Ebikaamo Habwa Abahíte Abazilwa
5
1 Íimwe abahíte, mumpuliilize kuzima! Muchule no kuteela empámo zo obuzune habwo olwaágalalo oluleeza kubagwamo. 2 Obuhite bwaanyu tibukugasa buli nke ebiintu ebizuunzile, nabyo ebizwáalo byaanyu byo obukaani biina amahulu biliilwa ne embuungu. 3 Ezaháabu ne efeeza zéenyu zaáchelebile, no obuchelebe óobwo nibubasiinza nko óokwo mulikukozesa kubi obuhite bwaanyu. Omu bilo éebi byo omuhelo, mweébikiile obuhite bwaanyu bwóona, náho emibili yaanyu neliibwa nko omulilo óokwo gusiingaalicha buli chiintu.4 Muhuliilíze óokwo abapagasi baanyu nibanuunza! Babakoliile emilimo omu nsaambo zéenyu, náho mubanyagile obutabaha empeéla zaabo. Na áabo ababagesiize emyéezo, nabo nibadaáya, ne empámo záabo zaahuliilwe na Múungu, Omukáma wa Abalwaanila Ngomaa. 5 Nimutuula no kunulilwa obuhite bwaanyu buháango omuunsi éezi. Mweegomochize emiganya yaanyu habwe echilo cho omuchwaáziiko, nke ebituungaánwa ebili ensázwa éebyo ebyaaloongizwe kubáagwa. 6 Mulamwiile omuchwaáziiko no kwiita abaantu abeena amazima, nabo tibalabeele na kazeendele ko kubanuga íimwe.
Mube Nimweeyomeleza Kuhicha Obuchilo Omukáma Yeézu Alisuba
7 Ha bwéecho, badugu baanze omuli Kristu, mube nimweeyomeleza kuhicha obuchilo Omukáma Yeézu alisuba. Léeba omulimi, nka nikwo óokwo aliindilila emimeloye yi itaka esohoze emyeezo esemiile. Ayeyomeleza omu kuliindilila, kuhicha obuchilo óobwo alabonesa enzula zo kubaanza ne zo omuheleeluko.
8 Bityo neemwe kaandi, mweeyomeleze no kutamo omuganya, habwo kuba kusuba kwo Omukáma Yeézu kweéliliza. 9 Badugu baanze, mutaákuba nimweedugulumila, mutaákwiiza mkachwaáziikwa. Leeba! Ngugu Omulamuzi ayimeeliile aha chisasi cho olwiizi lwaawe.
10 Badugu baanze, kamulayeenda kuleeba omugani gwo okweéyomeleza omu byaágalazo, muleebe ababáasi abaabele nibagaámba ahi izíina lyo Omukáma Múungu. 11 Áabo bakeeyomeleza, nitubeeta abeena omugisa. Mwaáhuliize amagaambo áago agamugwiilemo Ayubu, na nka nikwo óokwo akeeyomeleza. Na nimumanya nka nikwo óokwo Omukáma Múungu akamukolela amazima ha muheleeluko. b Áago góona no habwo kuba Omukáma Múungu ayizwiile echiganyizi ne embabazi mpaango.
12 Badugu baanze, kusaaga góona, mutaákulahila habwi igulu, habwe éensi nali habwe chiintu choóna chóona éecho. Obuchilo nimuhooya na oóndi, “éego” yaanyu eébe éego, na “mmahi” yaanyu eébe mmahi. c Kamulikuba mtakozile mútyo, nimuchwaázikwa.
Esala Yo Okwiikiliza
13 Ngási, heena omuuntu omuli íimwe óogwo alikwaagalala? Mbweenu, naayeendelwa asabe Múungu. Nali heena omuuntu óogwo alikunulilwa? Mbweenu, naayeendelwa azine enzina zo kusiíngiza. 14 Ngási, heena omulwéele omuli íimwe? Mbweenu, óogwo naayeendelwa ayete abanyaampala be ekelezia, beéze bamusabe no kumusiiga amazuta ahi izíina lyo Omukáma Yeézu. 15 No obuchilo nibamusabila aha okwiikiliza, nachila. Omukáma Yeézu namwiimucha, na keelaaba akaba akozile ebiheno, naganyilwa. 16 Ha bwéecho, mube nimweegaámba ebiheno byéenyu íimwe nyini, no kusabilana ahali Múungu, niho mulaachízwa amalwáala géenyu. Okusaba kwo omuuntu wa amazima omuméeso ga Múungu kwiina amagala na nikukola emilimo.
17 Omubáasi Eliya, akaba ali omuuntu nke íichwe. Weényini akasaba aha chifu nka nikwo enzula etagwa omuunsi ya Iziraeli, ne enzula ekoosa telagwiile omuunsi aha miaka isatu na améezi mukáaga. d 18 Niho kaandi yaámusaba Múungu nka nikwo enzula eégwe, male ni igulu lyaasohoza enzula, eba yaagwa, ne éensi esohoza omwéezo. e
19 Badugu baanze, oómo omuli íimwe kaálikutumaanga akaba hala na amazima, mala oóndi akahicha kaandi kubona kumuhabula akamusubya omu muháanda gwa amazima, 20 musoombookelwe nka nikwo, óogwo alikumugalucha omuheni kuluga omu mihaanda yo kweébeeha kwoómwe, naába yaamuchuúngula kuluga omu lufu, ne ebiheno byoómwe biinzi nibiganyilwa.