Chii kwaan né Dios nzhaal le xaa
20
Dios nzhé lo re xaa Israel wdizh ne:2 —Na nak Xaa Tubka Nak, xaa nak Xtios gu. Xaa mloo re gu yizhyo Egipto leezha bid doo mkee gu zhiin.
3 &Nawiit lu lo stub naz dios, nebse na nak Xtios lu.
4 &Nu nadexkwaat lu tub maj, mod nzhak re kwaan nzho leen yiba, nu re kwaan nzho lo yizhyo, nu re kwaan nzho leen nistoo. 5 Nakichxubt lu loya nu nixa nagoolt lu loya. Nel na nak Xtios re gu nu selos na. Na ted re xiin lu bid, nu re xos lu, nu re xiin xos lu, re xaa kwaan nayii ne na. 6 Per lee re xaa nkela na, nu re xaa kwaan nle re kwaan nzhé xtizh na, na lu yalnkela cheen na lo xaa nu lo zyen doo dii cheen xaa.
7 &Nazeta lu le na sbaasa nel na nak Xtios gu, Xaa Tubka Nak, nu nazeyalt na. Naab na kwent cheen xaa zet le na sbaasa.
8 &Selazh lu mbizh gazh, mbizh ne nak sab, nak tub mbizh nambey cheen na. 9 Xoop mbizh ke lu zhiin wen nu le lu re xchiin lu. 10 Nu lee mbizh gazh nak mbizh cheen na, nu nik tub zhiin naket lu mbizh ne. Nik tub xaa nyent mod ke zhiin mbizh ne, nixa lu, nixa xgaan lu, nu nixa xchaap lu, nu nixa re xaa nke zhiin lo lu, nu nixa re me nke zhiin lo lu, nu nixa xma lu, nu nixa re xaa zit, xaa nzho lazh gu. 11 Na mkee zhiin xoop mbizh mdexkwaa na yiba nu yizhyo, nu nistoo, nu rese kwaan nzho leena. Nu lee mbizh gazh namketra na zhiin. Nu mle nzhul na mbizh ne, nu noka mle non naya.
12 &Nzhaal kela lu xuz lu nu xnaa lu, zee le na xche ban lu lo yizhyo kwaan za na lo lu.
13 &Naguta lu.
14 &Nachaalt lu stub ngwnaa.
15 &Nalewannt lu.
16 &Nagaazht lu tub kwaan nawlit tich samyet lu.
17 &Nazoblazht lu li wechxinn lu, nu nixa nazoblazht lu xngwnaa wechxinn, nu nixa xmos xaa, nixa xkoon xaa, nixa xpur xaa, nu nixa nazoblazht lu re kwaan nkano xaa.
Mzheb re xaa Israel ne Dios.
18 Gorna mbin re xaa Israel, bi cheen kach cheen mbakxiil, nu bi cheen ngwzi, nu mlu re zhen kwaan mzhaal yek yi lo xaa zee mzheb doo re xaa, nu zit mzo re xaa lo yi. 19 Zee nzhé re xaa lo Ches:
—Nii lo nu, nu lee nu gona, zee naniit Dios lo nu, napa lee nu kayet.
20 Nu lee Ches mkeb nzhé:
—Nazhebt gu. Dios mlu snee lo gu zee le xaa preb gu, zee zheb gu ne gu xaa nu nalet gu kwaan nawent.
21 Zee lee re xaa Israel mzo zit lo yi, nu lee Ches nguxoob leen beg yek yi paro nzo Dios. 22 Nu lee Xaa Tubka Nak nzhé lo Ches:
—Guzh lo re xaa Israel: "Ngune gu lee na ngunii lo re gu naz leen yiba. 23 Nadexkwaat lu stub dios kwaan nak or nu plat gool lu lo, mod nzholl lu lo na. 24 Gorna kaxkwaa lu tub lo mdo gool lu lo na, kaxkwaa luya kwaan yo. Nu leezha nzhekla lu zaa lu tub gon kwaan nak mbakxiil, nu chib, nu ngoon lo na, sbaa teed lu ma lo mdo. Snee yal na lo lu pa mleey na zee zelazh lu na, nu wen ni na lo lu. 25 Nu chelee lu nzhekla lu kaxkwaa lu tub mdo kwaan ke, nakawwt lu ke kwaan nik tub kwaan, le xchiin lu re ke mod naka. Chelee lu kaww luya zee le beed lu mdo. 26 Nu nixa naket lu leya nel nzoxal xan xab lu, nzho mod luu cho lu.