Gon kwaan yaa li Xaa Tubka Nak
25
Xaa Tubka Nak ngunii lo Ches nu nzhé xaa:2 —Guzh lo re xaa Israel zee kad tub xaa zaa tub gon lo na. Nzhaal toop xaaya lo re xaa nzhekla zaaya kwaan dub lextoo xaa. 3 Kwaane nak gon kwaan nzhaal toop gu lo re xaa: or, plat, nu brons, 4 nu ler sul, ler naxne nagaas, ler naxne, ler kwaan non doo, nu kwaan nak ler yich led chib, 5 nu noka yed cheen mbakxiil kwaan mgoo naxne, stub yed ma kwaan chul doo nzhak, nu yag meskit, 6 nseyt kwaan zeek bruj, nu kwaan chul doo nzebech zhaal kwaan nseyt kwaan nle nzhul xaa, nu yaal kwaan chul doo nzebech, 7 nu ke kwaan le onise, nu re ke chul kwaan nke lo kwaan nzhak mod mandil cheen ngwleyy, nu kwaan nke laz xab xaa. 8 Nu dexkwaa gu tub pa nzhul doo yoo na lo rese gu. 9 Lee li na nu rese kwaan, nzhaal zaa guya modxa lu naya lo gu.
Kaj cheen trat
10 &Noka dexkwaa gu tub kaj cheen trat kwaan yag meskit, nu le noll guya chop zhit yirol, nu le nanyag guya tub zhit yirol, nu zeeba tub zhit yirol. 11 Nu teeb gu or naz ticha nu naz leena, nu leeka kwaan or kee gu dibuj choya. 12 Nu zob gu tap argoy kwaan nak or choya, nu zoba dapse skina, chop argoy tub ta nu xchopa stub ta. 13 Noka dexkwaa gu lak bar cheen yag meskit nu teeb gu or choya. 14 Zee cheep gu bar leen argoy kwaan nke xkwes kaj cheen trat, zee nzho mod wee gu kaj. 15 Lee bar lake cho argoy cheen kaj; nu nakiibtra guya. 16 Ko gu trat kwaan za na leen kaj.
17 &Nu neb or dexkwaa gu tub kwaan yaaw roo kaj, chop zhit yirol nolla, nu tub zhit yirol gak nanyaga. 18 Nu dexkwaa gu chop mandad kwaan le kerubin, nebse or, nu dexkwaa guya kwaan marti, nu bzob guya rop skin tap cheen kaj. 19 Lee kwaan yaaw rooya nu kerubin roo leeka loya, nu tub kerubin zob tub ta nu stub kerubin zob stub ta. 20 Lee kwaan nyun kwenta mandad cheen Xaa Tubka Nak, nu kwaan rop xiila saawa tich kaj, nu zhaal lo ropse, nu wiiya tich kaj. 21 Yilo yo trat kwaan za na lo lu leena, zeera saaw lu rooya. 22 Lo rop kerubin zo na zee zhaal lu na, zee nii na cho kwaan nzhaal le xaa Israel nu cho kwaan nanzhaalt le xaa.
Mes cheen yat
23 &Noka dexkwaa gu mes kwaan gak yag meskit, nu gak nolla chop zhit yaa xaa, nu gak nanyaga tub zhit yaa xaa, nu zeeba tub zhit yirol. 24 Nu teeb gu or naz choya, nu noka kee gu dibuj kwaan or dub choya. 25 Nu laa gu dapse xkwes mes tub lozhya xaa, noka kee gu dibuj kwaan or choya. 26 Nu dexkwaa gu tap argoy nu zob guya dapse skin mes paro zob kad tub nii mes. 27 Snee lee re argoy zob yat paro ngeed dap xkwes mes, nu lee leen argoy ded bar zee nzho mod wee xaa mes. 28 Lee re bar kwaan wee xaa mes dexkwaa gu kwaan yag meskit nu teeb gu or choya. 29 Noka re kwaan kin xaa lo mes dexkwaa gu kwaan or: yann, kucher, kantaplor, nu kop kwaan yo gon kwaan nak nis ub. 30 Nu tubka zhiib gu yat kwaan nambey lo mes lo na.
Bruj kwaan nak or
31 &Noka dexkwaa gu tub bruj kwaan gak neb or, nu dexkwaa guya kwaan marti nu kanoya: xana, niiya, xkopa, choya pa nak mod xan yeey, nu kwaan nak mod yeey roo choya. 32 Nu tub xoop yaaya kanoya choya: chona tub ta nu chona stub ta. 33 Nu tub lad yaaya kanoya chon kop kwaan gak mod yeey cheen almendro kwaan dub xana, nu sbaaka stub yaaya kanoya xchon kop kwaan nak mod yeey cheen almendro kwaan dub xana, nu sbaa lee bruj kano xoop yaa. 34 Nu lee nii bruj kano tap kop kwaan gak mod yeey cheen yag almendro kwaan dub xana. 35 Nu noka zob tub kwaan gak mod xan yeey xan paro roo chop yaaya kwaan yilo, nu stuba zob xan xchopa, nu seeka zob stub kwaan gak mod xan yeey xan xchop kwaan gwluzh. 36 Yeey kwaan roo choya gak tuka kwaan dub xana. Dexkwaaya kwaan neb or nu dexkwaa guya kwaan marti. 37 Nu dexkwaa gu tub gazh kwaan zaa xni nu zob guya yeka zee zaaya xni naz delant. 38 Noka kwaan neb or dexkwaa gu kwaan suuya kwaan nzob chop ley, nu yann kwaan yo kwaan nguk. 39 Ble xchinn gu galbchiibchon kil or dexkwaa gu bruj nu re kwaan le xchinna. 40 Wen, wen bleya nu dexkwaa reya modxa mlu naya lo lu yek yi.