Éxodo 17

Nis kwaan mroo cho ke

Mroo re xaa Israel yizhyo cheen Sin, nu cheepga cheepga mze xaa naz, modxa mxaal Xaa Tubka Nak, zee mlaz xaa Refidim, per nyent nis ngo re xaa. 2 Kwaanzee myech re xaa lo Ches, nu nzhé xaa:

—¡Zaa nis go re nu!

Zee lee Ches nzhé:

—¿Chozhiin nzhech gu lo na? ¿Chozhiin nle gu preb Dios?

3 Per lee re xaa yezh ngok nzhek doo lextoo nu ngunii nawent xaa lo Ches, nu nzhé xaa:

—¿Chozhiin mloo lu nu yizhyo Egipto, zee gut lu nu lo yizhnzhek, kwaan re xinn nu, nu kwaan re xma nu?

4 Zee lee Ches nzhé lo Xaa Tubka Nak:

—¿Cho kwaan le na kwaan re xaa ne? ¡Xeepse ngut xaa na kwaan ke!

5 Nu lee Xaa Tubka Nak mkeb:

—Gwaner lo re xaa, nu be lak re xaa gol, xaa Israel, nu noka be xkag lu kwaan mla lu lo nis roo yuu Nilo. 6 Lee na kwaz lu yi Horeb lo kelag, gorna la lu xkag lu cho ke zee, roo nis go re xaa.

Ches sbaa mle, lo re xaa gol, xaa Israel. 7 Nu mlole xaaya "Meriba" Kwaan nii "myech". Nel re xaa Israel myech lo Ches, nu noka mlole xaaya "Masah" kwaan nii "Preb" Nel baa mle xaa preb Dios, gorna nzhé xaa: ¿Che nzo Xaa Tubka Nak lo be, oncha nanzot xaa?

Dil kwaan re xaa Amalek

8 Zee mzhin re xaa Amalec Refidim, zee dil xaa kwaan re xaa Israel, 9 zee lee Ches nzhé lo Josué:

—Bleyy re xaa kwaan nzhekla lu zee yadil gu kwaan re xaa Amalec. Lee yee zo na yek yi kwaan xkag na kwaan mzaa Dios lo na.

10 Nu mle Josué modxa nzhé Ches nu mroo xaa ngwa xaa mdil xaa kwaan re xaa Amalek, nu lee Ches, Aarón nu Hur nguxoob yek yi paro ya nak. 11 Gorna lee Ches nlep yaa zee lee re xaa Israel nle gan lo re xaa Amalek, nu gorna nseto xaa yaa xaa zee nle re xaa Amalek gan lo re xaa Israel. 12 Gorna lee yaa Ches nguzha, zee mzen Aarón nu Hur tub ke nu mdix xaaya lo yo zee mzob Ches ticha. Zee lee Aarón nu Hur mzen tubga lad yaa xaa, snee zee mye yaa xaa axta gorna ngulo ngwaaz mbizh. 13 Kwaanzee mle Josué gan mbit re xaa Amalek kwaan spad.

14 Zee lee Xaa Tubka Nak nzhé lo Ches:

—Kee kwaane lo xkech lu zee nyent cho yenlazha, nu guzh lo Josué lee na le zee yenlazh re xaa re xaa Amalek.

15 Nu lee Ches mdexkwaa tub mdo, nu mlo le xaaya "Lee Xaa Tubka Nak nak xpander na". 16 Nu nzhé xaa:

—Nel Amalek mlis yaa lo Xaa Tubka Nak,

zee dil Xaa Tubka Nak kwaan Amalek,

tub dii nu stub dii.