Kant cheen Ches
15
Zee lee Ches nu re xaa Israel mbill lo Xaa Tubka Nak:Gol na lo xaa,
xaa chul mle gan lo dil,
gorna mselaw xaa re xaa nzob tich kabay leen nistoo.
2 Nu gol na nebse lo Xaa Tubka Nak,
xaa nzaa yalngezh
nu xaa mloo na lo yalgut,
gol na lo xaa nel lee xaa nak Xtios na,
zeet na le xaa nel lee xaa nak Xtios xuz na,
kwaanzee gol na lo xaa.
3 Xaa Tubka Nak nak xaa ndil,
Xaa Tubka Nak nak le xaa.
4 Xaa Tubka Nak mselaw re karet nu re soldad cheen xaa ngok faraón leen nistoo,
nu rese xaa nonra lo xaa ngok faraón, ngwep nis leen Nistoo Naxne.
5 Mla re xaa leen nis kwenta ke
mla xaa xan nis pa nechra leen nistoo.
6 Xaa Tubka Nak, naro nak yalngezh cheen lu,
Mluux lu re xaa nayii ne lu kwaan yalngezh cheen lu.
7 Nu mle non lu lu leezha mluux lu re xaa nayii ne lu,
nu kwaan yalnayii mzek lu re xaa kwenta yix.
8 Kwaan yalngezh cheen lu mzebi lu lo nis zee ngok rol nistoo,
nu tub taga mzoya kwenta bla,
nu zheta ngok nistoo, nu namgutraya.
9 &Lee re xaa nayii ne be mle xgab:
"Yake be tich xaa,
yakab be xaa,
yayut be xaa,
yakib be rese kwaan nkano xaa,
zee kiiz beya.
Ko na kuchi,
zee tira luux na xaa kwaan yaa na."
10 Mzebi lu lo nistoo zee lee nistoo mdeb re xaa,
nu mlaw xaa kwenta yiib leen nis kwaan kwall doo.
11 Ay Xaa Tubka Nak,
¡nyentra dios kwenta lu,
nyentra dios naro lo lu,
nyentra dios nzhul kwenta lu
nle lu kwaan naro nu kwaan nakap.
12 Mle naro lu yalnabeyy,
zee mdeb yizhyo re xaa Egipto.
13 Kwaan yalnkela mbe lu re nu, xaa mloo lu yizhyo Egipto,
nu kwaan yalnabeyy cheen lu mbe lu nu axta paro nzho lu.
14 Gorna ne re yezh kwaane, zee zheb doo xaa,
nu re xaa nzho yizhyo Filistia kano doo yalne,
15 nu lee xaa nabeyy yizhyo Edom la yalnacheb leen lextoo xaa,
nu lee xaa nabeyy yizhyo Moab xiz doo lo yalnacheb,
nu lee re xaa nzho yizhyo Canaán kaw lo yalnacheb.
16 Rese xaa ne zheb doo, nu xizh doo.
Xaa Tubka Nak nel mle lu kwaan gro,
kwaanzee le lu re xaa ne zheta kwenta tub ke,
zee ded nu, xaa nak yezh cheen lu,
xaa mloo lu.
17 Xtios na, Xaa Tubka Nak,
telise wee lu nu zee yo nu yi chul cheen lu,
pa nzho lu,
zee yo nu leen li lu kwaan mza lu.
18 Lee lu, Xaa Tubka Nak, nabeyy lu tira.
Kant cheen Mari
19 Gorna lee re xaa nzho leen re xkaret xaa ngok faraón, nu re xaa nzob tich kabay nzhaded paro mxal nistoo, zee lee Xaa Tubka Nak mchaal nis, zee mlake re xaa xan nis, per lee re xaa Israel mded lo yo bizh leen nistoo. 20 Zee lee Mari, me mkayaa wdizh lo Xaa Tubka Nak, me nak bzan Aarón, mzen tub tambor chut nu sneeka rese ngwnaa mbill leeka kwaan tambor chut nu mkani re me. 21 Nu lee Mari nzhé:
Gool be lo Xaa Tubka Nak,
xaa mle gan lo dil
nu mselaw xaa re kabay leen nis nu noka re xaa nzob tich ma.
Dios mle nis nala ngok drech
22 Ches mle mroo re xaa roo Nistoo Naxne zee mze re xaa Israel. Nu mze xaa yizhyo kwaan le Shur nu nzhala chon mbizh mze xaa nu zer yizhal xaa nik cheep nis go xaa. 23 Nu mzhin xaa tub pa nzho nis nala, nu nagarlot ngo xaaya. Kwaanzee mloo le xaa yizhyo zee Maraa. 24 Zee lee re xaa nawent ngunii lo Ches, nu nzhé xaa:
—Lee nal, ¿cho kwaan go be?
25 Zee lee Ches ngunii lo Xaa Tubka Nak, nu lee Xaa Tubka Nak mlu tub xan yag win lo xaa. Zee mcheep xaaya leen nis nu lee nis mdee wen leeka gorzee.
Nu baa mlu Dios lo re xaa zee nzhaal wii xaa lo xaa. Nu noka mzaa xaa ley lo xaa, nu re kwent cho kwaan nzhaal le xaa. 26 Nu nzhé Xaa Tubka Nak:
—Na nak Xtios gu, Chelee gu gon gu xtizh na nu wen le gu kwaan nii na nu kozhaw gu rese kwaan nii na, zee nik tub yalyizh naxaalt na lo gu mod mxaal naya lo re xaa Egipto. Nel na nak Xaa Tubka Nak, Xaa Nsekwen re gu.
27 Zeera mzhin xaa Elim, paro nzho tub chiibchop pa nzhiib nis nu nzeb chon gal nzho chii yag yin baa. Nu baa mlaz re xaa.