Olwaandiko Lwo Kubaanza Lwa
Yohana
Obweébeembezi
Enyaandiko isatu za Yohana tizikusoomboola izíina lyo omwaandiki waázo, náho neesana oóti nka nikwo ni Yohana, omwaandiki we Empola Nzima ya Yohana ne echitabu cho Okusuululilwa, niwe ogwo akaandika enyaandiko éezi. Yohana akaandika enyaandiko éezi obuchilo naatuula omu muzihwa gwa Efeso omuunsi ya Asia. Ebilo éebi echaalo éecho nicheétwa Buturuki. Omu nyaandiko éezi, omwaandiki kaálikugaamba “íichwe,” naayegaamba weényini hamo ne entumwa bazeenzíbe.
Obuchilo Yohana akaandika enyaandiko éezi, akaba yaákokweele. Titwíina obweétegeleza habwo óobwo obuchilo bwo kwaandika, náho ekaba ahagáti yo omwaaka 85-95 yaáhiingwiile ya Kristu kuzaalwa.
Omu nyaandiko éezi isatu omwaandiki naayaandikila Abakristu áabo bakaba nibabugana omu makelezia bunaanka bunaanka omu byaalo bya Asia. Yohana akabeenda bwooli no omu nyaandiko éezi nabeéta “abaana baanze” (1 Yohana 2:1).
Omu olwaandiko lwa mbele, Yohana naayaandikila Abakristu abone kubaha obuhanuuzi habwo óobwo obulami bwe Echikristu. Kaandi naasohoza ebikaamo habwo áago ameégeso ge ebisuba. Hakaba haliho abeégesa bunaanka áabo bakaba baálekileho amakelezia gáabo, baaba nibazoongoloka omu chaalo éecho no kusuugaanisa ameégeso ge ebisuba. Obusáago bwa áago, Yohana naakomeenteleza amazima go okwiikiliza ge Echikristu, abone kubagumisa no kubasemeleza abaantu omu kwiikiliza. Omu meégeso goómwe naahoóyela habwo kutúula ne ngoonzi, kweéganyila, kusiimbahalila kusíinga ebiheno, kutúula obulami óobwo obulikumusemeleza Múungu, na habwo óobwo obulami bwa buchiile.