Xaa Tubka Nak mzaa maná
16
Re xaa Israel mroo Elim nu mzhin xaa yizhyo cheen Sin, kwaan nzhi xsaw lo Elim nu lo Sinaí, ngoka mbizh chiin xche mbee chop gorna ngulo mroo xaa Egipto. 2 Nu baa mzelo re xaa Israel ngunii nawent lo Ches nu lo Aarón, 3 nu nzhé xaa:—Mas wen ngut Xaa Tubka Nak nu yizhyo Egipto, zee mzob nu nu ndaw nu baal paro nguzhe lextoo nu, per lee gu nzeno rese nu naz wen zee gut gu nu lo yalnlaan.
4 Zee lee Xaa Tubka Nak nzhé lo Ches:
—Na le zee la kwaan gaw gu naz yiba. Lee rese xaa roo yizata garziil nu toop xaa nebse kwaan gaw xaa tub mbizh. Zee ne na nen che rese xaa Israel gon xtizh na. 5 Lee mbizh xoop zee toop gu chop tant kwaan toop gu tub mbizh nu dexkwaa guya.
6 Zee lee Ches nu Aarón nzhé lo re xaa Israel:
—Zhel yizhyo zee ne re gu lee Xaa Tubka Nak, nak xaa mloo be yizhyo Egipto, 7 nu lee garziil wii gu lo kwaan gro kwaan le Xaa Tubka Nak; nel mbin xaa re kwaan nawent kwaan ngunii gu lo xaa. Nu ¿cho nak nu zee nii nawent gu lo nu?
8 Nu noka nzhé Ches lo xaa:
—Lee Xaa Tubka Nak zaa baal gaw be zhel yizhyo, nu lee garziil zaa xaa yat paro yizhe lextoo be, nel mbin xaa re diizh nawent kwaan ngunii gu. Per naleet lo nu ngunii guya sinka lo Xaa Tubka Nak ngunii gu nawent.
9 Zee lee Ches nzhé lo Aarón:
—Guzh lo re xaa Israel zee bii gax xaa lo Xaa Tubka Nak, nel mbin xaa re kwaan nawent nzhé gu. 10 Nu leeka gorna lee Aarón kanii lo re xaa Israel lee xni cheen Xaa Tubka Nak mlu leen xkaw naz wen.
11 Zee lee Xaa Tubka Nak ngunii lo Ches:
12 —Mbin na re diizh nawent kwaan ngunii re xaa Israel, lee nal guzh lo xaa: "Gorna zhel yizhyo zee gaw gu baal, nu lee garziil gaw gu yat paro yizhe lextoo gu. Snee ne gu lee na Xaa Tubka Nak, nak na Xtios gu."
13 Lee mzhel yizhyo zee mzhin zyen doo mtobex nu mri ma dubse leen pa mlaz xaa. Nu lee garziil mla doo gop dubse paro mlaz xaa, 14 nu gorna lee mbizh nsekwiizh gop lo yo zee nlake tub kwaan na rus leen, nu bool naka. 15 Nu gorna ne re xaa Israel loya, zee nzhé xaa lo wechxinn xaa: "¿Cho kwaan kwaane?",a nel nanet xaa cho kwaan naka. Zee lee Ches nzhé:
—Kwaane nak yat kwaan mzaa Xaa Tubka Nak gaw be. 16 Nu kwaane nak kwaan né Xaa Tubka Nak yilo, zee ne paro gu nzho yoo, sbaaka toop gu kwaan gaw gu, tub yega cheen chop litr kad tub xaa.
17 Lee re xaa Israel mle snee. Rol xaa mtoop zyenra lee stub naz xaa mtoop cheepse; 18 nixa xaa mtoop zyenra namlaketra nu nixa xaa mtoop cheepse nangokjwalta lo xaa, kad tub xaa mtoop paro kwaan nkin gaw xaa tub mbizh.
19 Gorzee lee Ches nzhé:
—Nik tub xaa nanzhaalt kozhaw kwaane stub mbizh.
20 Nzho lak xaa lo re xaa namlet kas kwaan nzhé Ches nu mlozhaw xaaya stub mbizh nu lee re kwaan mlozhaw re xaa nguzhe myaz leena nu mdexlaaya, zee nayii Ches lo re xaa.
21 Yizata garziil kad tub xaa ntoop kwaan gaw xaa tub mbizh nu gorna nla neey zee nyalla. 22 Nu lee mbizh xoop mtoop xaa chop tant kwaan ntoop xaa tub mbizh nu kad tub xaa yizo chopga yega cheen chop litr nu lee re xaa nabeyy yezh ngwa nzhéya lo Ches. 23 Zee lee Ches nzhé:
—Kwaane né Xaa Tubka Nak: "Yee gak zhe sab tub mbizh nzhul cheen na, nalzhe dexkwaa gu kwaan nzhaal gaw gu yee nu btezhiib gu kwaan gaw gu yee, nu kozhaw gu re kwaane".
24 Zee lee re xaa mlozhawa nguni yizhyo stub mbizh re kwaan mlake, nu namdexlaata nu nixa namket myaza. 25 Zee lee Ches nzhé:
—Daw gu nal nel nalzhe nak tub mbizh nzhul cheen Xaa Tubka Nak; nu mbizh ne nik tub gu nayat wen yakwaana. 26 Nzho mod toop guya tub xoop mbizh per lee mbizh gazh, zhe sab, nayota.
27 Nzho lak xaa mroo ngwa zhe sab yitoop maná, per nanguzhaalt maná lo xaa. 28 Nu lee Xaa Tubka Nak nzhé lo Ches:
—¿Chenoon nanet gu kozhaw gu kwaan ni na nu kwaan nseed na gu? 29 Bselazh gu lee na nak, Xaa Tubka Nak; lee zhe xoop za na chop tant kwaan nzhaw gu tub mbizh. Lee mbizh gazh mza na lo rese gu zee kwaz gu garli gu nu naroot gu.
30 Nu sbaa lee rese xaa yezh mlaz zhe gazh. 31 Nu lee re xaa Israel mloo leya maná, re kwaan mtoop xaa na rus, naka mod bizh cheen kolantr, nu naxa kwenta yat kwaan ndeeb mzhin tich. 32 Zee lee Ches nzhé:
—Kwaane né Xaa Tubka Nak: "Tezhe gu maná leen yeg kwaan nak chop litr nu blozhaw guya zee ne re xtii gu cho kwaan mza na ndaw gu wen gorna mlo na gu Egipto".
33 Nu lee Ches nzhé lo Aarón:
—Bzen tub yeg kwaan nak chop litr nu blo maná leena nu zee zhiib luya lo Xaa Tubka Nak zee kozhaw re xtii beya tira.