Yalni cheen Paskwa cheen Xaa Tubka Nak
12
Gorna lee Ches nu Aarón nzo Egipto, lee Xaa Tubka Nak nzhé:2 —Lee mbee ne gak tub mbee yilotlaka lo liin lo xaa Israel. 3 Nii gu lo rese xaa Israel: "Zhe chii xchee mbee ne kad tub li gu nzhaal kwey gu tub mbakxiil yeen o tub chib. 4 Chelee re xaa li gu nazyent nu nalet gu gan gaw dub ma, zee nzhaal kwezh gu xaa nzho gax garli gu nu gaw gu ma tuka kwaan lee xaa nu zee kiiz gu baal paro nzho mod gaw xaa. 5 Lee ma gak tub ma mach, ma wen na, nu ma nzho tub liin. Zen gu ma lo xpakxiil gu o lo xchib gu. 6 Nu kochaw gu ma axta zhe chida xche mbee ne. Nu zhe zee kad tub li gu, xaa Israel, gut tub ma zhel yizhyo. 7 Nu zen gu ren cheen ma nu teeb guya roo yoo paro gaw gu ma. 8 Nu zhe zee gaw gu baal kwaan ngeex lo ki nu yat kwaan nanyut lebadur leen, noka gaw gu yix nala. 9 Nu nagawt gu nik tik baal ye nu nixa nankint gaw gu kwaan yeey leen yas sinka yeex dub ma lo ki: yek ma, nii ma nu lextoo ma. 10 Nanzhaalt laa gu nik stika stub mbizh, nu cheleeya lakeya, nzhaal yeka. 11 Snee gaw gu ma: bsii gu lextoo gu, bkee gu xkelyed gu nii gu, nu bzen gu xkag gu kwaan yaa gu, nu gaw gu liger doo, nel leeya nak Xchee cheen Paskwa cheen Xaa Tubka Nak. 12 Lee na ded yaal zee yizhyo cheen xaa Egipto nu gut na rese xgann xaa, xaa yilo, nu re ma ngol yilotlaka. Nu sbaaka luu na lee re xtios xaa Egipto nakanot yalnabeyy, nel na nak Xaa Tubka Nak, néya. 13 Nu lee ren luu, zee ne na paro nzho re gu, nu snee gorna ya na gut na re xaa Egipto, zee nik tub gu nayeta. Nu lach na lo ren zee tira deed na.
14 &Mbizh ne gak tub mbizh non lo gu nu nzhaal le rese xtii gu yalni ne tira, zee selazh xaa kwaan gro doo mle Xaa Tubka Nak; naka tub ley kwaan tira. 15 Gaw gu yat kwaan nanyut lebadur dub tub gazh mbizh, nu leen mbizh yilotlaka, nanzhaalt yo lebadur garli gu. Loka cho xaa gaw yat kwaan nzho lebadur dubse tub gazh mbizh ne, zee koo xaa xaa yezh Israel. 16 Lee mbizh yilo nu lee mbizh gazh, nzhaal zhaal gu nu gool gu lo Xaa Tubka Nak. Nu rop mbizh zee naket gu zhiin, nebse nzho mod dexkwaa gu kwaan gaw gu. 17 Nu le gu yalni cheen yat kwaan nanyut lebadur leen, nel leeka mbizh zee mlo na gu yizhyo Egipto. Nu kozhaw gu nu re dii cheen gu kwaan ngunabeey na gu le gu tira. 18 Gaw gu yat kwaan nanyut lebadur leen mzhel yizhyo zhe chida xchee mbee yilo nu axta mzhel yizhyo zhe galbtub xche mbee yilo. 19 Nu nanzhaalt yo lebadur garli gu dubse tub gazh mbizh ne, nu loka cho xaa gaw yat kwaan nzho lebadur, nzhaal koo xaa xaa yezh Israel, nexa chol xaa zita o xaa yezha. 20 Nagawt gu yat kwaan nzho lebadur leen, nzhaal gaw gu yat kwaan nanzhot lebadur leen re pa nzho gu.
21 Lee Ches ngunabeyy zee yichezh re xaa gol, xaa Israel, nu nzhé xaa:
—Gwa gu kwey gu tub mbakxiil yeen o tub chib gaw rese xaa li gu nu bit gu ma, gaw gu Xchee cheen Paskwa. 22 Nu lee ren nzhaal lake leen tub chee nu zen gu tub manoj yix le hisopo, nu le bsii guya kwaan ren, nu bteeb guya roo yoo, nu nik tub gu naroot gorna zeraka yani yizhyo. 23 Gorna lee Xaa Tubka Nak ded gut re xaa Egipto, gorzee luu ren kwaan mdeeb roo li be nu lee Xaa Tubka Nak dedyo lo yoo ba, nu nalaat xaa ded mandad gut xaa nik tub xaa be. 24 Kozhaw be yalni ne, rese be nu re xtii be tira, nel naka tub ley. 25 Gorna zeeb be leen yizhyo, pa zaa Xaa Tubka Nak lo be, modxa nguné xaa lo be, zee nzhaal le be yalni ne rese liin. 26 Nu snee gorna lee xinn be nabdizh lo be, "¿Cho kwaan nak yalni ne?", 27 nu nzhaal keb be lo xaa: "Nak ma nzaa be nu nted be lo yalni cheen Paskwaa lo Xaa Tubka Nak, leezha mbit xaa re xaa Egipto, nu mdedyo xaa garli re be, xaa nak xaa Israel, xaa nzho Egipto."
