Lee re xaa Israel mded Nistoo Naxne
14
Lee Xaa Tubka Nak nzhé lo Ches:2 —Guzh lo re xaa Israel, zee bare gu paro nlu nzhi Pi-hahirot, xsaw Migdol lo roo nistoo gax Baal-zefón, zee kwaz gu baa. 3 Zee le xaa nak faraón xgab, nanet re gu pa naz ya gu. Le xaa xgab mzowen gu naz wen. 4 Nu le ned na lextoo xaa nak faraón, zee reke xaa tich gu, zee luu non nak na lo kwaan le na lo xaa nu lo re xsoldad xaa, zee ne re xaa Egipto, lee na nak Xaa Tubka Nak.
Nu lee re xaa Israel mle kwaan nzhé na. 5 Leezha mbin xaa ngok rey Egipto lee re xaa Israel mlela gan mroo, zee lee xaa ngok faraón nu re xaa nke zhiin lo xaa mchee xgab nu nzhé: "¿Chozhiin mlaa be nya xaa? ¿Xomod tant naxen be? Lee nal, ¿cho xaa ke zhiin lo be?"
6 Zee lee xaa ngok faraón mxaal xaa zee liger zo re karet kwaan soldad nu kabay. 7 Nu mbe xaa xoop gayoo karet kwaan nak kwaan wen lo rese nu noka rese karet kwaan nzho Egipto. Nu kad tub xaa non lo re soldad mbe tub karet. 8 Lee Xaa Tubka Nak mle zee ngok ned lextoo xaa ngok faraón, zee mrenal xaa re xaa Israel. Nu lee re xaa Israel mroo kwaan yalnabeyy.
9 Lee xaa ngok faraón kwaan re xsoldad xaa nu xaa nzho leen karet nu re xaa nzob tich kabay, nzha renal re xaa Israel. Nu nguga re xaa lo xaa roo wri nistoo kwaan nzhi Pi-hahirot gax Baal-zefón, pa mlaz re xaa. 10 Gorna ngune re xaa Israel lee xaa ngok faraón nu re xsoldad xaa nzeke gax tich xaa, zee mzheb doo xaa, zee ngunaab xaa lo Xaa Tubka Nak kwaan dub lextoo xaa, 11 nu nzhé xaa lo Ches:
—¿Chozhiin mloo lu nu Egipto? ¿Chozhiin nzeno lu nu naz wen ne zee yet nu? ¿Che nel nyent pa gaach nu Egipto? 12 ¿Che nalet kwaane né nu lo lu leezha nzoka be Egipto? Né nu lo lu: "Laa keka nu zhiin lo xaa Egipto. Mas wen nke nu zhiin lo xaa Egipto ke yet nu naz wen nee."
13 Nu lee Ches ngunii lo re xaa:
—Nazhebt gu. Nali ble gu lextoo gu, nu wii gu lee Xaa Tubka Nak nzo kwaan be nalzhe, nel mlu be lo re xaa Egipto, nu nabaretra be luu be lo xaa stuba. 14 Lee Xaa Tubka Nak dil kwaan xaa Egipto, nu gu nyent cho kwaan le.
15 Zee lee Xaa Tubka Nak nzhé lo Ches:
—¿Chozhiin nii lu lo na? Guzh lo re xaa Israel zee ze xaa. 16 Nu lep xkag lu, nu seli yaa lu zee gak rol nistoo, zee garlo mod ded re xaa Israel, zee ze xaa lo yo bizh. 17 Lee na le ned lextoo re xaa Egipto, zee reke xaa tich gu, zee luu non nak na lo kwaan le na lo xaa nak faraón nu lo re soldad cheen xaa nu lo re xaa nzob tich kabay nu lo re xaa nzho leen karet. 18 Zee ne re xaa Egipto, lee na nak Xaa Tubka Nak, leezha luu non nak na lo kwaan le na lo xaa nak faraón nu lo re xaa nzho leen xkaret xaa nu lo re xaa nzob tich xkabay xaa.
19 Nu gorzee lee mandad cheen Xaa Tubka Nak nu lee xkaw kwaan nlu kwenta mdun kwaan nzhaner lo re xaa Israel, nu mlakeya naz tras lo re xaa. 20 Nu sbaa lee xkaw kwaan nlu kwent mdun mlakeya xsaw lo re xsoldad xaa Egipto nu lo re xaa Israel. Per lo re xaa Egipto ngoka tub xkaw kwaan namzaat xni, nu lo re xaa Israel mzaaya xni. Kwaanzee lee re xaa Israel nangugat lo re xaa Egipto dubse yaal zee.
21 Ches mseli yaa lo nistoo nu lee Xaa Tubka Nak mxaal tub mbi naro doo kwaan mroo paro nlen mbizh dubse yaal nu mlerola nistoo. Nu lee xaa mleya zee ngoka yo bizh. 22 Nu gorzee lee re xaa Israel mzeeb leen nistoo, nu mze xaa lo yo bizh, nu lee nistoo mzoli mod tub bla kwaan nye doo mzo lad li nu lad beg.
23 Nu lee re xaa Egipto nzhake tich re xaa Israel axta rol leen nistoo, nu mreke xaa kwaan kabay nu kwaan karet tich re xaa. 24 Gorna nguni yizhyo lee Xaa Tubka Nak mlaach lo xkaw nu bal kwaan nlu kwenta mdun lo re xsoldad xaa Egipto. Nu mcheb doo xaa re xaa. 25 Nu lee nii re xkaret xaa nzha luxa, nu nyentra mod xoon xkaret xaa nye. Gorzee lee xaa Egipto nzhé:
—Bachi be lo re xaa Israel, nel Xaa Tubka Nak kadil kwaan be.
26 Lee Xaa Tubka Nak nzhé lo Ches:
—Seli yaa lu lo nistoo zee laya tich re xaa Egipto, tich re xaa nzho leen karet nu re xaa nzob tich kabay.
27 Gorzee lee Ches mseli yaa lo nistoo. Nguni yizhyo lee nistoo mbare mzhaal modxa naka yilo. Nu lee re xaa Egipto nzhekla ngxonn per nangarlot ngle xaaya. Nu lee Xaa Tubka Nak mselaw re xaa leen nistoo. 28 Nu leen nistoo mlaw re xaa nrenal xaa leen karet nu re xaa nzob tich kabay nu rese soldad cheen xaa ngok faraón. Nu nik tub xaa namlet gan. 29 Nu lee re xaa Israel mzeeb leen nistoo nu mze xaa lo yo bizh, nu lee nis mzo mod tub bla kwaan nye doo nzo lad li nu lad beg.
30 Nu sbaa lee Xaa Tubka Nak mzo kwaan re xaa Israel mbizh zee, nu lee xaa Israel mlaach lo re xaa Egipto ngut naxtoo roo wri nistoo. 31 Zee mlaach re xaa Israel lo yalnabeyy cheen Xaa Tubka Nak, nel mle xaa gan lo re xaa Egipto. Nu lee re xaa Israel mzheb ngune xaa nu mwii xaa lo Ches, xaa nke zhiin lo xaa.