Ley cheen re xaa nke zhiin
21
&Kwaane nak ley kwaan mza na zee zaa luya lo re xaa.2 &Chelee lu zi lu tub xaa ke zhiin, xaa hebreo, ke xaa zhiin dubse tub xoop liin, lee liin gazh zee sbaasa sela lu xaa. 3 Chelee xaa mzhin techo xaa seeka techo xaa nya, nu chelee xaa nkanola xaa ngwnaa, zee nya xaa kwaan xngwnaa xaa; 4 chelee xaa mke xaa zhiin lo, mzaa ngwnaa mka xaa, nu mkano me xiin xaa, zee lee xngwnaa xaa nu xiin xaa lakeka lo xaa mke xaa zhiin lo, nu lee xaa nya techo. 5 Nu chelee xaa nke zhiin yé: "Nkela na xaa nke na zhiin lo, nu nkela na xngwnaa na nu xiin na, nanzhaalt nya na sbaasa", 6 zee lee xaa nke xaa zhiin lo wee xaa lo Dios, zee zo xaa xaa roo yoo nu kwaan tub le yiib naluch kid xaa nzha xaa. Nu snee lee xaa nke zhiin gak xaa xaa tira.
7 &Chelee tub xaa to xchaap mod me nke zhiin naroot me sbaasa, kwenta re xaabyi. 8 Nu chelee xaa nke me zhiin lo, nakat me, nel nanyulat xaa me, zee nzho mod zii leeka xaa yezh me, per nagarlot to xaa me lo xaa zit, nel mkadela xaa me. 9 Chelee xaa zaa xaa me ka xgann xaa zee nzhaal le xaa me mod xchaap xaa. 10 Chelee xaa ka xaa stub ngwnaa, lal zaa xaa kwaan gaw me, lal zaa xaa xab me nu lal kano xaa me. 11 Chelee xaa nalet xaa yon kwaane, zee sbaasa nya me nixa nakixt me lo xaa.
Ley kwaan nzhaal yet xaa
12 &Chelee tub xaa seweey nu gut xaa xaa, telise gut xaa xaa. 13 Chelee tub xaa namleta kan zhiin mle xaaya, nel Dios mle zee yet xaa, zee na ni pa naz xonn xaa zee naguta xaa xaa. 14 Per chelee tub xaa nayii ne wechxinn nu gut xaa xaa xlaan, nixa mkaxlaan xaa tich mdo, nzhaal kwe xaa xaa lo mdo nu gut xaa xaa.
15 &Chelee tub xaa keeya yek xuz o xnaa, telise gut xaa xaa.
16 &Chelee tub xaa lewann stub xaa nu to xaa xaa, o kanoka xaa xaa, telise gut xaa xaa.
17 &Chelee tub xaa xobde lo xuz o lo xnaa, telise gut xaa xaa.
18 &Chelee xaa dil xaa nu seweey xaa wechxinn xaa kwaan ke o kwaan panyet, nu nzhose xaa loon nu nayeta xaa, 19 nu lee xaa mkeeya yek xaa zo sbaasa, nebse chelee xaa mweey nzho mod zoli nu ze xaa kwaan tub le yag, per nzhaal kix xaa re kwaan yakwen xaa nu re xmbizh xaa.
20 &Chelee tub xaa seweey tub xaa o tub me nke zhiin lo xaa, kwaan yag, nu leeka gorzee yet xaa, zee kix xaa kwaan mle xaa, 21 nu chelee xaa mye xaa tub mbizh o chop mbizh zee nakixt xaa xaa, nel lee xaa nak xaa nke zhiin lo xaa. 22 Chelee chop xaa dil nu seweey xaa tub me nakxinn nu tira ded xiin me nu nangeta me, zee lee xaa mleya nzhaal kix paro naab xmbyi me nu paro yé xaa nak zhiin. 23 Chelee me yet me, zee noka xaa yet. Chelee xaa gut xaa samyet xaa telise yet xaa, 24 nu chelee xaa kich xaa zaalo xaa, zee noka zaalo xaa yech, chelee xaa kiib xaa leyy xaa, zee noka leyy xaa yiib, chelee xaa kich xaa yaa xaa zee noka yaa xaa yech, chelee xaa kich xaa nii xaa, zee noka nii xaa yech, 25 chelee xaa choog xaa xaa, zee noka xaa zhoog, chelee xaa seweey xaa xaa, zee noka xaa weey, nu chelee xaa zaa golp xaa xaa zee noka xaa ya golp.
Ley cheen xaa nke xaa zhiin lo
26 &Chelee tub xaa seweey garlo tub xaabyi o tub ngwnaa, xaa nke zhiin lo xaa nu tira mchoola, zee sela xaa xaa nel nanyaniit garlo xaa. 27 Chelee tub xaa kiib leyy tub xaa o leyy tub me nke zhiin lo xaa, zee sela xaa xaa.
28 &Chelee tub ngoon mkeeya yenn tub xaa o yenn tub me nu tira ngut xaa, telise gut xaa ngoon kwaan ke nu nagawt xaa xpaal ma, zee lee xpixwann ngoon zo sbaasa. 29 Chelee ngoon nayiila axta yilo nu mbit ma tub xaabyi o tub ngwnaa nu nela xpixwann ngoona nu namkadoot xaa ma, zee nzhiba tich xaa, zee gut xaa ngoon kwaan ke, nu noka lee xaa yet kwaan ke. 30 Nu chelee xaa naab xaa paro non xaa, nu kix xaa xaa zee nayeta xaa. 31 Leeka ley ne nle xaa lo ngoon gorna nzhut ma xgaan xaa o xchaap xaa. 32 Nu chelee ngoon mkeeya yek tub xaa o me nke zhiin, zee lee xpixwann ma kix galbchii demi plat nu lee ngoon yet kwaan ke.
33 &Chelee tub xaa nkano bzo nu nasaawt xaa rooya nu la tub la ngoon o tub ngwes leena, 34 zee lee xpixwann bzo kix ma nu lee ma ngut lake lo xaa.