Re xaabyi, xaa nzhal yilo nak xaa Xaa Tubka Nak
13
Lee Xaa Tubka Nak nzhé lo Ches:2 —Rese gu, xaa Israel, lee xgann gu, xaa gal yilo, gak xaa zaa gu lo na, nel xaa na nak xaa. Lee re xgann gu, xaa yilotlaka gal, nak xaa na nu noka re ma, ma yilotlaka gal, xma na gak ma.
3 Nu Ches nzhé lo re xaa:
—Bselazh gu mbizh ne, mbizh kwaan mloo Xaa Nabeyy gu Egipto, kwaan gro doo yalnabeyy cheen xaa, paro mkee xaa Egipto gu zhiin dubse zhe. Nalzhe nu tubka, zhe ne nik tub be nanzhaalt gaw yat kwaan yo lebadur leen. 4 Re be roo mbizh ne mbee Abiba. 5 Gorna lee Xaa Tubka Nak zaa yizhyo, yizhyo cheen xaa Canaán, xaa Het, xaa Amorreo, xaa Heveo, nu xaa Jebús. Yizhyo ne mcheroo xaa lo re xey be zaa xaa lo re be. Leeya nak tub yizhyo paro nxonn nizh nu mzhin mod nis. Nu nzhaal le be yalni ne mbee ne. 6 Gaw be yat kwaan nanyut lebadur dubse tub gazh mbizh, nu leen mbizh gazh, le be yalni cheen Xaa Tubka Nak. 7 Dubse tub gazh mbizh gaw be yat kwaan nanyut lebadur leen, nu nik tub xaa nzho yezh nanzhaalt yo lebadur garli, nu nixa yat kwaan nzho lebadur leen, dubse xkizhyo gu. 8 Nu mbizh zee yé be lo xinn be: "Le be yalni ne zee selazh be kwaan mle Xaa Tubka Nak, gorna mloo xaa be yizhyo cheen xaa Egipto". 9 Yalni ne gak kwenta tub bde kwaan ke yaa be o lachuzh be nu sbaa selazh be lee Xaa Tubka Nak mloo be yizhyo Egipto kwaan yalngezh cheen xaa. Nu nzhaal gaka tub ley kwaan tubka nii be. 10 Selazh be rese liin mbizh ne nu nzhaal le be yalni ne.
11 &Gorna lee Xaa Tubka Nak zaa yizhyo lo be, kwaan nak cheen re xaa Canaán, nu mod mcheroo xaa lo re xey be, 12 zee nzhaal zaa be xaabyi, xaa gal yilotlaka, lo Xaa Tubka Nak nu re ma mach, ma gal yilotlaka lo re ma. 13 Nu gorna gal tub ngwes, ma yilotlaka, zee nzhaal zaa be tub mbakxiil o tub chib xlugar ngwes, nu cheleeya nazaat be mbakxiil zee tira kiich be yenn ngwes zee yet ma. Per lo re xgaan be, xaa yilo, nzhaal zaa be tub ma xlugar xaa. 14 Leezha gorna nabdizh xinn be lo be nu né xaa: "¿Cho kwaan nak kwaane?" Zee keb be: "Lee Xaa Tubka Nak mloo nu kwaan yalngezh cheen xaa naz yizhyo Egipto gorna bid doo mke nu zhiin baa. 15 Nu gorna lee xaa ngok faraón mle ned lextoo, nu namlaat xaa mroo nu, per lee Xaa Tubka Nak mbit re xgann xaa Egipto, rese xaa ngol yilo, nu noka rese ma ngol yilotlaka lo re ma. Kwaanzee nted be re ma mach, ma ngol yilotlaka lo Xaa Tubka Nak; nu noka xlugar xgaan be, xaa yilotlaka, nted be tub ma." 16 Kwaane gak kwenta nseyn kwaan ke yaa be o lachuzh be, zee selazh be lee Xaa Tubka Nak mloo be yizhyo Egipto kwaan yalngezh cheen xaa.
Lee Xaa Tubka Nak nzha kwaan re xaa Israel
17 Gorna lee xaa ngok faraón mlaa mroo re xaa Israel, zee lee Xaa Tubka Nak nambet xaa naz yizhyo cheen re xaa Filistia, kwaan nzhi gax, nel nzhé Xaa Tubka Nak: "Napa lee xaa Filistia kakeeya yek re xaa Israel nu kazheb xaa nu bare xaa naz Egipto". 18 Kwaanzee lee Xaa Tubka Nak mted xaa naz wen kwaan nzhi roo Nistoo Naxne.
Nu mroo re xaa Israel Egipto kwenta soldad. 19 Noka mbe Ches xchit Che, nel Che mle zee re xaa Israel mcheroo lo Che zee le xaaya. Nu nzhé xaa: "Wlipa lee Xaa Tubka Nak nanlaat be, nu gorna lee kwaane gak, lee gu wee re xchit na nee".