lu mes nu chul zo luya; nu noka cheep lu bruj, nu kee lu xni yeka. 5 Nu zob lu mdo kwaan nak or, pa zeek xaa yaal lo kaj cheen trat nu kee lu ler ndok kwaan saaw lo kaj cheen trat leen li na pa reep xaa. 6 Zee zob lu mdo pa zeek xaa ma, naz gax paro nzeeb xaa roo lach jwer li na. 7 Nu saaw lu lo mdo nu lo li na zob lu chee cheen nis, nu tezhe lu nis leena. 8 Nu gwluzhtlaka saaw lu dub welt roo lach roo li na, nu kee lu ler ndok roo lach jwer.
9 &Zeera zen lu nseyt kwaan nle nzhul, nu teeb luya cho li na, nu cho rese kwaan nzho leena; nu le nambey lu rese kwaan nzho leena, zee gak nambeya. 10 Nu noka teeb lu nseyt cho mdo pa zeek xaa ma, nu cho rese kwaan nle xchinna, zee gaka tub mdo kwaan nzhul doo. 11 Nu sbaaka teeb lu nseyt cho chee cheen nis nu cho pa kwiba nu zee le nambey luya.
12 &Zeera wee lu Aarón nu re xgann xaa roo li na, nu senag lu xaa kwaan nis. 13 Nu segak lu xaa xab xaa kwaan nambey nu xo lu nseyt cho xaa, zee le nambey lu xaa, zee gak xaa ngwleyy cheen na. 14 Nu zeera le lu zee bii gax re xgann xaa, nu le lu zee gak xaa xab xaa kwaan nambey. 15 Nu noka xo lu nseyt cho re xaa leeka mod mxo lu nseyt cho xuz xaa, nu sbaa gak re xaa ngwleyy cheen na. Nu nseyt kwaan xo lu cho re xaa luu zee gak re xaa xngwleyy na lo re dii cheen xaa tira.
16 Ches mle mod ngunabeyy Xaa Tubka Nak, nu sbaa mle xaa. 17 Mbee yilotlaka lo liin rop, kwaan mroo xaa Egipto, nu mbizh yilotlaka lo mbee, mza xaa li Xaa Tubka Nak. 18 Ches mzoli li Xaa Tubka Nak nu mzo xaa rese xana nu mkee xaa tab choya nu mzoli xaa rese yiso nu mkee xaa re yag cho tab. 19 Nu mchil xaa ler kwaan yaaw yek yoo li Xaa Tubka Nak, nu msaaw xaaya modxa ngunabeyy xaa lo Ches.
20 Zeera mzen xaa kwaan mkee xaa trat cheen Xaa Tubka Nak lo nu mlo xaaya leen kaj cheen trat, nu msaaw xaa rooya, nu mzob xaa bar cheena choya. 21 Zeera mlo xaa kaj cheen trat leen Pa Nambey Doo, nu msaaw xaa tub lee ler ndok rooya pa mlo xaaya modxa ngunabeyy Xaa Tubka Nak lo Ches.
22 Nu zeera mzo xaa mes leen Pa Nambey naz tich ta ya lo ler kwaan nsaaw lo Pa Nambey Doo, 23 nu lo mes mzhib xaa chop baal yat lo Xaa Tubka Nak modxa ngunabeyy xaa lo Ches.
24 Nu zee mzo xaa bruj leen li Xaa Tubka Nak pa zhaal xaa kwaan lee xaa naz delant lo mes naz ta yat, 25 nu mkee xaa xni yek bruj lo Xaa Tubka Nak, modxa nzhé xaa lo Ches.
26 Nu seeka mzo xaa mdo kwaan nak or leen li Xaa Tubka Nak pa zhaal xaa kwaan lee xaa, naz delant lo ler kwaan nyaaw Pa Nambey Doo. 27 Nu mzek xaa yaal kwaan chul doo nzebech loya modxa ngu nabeyy Xaa Tubka Nak lo Ches.
28 Nu seeka mkee xaa ler ndok kwaan nyaaw roo lach jwer roo li Xaa Tubka Nak. 29 Nu mzob xaa mdo pa teed xaa ma roo pa reep xaa roo li Xaa Tubka Nak nu mzek xaa ma lo mdo, nu noka gon cheen nzhobxtil, modxa ngunabeyy xaa lo Ches.
30 Nu mzob xaa chee cheen nis xsaw li Xaa Tubka Nak lo mdo, nu mchezhe xaa nis leena, 31 paro nyanag Ches nu Aarón nu re xgann xaa nu pa nzet xaa nii xaa. 32 Nu gorna nzeeb xaa leen li Xaa Tubka Nak pa zhaal xaa kwaan lee xaa, nu gorna mbii gax xaa lo mdo or, zee yilo nyanag xaa nu nzet xaa nii xaa modxa ngunabeyy xaa lo Ches. 33 Nu seetaka ngulo msaaw xaa dub welt lach cho li Xaa Tubka Nak nu mkee xaa ler ndok roo lach roo li xaa. Snee ngulo mdexkwaa Ches reya.
Ngu Xaa Tubka Nak leen li xaa
34 Zee lee tub xkaw msaaw dubse yek li Xaa Tubka Nak nu sbaa mzeeb xni cheen xaa leen li xaa. 35 Zee nyent mod zeeb Ches leen pa zhaal xaa kwaan Xaa Tubka Nak, nel tich li xaa nzo xkaw nu naz leena nzo xni cheen xaa. 36 Nu gorna lee xkaw nzoli tich li Xaa Tubka Nak lee re xaa Israel nroo leen yo pa nzho xaa nu nze xaa. 37 Per chelee xkaw nayast nyent mod ze re xaa, nu mbaz re xaa axta mbizh kwaan yas xkaw. 38 Kwaanzee zhe nzoli xkaw cheen Xaa Tubka Nak yek yoo pa nzhaal xaa, nu lee yaal nzoli bal yek yoo, nu sbaa mluya lo re xaa rese liin kwaan mze xaa naz wen.