Zee lee re xaa Israel mkichxub axta mla lachuzh xaa lo yo nu mbill xaa lo Xaa Tubka Nak.
Yalzi chii ngok yalgut cheen re xaa ngol yilo
28 Zeera ngwa re xaa Israel nu mle xaa modxa nzhé Xaa Tubka Nak lo Ches nu lo Aarón. 29 Wall yaal lee Xaa Tubka Nak mbit rese xaa ngol yilo lo re xaa Egipto. Ngut xgann xaa ngok faraón, xaa yilo lo xaa, xaa zob nabeyy; nu axta rese xaa ngol yilo, xaa nzho lozhyib, nu rese ma yilotlaka. 30 Nu nguxche xaa ngok faraón yaal zee, nu nguxche rese xaa nke zhiin lo xaa ngok faraón nu rese xaa Egipto, nu mbinn doo re xaa nu nales doo nzhak lextoo re xaa nel nik tub yoo namlaket nik tub xaa ngol yilo. 31 Nu leeka yaal zee, lee xaa ngok faraón mxaal xaa yichezh Ches nu Aarón nu nzhé xaa:
—Broo gu yezh cheen na, gu nu re xtii gu, xaa Israel. Zyaa gu, bill gu lo Xaa Tubka Nak modxa né gu lo na. 32 Nu be gu re xma gu modxa né gu. Zyaa gu nu naab gu lo Xaa Tubka Nak kwent cheen na, zee yo wen na.
33 Lee re xaa Egipto mle jwers lo re xaa Israel zoza roo xaa yizhyo Egipto, nel mle xaa xgab rese xaa yilo yet. 34 Re xaa Israel mbe xkoob gorna zeraka yo lebadur leena, nu dub yalag mchal meya kwaan bayat zee mkee meya tich me. 35 Nu mle re xaa Israel modxa nzhé Ches, nu ngunaab xaa kwaan nak plat nu kwaan nak or nu ler lo re xaa Egipto. 36 Lee Xaa Tubka Nak mle wen lextoo re xaa Egipto, zee mle wen xaa lo re xaa Israel, zee mzaa xaa rese kwaan ngunaab xaa. Sbaa lee re xaa Israel mbe rese kwaan non Egipto.
Re xaa Israel mroo yizhyo Egipto
37 Lee re xaa Israel mze kwaan nii. Mroo xaa yezh Ramesés nu mzhin xaa axta Sucot. Kan tub xoop gayoo mil xaabyi nu namlabt xaa re madwin nu re ngwnaa. 38 Zyen xaa nya kwaan lee xaa, nu noka nya xaa stub yezh. Noka zyen doo xma xaa nya kwaan lee xaa. 39 Nu mkee me yat kwaan koob kwaan nangut lebadur leen, kwaan mbe re me Egipto nel namletra me gan ngkee me yat gorna mloo xaa xaa Egipto.
40 Re xaa Israel ngu Egipto tap gayoo galbchii liin. 41 Nu leeka mbizh kwaan nguxoob tap gayoo galbchii liin, lee re xaa Israel mroo yizhyo Egipto mod nak re xtii xaa. 42 Lee yaal zee lee Xaa Tubka Nak mkanap re xaa Israel nu mloo xaa re xaa Egipto. Kwaanzee lee yaal ne nzhaal kozhaw re dii cheen Israel lo xaa.
43 Lee Xaa Tubka Nak nzhé lo Ches nu lo Aarón:
—Kwaane nak ley cheen Xchee cheen Paskwa kwaan nabeyy na. Nik tub xaa nkanze nagarlot gaw ma. 44 Xaa mzi gu kwaan demi nzho mod gaw ma, nebse chelee xaa ngu xaa beey cheen gu Israel. 45 Xaa zit, xaa nzho xkizhyo gu, nu xaa nke zhiin lo gu, nyent mod gaw ma. 46 Gaw gu ma leen garli gu, nu naweet gu ma naz jwer. Nixa nakiixt gu zhit cheen ma. 47 Rese xaa Israel snee nzhaal kozhawa. 48 Kwaanzee chelee tub xaa zit nzho lo gu, nzhekla gaw Xchee cheen Paskwa lo na, Xaa Tubka Nak, nzhaal yilotlaka yo xaa beey cheen gu xaa Israel rese xaabyi garli xaa, zeera nzho mod le xaaya, zee gak xaa mod tub xaa ngol lazh gu. Nu nik tub xaa nagarlot gaw xchee cheen Paskwa, chelee xaa nanzhot xaa beey. 49 Leeka mod nle re xaa xtii gu, xaa Israel, nzhaal le re xaa zit, xaa nzho lo re gu.