Jetro ngwa lo Ches
18
Jetro nak ngwleyy naz Madián nu xuzhap Ches, nu ngune xaa rese kwaan mle Dios lo Ches nu lo re xaa Israel, xaa nak lazh xaa, nu noka ngune xaa, lee Xaa Tubka Nak mloo re xaa Egipto. 2 Zee lee Jetro mkayaa Séfora xngwnaa Ches, gorna mxaal xaa me, 3 nu rop xgann xaa. Tub xgann xaa le Gersón, nel nzhé Ches: "Xaa zit nak na yizhyo ben". 4 Nu lee stub xaa mlole xaa Eliezera, nel nzhé xaa: "Lee Xtios xuz na mle yud na nu mkanap xaa na lo spad xaa nak faraón".5 Ches mlaz naz wen xan yi cheen Dios, nu baa ngwa Jetro kwaan Séfora nu rop xgaan Ches, 6 zee mxaal xaa tub xaa lo Ches nzhé:
—Xuzhap lu Jetro, nzesewii lo lu kwaan sa lu nu kwaan rop xinn lu.
7 Zee lee Ches mroo mkayaa xuzhap, nu mkichxub lo xaa, axta mla lachuzh xaa lo yo, nu mzaa xaa tub bit tagarlo xaa. Ngulo ngunii rop xaa dix, zee mreep rop xaa leen yoo ler. 8 Nu baa lee Ches nzhé lo Jetro rese kwaan mle Xaa Tubka Nak lo xaa ngok faraón nu lo re xaa Egipto, nu re bid kwaan mded xaa naz nu xomod mkanap xaa re xaa dub naz nel nkela xaa re xaa Israel.
9 Zee nix doo ngok lextoo Jetro, lo re kwaan wen, kwaan mle Xaa Tubka Nak lo re xaa Israel, gorna ngulo mloo xaa xaa lo re xaa Egipto. 10 Nu nzhé Jetro:
—Wen doo nak Xaa Tubka Nak, xaa mkanap gu lo re xaa Egipto nu lo xaa nak faraón, 11 nu kwaan nawent kwaan mle xaa lo re gu. Per lee nalsi ne na lee Xaa Tubka Nak, nak Dios narora lo stub naz re dios. 12 Zee lee Jetro mted tub ma nu mzek xaa ma lo Dios, nu mted xaa xchop ma zee kwi wen xaa, zee mzhin Aarón kwaan re xaa gol, xaa Israel, zee ngwataw xaa ma kwaan xuzhap Ches, lo Dios.
Ches mleey zlak xaa
13 Lee stub mbizh mzob Ches naab kwent lo re xaa yezh; nu lee re xaa yezh mri garziil nu axta mzhel yizhyo.
14 Gorna ne Jetro lee Ches naab kwent lo re xaa Israel zee lee Jetro nzhé:
—¿Chozhiin naab lu kwent lo rese xaa ne? ¿Chozhiin techo lu nleya? Nu nzhi xaa garziil nu axta mzhel yizhyo lo lu.
15 Nu lee Ches mkeb:
—Nel nyiid re xaa lo na zee naab na xkwent xaa lo Dios. 16 Gorna nkano xaa dil, zee naab na kwent lo tub xaa nu lo stub xaa, zeera nseed na xaa kwaan né Dios nzhaal le xaa.
17 Zee lee xuzhap Ches nzhé:
—Nawent nak mod nle luya, 18 nel nyazha lu nu nyazha re xaa nzhi lo lu, nel zyen doo zhiin nkano lu, nel nyent mod le techo luya. 19 Bin kwaan ni na; na za tub konsej lo lu, nu kanap Dios lu. Lu nzhaal zo xlugar re xaa zee naab lu xkwent xaa lo Dios. 20 Nu seed lu re xaa kwaan nzhaal le xaa nu luu lu naz kwaan nzhaal ze xaa. 21 Nzhaal kwey lu lak xaa lo re xaa, xaa nzheb ne Dios, xaa nixa nankadet, nixa nanzoblazht xaa demi. Zee zaa lu yalnabeyy lo xaa nabeyy lo tub mil xaa, xaa nabeyy lo tub gayoo xaa, xaa nabeyy lo choobchii xaa, nu xaa nabeyy lo tub chii xaa. 22 Zee re xaa ne naab kwent lo re xaa yezh re kwaan nanagant, nu cheleeya nzho tub kwaan nagan zee yiidno xaaya lo lu, nu sbaa nzho mod wen le luya. 23 Chelee lu le lu kwaane, nu snee né Dios, zee wen xek lu lo re xaa zee wen nya re xaa garli xaa.
24 Ches mle modxa nzhé xuzhap xaa. 25 Nu mleey xaa xaabyi, xaa nzho moda lo lo re xaa Israel, zee mzaa xaa yalnabeyy lo xaa nabeyy lo tub mil xaa, lo xaa nabeyy lo tub gayoo xaa, lo xaa nabeyy lo choobchii xaa nu lo xaa nabeyy lo tub chii xaa. 26 Zee lee re xaa ne ngunaab kwent lo re xaa yezh re kwaan nanagant per lee re kwaan nagan mbe xaa lo Ches. 27 Zee lee Jetro mlaa Ches nu nya naz lazh xaa.