Li Dios
26
&Dexkwaa gu yoo li na, kwaan tub chii lee ler ndok kwaan non doo, ler sul, ler naxne nagaas, nu ler naxne; nu kee gu kwaan nyun kwenta mandad choya kwaan le kerubin. Kwaane dexkwaa xaa nzhak dexkwaaya. 2 Nu kad tub lee ler nolla tub galbxon zhit yaa xaa, nu nanyaga tub tap zhit yaa xaa, nu rese ler lal ne. 3 Tuka chaal gu tub gaay lee ler ndok, nu sbaaka chaal gu stub gaay lee ler. 4 Nu zob nzhaya kwaan na sul dubse xkwes gaay lee ler yilo, nu sbaaka zob xaa nzhaya dub xkwes zgaay lee ler rop. 5 Lo gaay lee ler yilo zob choobchii nzhaya nu lo stub gaay lee ler gwluzh zob xchoobchii nzhaya nu lal zoba lo tuba nu lo stuba. 6 Nu dexkwaa gu tub choobchii ngench kwaan or, kwaan zen xkwes rop lee ler, zee gaka tub leeka ler nu sbaa gak li na tuka.7 &Nu dexkwaa gu tub chiibtub ler ndok kwaan yich led chib zee yaawa yek yoo ler li Xaa Tubka Nak; 8 nu kad tub lee ler nolla tub galbchii zhit yaa xaa, nu nanyaga tub tap zhit yaa xaa, lal na reya. 9 Chaal gu gaay leeya yilotlaka nu zeera chaal gu stub xoop leeya, nu lee ler kwaan xoop zee ke rop xkwaa naz ta roo yoo li xaa. 10 Nu zob lu choobchii nzhaya dubse xkwesa, nu sbaaka zob xchoobchii nzhaya xkwes stub lee ler zee zhaal ropa. 11 Nu noka dexkwaa gu choobchii ngench kwaan gak brons, kwaan ded leen nzhaya, zee zhaala nu gaka tuka lee ler. 12 Nu lee ler kwaan lake naz tich li xaa, yeeta naz lo yo. 13 Lee ler ne yaaw dub li Xaa Tubka Nak, nu ropse ta xkwesa la lo yo, zee tira saawa.
14 &Nu noka saaw gu cho yoo kwaan yed cheen mbakxiil kwaan mgoo naxne, nu tich yed ne saaw stub yed kwaan chul doo nlu.
15 &Nu seeka dexkwaa gu re tab kwaan nak yag meskit, nu chul doo nali zoli guya cho li xaa. 16 Nu kad tub lee tab noll chii zhit yaa xaa, nu nanyaga tub zhit yirol. 17 Nu kad tub tab koo leen xaa xkwes, zee zen tuba kwaan stuba, nu rese sbaa koo leen xaa, zee dexkwaa xaa li Xaa Tubka Nak. 18 Gorna dexkwaa gu li Xaa Tubka Nak kwaan tab, zee kee gu tub gal tab naz ta yat, 19 nu dexkwaa gu tub choo kwaan zo niiya lo, kwaan nak plat, nu kad tuba kanoya chop kwaan zo niiya nu koo gu leen rese xana pa zena. 20 Nu dexkwaa gu stub gal tab kwaan zoli cho li xaa naz ta ya. 21 Nu dexkwaa gu tub choo kwaan zo niiya lo, kwaan nak plat, nu kad tuba kanoya chop kwaan zo niiya lo, nu koo leen gu rese xana pa zena. 22 Nu lee stub ta cho li xaa pa naz nyaaz mbizh zoli gu stub xoop tab, 23 nu noka ropse skin naz tich li xaa zo gu chopga tab. 24 Nu ropse tab ne chaal gu axta xana nu axta yeka, nu noka dexkwaa gu kwaan zena, nu snee dexkwaa gu tab kwaan zoli skina. 25 Nu dexkwaa gu tub xon tab kwaan ke naz ticha, nu tub chiinmtub xana, kwaan nak plat, kad tuba kanoya chop niiya.
26 &Nu dexkwaa gu gaay yag cheen meskit kwaan ke nkaan cho li xaa, zee zena tab, 27 nu zgaaya ke nkaan stub ta cho li xaa zee zena tab, nu zgaaya ke nkaan paro zena tab naz tich li xaa, naz pa nyaaz mbizh. 28 Nu lee yag kwaan ke nkaan paro zena xsaw tab nzhaal zhin tub ta nu axta stub ta cho yoo. 29 Nu teeb gu or cho re tab, nu noka cho argoy, noka cho yag kwaan ke nkaan, kwaan ded leen argoy, deeb or cho. 30 Nu dexkwaa lu li na modxa mlu naya lo lu yek yi.
Ler kwaan yo leen li Xaa Tubka Nak
31 &Noka dexkwaa gu ler kwaan na sul, ler naxne nagaas, ler naxne, ler kwaan non doo, nu choya kee xaa dibuj kwaan nzhak mod mandad kwaan le kerubin. 32 Kee gu ngench kwaan nak or lo dap yiso kwaan deeb or cho kwaan gak cheen yag meskit, nu xan tubga yiso gak plat. 33 Nu zen ngench ler, nu tich ler zob lu kaj cheen trat, zee lee ler le zhiin paro zob yoo, pa nambey nu Pa Nambey Doo. 34 Nu zhiib gu kwaan nyaaw roo kaj nu dub kaj cheen trat pa Nambey Doo. 35 Leen pa nambey, naz stub ta ler, zee zo mdo pa zeek xaa yaal, nu naz ta yat leen li na zo bruj, nu naz ta ya zee zo mes.