Kwaan mzaa Dios yek Yi Sinaí
19
1-2 Mroo re xaa Israel pa le Refidim, zee mzhin re xaa wen gax lo tub yi kwaan le Sinaí, baa mlaz re xaa gax lo yi. Re xaa Israel mzhin baa mbee yon leeka mbizh kwaan mroo re xaa Egipto. 3 Zee lee Ches nguxoob yek yi pa mas ya nzeb zee mrezh Dios xaa, zee nzhé Xaa Tubka Nak lo xaa:—Yé lu rese xtizh na lo rese dii cheen Kob, xaa nak re xaa Israel. 4 "Rese gu ngune xomod mted na re xaa Egipto bid, nu mbe na re gu, axta paro nzo na, mod tich xiil msi. 5 Chelee re gu gon gu xtizh na, nu le gu kwaan myaan be, zee gak gu xaa non doo lo na, nu lo na nonra yezh cheen gu lo re stub naz yezh lo dubse yizhyo, nel dubse yizhyo nak xcheen na. 6 Nu gak re gu xaa nzhul lo na nu gak gu mod ngwleyy lo re xaa yizhyo." Guzh lo re xaa Israel re kwaan ni na lo lu.
7 Zee mbare Ches nu mrezh xaa re xaa gol xaa yezh, nu nzhé xaa re wdizh kwaan ngunii Xaa Tubka Nak lo xaa.
8 Nu rese xaa Israel lal mkeb, nu nzhé re xaa:
—Rese kwaan nzhé Xaa Tubka Nak le be.
—Wii nal, lee na yun lo lu leen tub xkaw yaas, nu zee gon re xaa kwaan ni na lo lu, zee tubka gon re xaa kwaan yé lu lo xaa.
10 Zee nzhé Xaa Tubka Nak lo Ches:
—Gwa lo re xaa yezh nal, zee zo nambey xaa nalzhe nu yee, nu le nambey xaa xab xaa. 11 Nu noka list bzo gu mbizh yon, nel zhe zee yun na, Xaa Tubka Nak, lo re gu yek Yi Sinaí. 12 Noka bzob tub nseyn dub welt cho yi, zee nadedt re xaa, nu guzh lo re xaa zee le xaa respet yi, nu nixa nayixoobt xaa choya nu nixa nabiit xaa gax dub welt choya, nel rese xaa kwaan yixoob choya, yet xaa. 13 Nu nzhaal gut xaa xaa per nagalt xaa cho xaa, sinka lee xaa yet kwaan ke o kwaan wez. Nixa myet nu nixa ma nabant chelee xaa gal xaa cho yi. Nebse gorna gon xaa kwezh kach cheen mbakxiil zee nzho mod yixoob xaa yek yi.
14 Zee mla Ches yek yi, zee yé xaa lo re xaa list zo xaa gool xaa lo Dios, nu le nambey xaa xab xaa.
15 Zee lee Nzhé Ches lo re xaa:
—List bzo gu mbizh yon, nu nachaalt gu ngwnaa.
16 Nu gorna ngulo nguni yizhyo mbizh yon, mla bal ngwzi nu ngoch doo ngwzi, nu dubse yi mri xkaw nagaas noka mbin xaa tub bii cheen kach mbakxiil kwaan nye doo mrezh zee rese xaa nzhi baa mzheb doo xaa. 17 Zee mloo Ches re xaa yezh gax lo yi zee zhaal xaa kwaan Dios nu zheta mri re xaa gax lo yi. 18 Dubse Yi Sinaí mri zhen gorna le Xaa Nak Tubka Nak nyaadla leen ki. Lee zhen nroo modxa nrooya leen gor nu dubse yi mxiz. 19 Nu lee bi cheen kach kad welt mas nye mbezh. Ches ngunii nu lee Dios nkeb mod ngwzi.
20 Nu lee Xaa Tubka Nak mla yek yi Sinaí, pa mas ya nzeb zee mrezh xaa Ches pa nzo xaa zee ngwa Ches lo xaa. 21 Nzhé Xaa Tubka nak lo Ches:
—Bla nu guzh lo re xaa nadedyot re xaa lo nseyn, nu nixa nawiit re xaa lo na nel napa kayet zyen xaa. 22 Nu axta re ngwleyy chelee xaa bii xaa lo na nkin le nzhul xaa xaa, nel napa noka xaa kayet.
23 Zee nzhé Ches lo Xaa Tubka Nak:
—Lee re xaa yezh nagarlot yixoob yek Yi Sinaí nel lu nguné lo na zoob na tub nseyn, nu nguné lu lo na zee yé na lo re xaa nambey doo naka.
24 Lee Xaa Tubka Nak nzhé:
—Bla zee guzh lo Aarón zee yixoob xaa kwaan lu, per lee re ngwleyy nu re xaa yezh nadedt xaa lo nseyn, nel nyent mod yixoob xaa paro nzo na nel napa kayet xaa.
25 Zee mla Ches nu nzhé xaa rese kwaane, lo re xaa Israel.