Éxodo 24

Ches nu re xaa gol ngwa yek yi

Lee Xaa Tubka Nak nzhé lo Ches:

—Guxoob paro nzo na, kwaan Aarón, Nadab, Abiú nu chon gal nzho chii xaa gol, xaa nak lo xaa Israel. Nu zit zo gu kichxub gu axta la lachuzh gu lo yo. 2 Nebse Ches nzho mod bii lo na, Xaa Tubka Nak, per lee re xaa nagarlot bii gax, nixa nayixoobt re xaa yezh kwaan lu.

3 Zee ngwa Ches nu nzhé xaa lo re xaa yezh re wdizh kwaan nzhé ley kwaan mzaa Xaa Tubka Nak lo xaa, zee lee rese xaa yezh mkeb nu nzhé xaa:

—Le nu rese kwaa nzhé ley kwaan né xaa lo lu.

4 Nu lee Ches mkee rese wdizh cheen Xaa Tubka Nak, nu garziil doo nguxche xaa, mdexkwaa xaa tub mdo xan yi, nu mzoli xaa chiibchop ke kwaan nii chiibchop xtii Israel. 5 Nu ngunabeyy xaa lak xaa mad, xaa nak xaa Israel, zee gut xaa lak ngoon yeen nu teed xaa ma lo Xaa Tubka Nak, zee kwi wen xaa kwaan lee xaa. 6 Nu mzen Ches rol ren nu mla xaaya leen lak xig, nu le zrola mchuun xaa lo mdo. 7 Nu mzen xaa yech cheen trat nu mlab xaaya lo re xaa yezh nu nzhé re xaa Israel:

—Le be rese kwaan né Xaa Tubka Nak, nu gon be xtizh xaa.

8 Zee mzen Ches ren nu mchuun xaaya lo re xaa yezh nu nzhé xaa:

—Lee ren ne nak nseyn cheen trat kwaan mle Xaa Tubka Nak kwaan gu lo rese kwaane.

9 Nu nguxoob Ches nu Aarón, Nadab, Abiú nu chon gal nzho chii xaa gol, xaa nak xaa Israel. 10 Baa mwii xaa lo Dios cheen xaa Israel, nu nzo xaa lo tub lach kwaan nak ke safiro, kwaan nla xni mod yiba. 11 Nu nyent cho kwaan mle Dios rese xaa gol; zee mwii xaa lo Dios, ndaw xaa nu ngu xaa.

Ches ngwa yek yi Sinaí

12 Lee Xaa Tubka Nak nzhé lo Ches:

—Guxoob yek yi paro nzo na, nu blaz baa, nel baa za na lak ke lo lu, kwaan mkee na ley lo, kwaan seed lu re xaa Israel.

13 Ches nu Josué, xaa nke zhiin lo xaa, nguxoob yek yi cheen Dios. 14 Nu nzhé xaa lo re xaa gol:

—Nee kwaz gu nu axta gorna bare nu; nu lake Aarón nu Hur kwaan gu, chelee tub xaa nkano tub kwent, zee wee xaaya lo xaa.

15 Zee lee Ches nguxoob yek yi, nu lee tub xkaw msaaw yi. 16 Lee xni cheen Xaa Tubka Nak nzo yek yi Sinaí nu lee xkaw msaaw dubse yek yi tub xoop mbizh, nu lee mbizh gazh mrezh xaa Ches leen xkaw. 17 Nu lee xni cheen Xaa Tubka Nak, mlu lo re xaa Israel yek yi kwaan yara nzeb, nu nluya kwenta bal nakap kwaan nanyuyyt. 18 Ches nguxoob yek yi nu mreep leen xkaw, nu baa mzo xaa dubse tub choo mbizh nu dubse tub choo yaal.