Ley cheen re kwaan nali
23
&Nayét gu re kwaan nawlit kwaan namlet stub xaa. Nazhaalt gu kwaan re xaa nakap nu nixa chelee xaa ne xaa ya gu tub testig kwaan nawlit nak.2 &Nazhaalt gu kwaan rese xaa nzhekla le kwaan nawent, nixa zyen doo nak xaa. Nachixyekt gu diizh mod nchixyek re xaa diizh nu nixa nalet gu zee naab xaa kwent nanalit lo stub xaa. 3 Naroot gu xjabor xaa nales nzhak chelee xaa naab xaa kwent lo xaa nu nkade xaa.
4 &Chelee gu nguzhal gu xkoon o xngwes tub xaa nayii ne gu, zee zere gu ma lo xaa. 5 Ble gu yud xaa nayii ne gu, chelee gu ne gu lee xngwes xaa mla lo yo zee ble gu yud la xaa kwaan tich ma.
6 &Chelee tub xaa nales nzhak gorna naab xaa kwent lo xaa, roo gu xjabor xaa tub mod nali.
7 &Nakadet gu zee nanaabt xaa kwent tub mod nanalit lo xaa nali nak, xaa namlet nik tub kwaan, nel telise naselat na xaa mleya.
8 &Nakayaat gu demi lo xaa, zee nawiit gu kwaan mle xaa, nel sbaa nak demi zee nanalit naab gu kwent.
9 &Nachaldilt gu xaa zit nel xaa zit ngok gu gorna ngu gu yizhyo Egipto, nu ne gu xomod nyu xaa lazh ben.
Myet nu yizhyo kwaz deskans
10 &Dubse tub xoop liin gaan gu xkizhyo gu nu toop gu yalgon, 11 per lee liin gazh lakeya deskans; zee lee re xaa nales nzhak, xaa lazh gu, nzho mod gaw kwaan lake nu noka lee kwaan lake gaw re ma wen. Sbaaka le gu lo yag ub nu yag olib cheen gu. 12 Dubse tub xoop mbizh ke gu zhiin paro nzhekla gu, lee mbizh gazh le gu deskans, nu noka xkoon gu nu xngwes gu nu re xaa zit xaa nke zhiin lo gu. 13 Le guya nu kozhaw gu re kwaan ni na, nu nixa nazeta gu le stub dios.
Ley cheen yalni
14 &Chon welt le gu yalni lo na tub liin. 15 Le gu yalni cheen yat kwaan nanyut lebadur leen, modxa nii na nu gaw gu yat kwaan nanyut lebadur leen dubse tub gazh mbizh, mbee kwaan nak Abib, nel mbee ne mroo gu yizhyo Egipto. Nu nyent cho nzho mod zhin lo na, cheleeya nik tub kwaan nayiidnot xaa. 16 Noka le gu yalni cheen re kwaan nzaa yilotlaka kwaan nxeen gu wen, nu noka le gu yalni cheen re yalgon gorna yilo toop guya yek liin. 17 Rese xaabyi nkin ya lo Xaa Tubka Nak chon welt tub liin.
18 &Gorna teed gu ma lo na, nachaalt gu xren ma tubka kwaan yat kwaan nyu lebadur leen; nu nixa nakozhawt gu xze ma stub mbizh.
19 &Nkin wee gu xle yilotlaka kwaan zaa xkizhyo gu, garli Xtios gu, Xaa Tubka Nak. Nu nankint seyeyy gu mit leen xizh xnaa ma.
Xmandad Xaa Tubka Nak
20 &Wii, lee na xaal mandad zee kanap xaa gu naz, nu wee xaa gu paro mleyy na za na lo gu. 21 Nabachit gu lo xaa, bin gu xtizh xaa; nu nixa nagakt ned gu, napa nalet xaa perdon re xjwalt gu, nu nzo xaa kwaan yalnabeyy cheen na. 22 Per cheleeya wlipa gon gu xtizh xaa, nu le gu rese kwaan la na le gu, zee na yii ne re xaa nayii ne gu, nu na le nales re xaa nle nales gu. 23 Lee xmandad na ya delant lo gu, nu wee xaa gu yizhyo cheen xaa Amorreo, xaa Het, xaa Ferezeo, xaa Canaán, xaa Heveo nu xaa Jebús, xaa luux na. 24 Nareket gu tich re xaa zee, nu nixa nakichxubt gu lo xtios xaa nu nixa nagoolt gu loya, snee tira luux guya nu bdiich ble gu maj 25 Nzhaal gool gu lo na, Xaa Tubka Nak, Xaa nak Xtios gu, nu le na zee yo zyen doo kwaan gaw gu nu kwaan go gu. Nu na le zee nazhint nik tub yalyizh lo gu, 26 nixa nayot ngwnaa me ded xinn, nu nixa me nit. Nu le na zee ban gu zyen doo liin.
27 &Na le zee lee xaa nayii ne gu kano yalnacheb nu xoon xaa lo gu, nexa pa yizhyo nzha gu, nu le na zee bachi xaa nayii ne gu. 28 Na xaal ngzoy yaner lo gu, zee zheb re xaa Heveo, xaa Canaán nu xaa Het, zee xonn xaa lo gu. 29 Nakot na xaa lo gu dub tub liin, zee nagakt xkizhyo xaa wen nu nagakt zyenra re ma nakap, 30 mas wen cheepga cheepga, ko na xaa lo gu, axta gorna gak zyen doo xinn gu, zee zen gu yizhyo ba. 31 Nu xkizhyo gu gak: Nistoo Naxne axta nistoo cheen re xaa Filistia, nu yizhyo bizh axta Yuu Éufrates, nel na za re xaa yizhyo ba zee koo gu xaa. 32 Nixa nayaant gu kwaan re xaa, nixa kwaan xtios xaa. 33 Nixa nalaat gu yo xaa xkizhyo gu, napa le gu zee le gu jwalt lo na, nu wii gu lo xtios xaa nu komba le zee lux gu.