Olwaandiko Lwa Paulo Hali
Filemoni
Obweébeembezi Bwe Echitabu
Olwaandiko óolu, lwaandikilwe ne entumwa Paulo, aha muuntu ogwo akaba naayetwa Filemoni. Nebonekana nka nikwo Filemoni akaba naatuúla omumuzihwa gwa Kolosai (Abakolosai 4:9). Akaba ali omuhíte, na kaandi akaba ayina abazaana, weényini akaba ali Omukristu, no omuunzu yoómwe niho baabele bakoba Abakristu. Paulo na Filemoni bakaba bali abanywaani bazima.
Paulo akaandika olwaandiko óolu obuchilo ali omu ibohelo omumuzihwa gwo okwo Ruumi, omumwaaka gwa 62 guti kuluga kuzaalwa kwa Kristu. Akaandika olwaandiko óolu habwo omuzaana oómo wo mwa Filemoni, ogwo akaba ayetwa Onesimo. Nichibonekana nka nikwo omuzaana ogwo akatoloka kuluga owa Filemoni. Chilo chimo yaabugana na Paulo. Paulo yaámweegesa Empola Nzima ha bwa Kristu Yeézu, Onesimo yeékiliza mala yaámuhiindukila Mungu.
Ha buchilo obwo, omuzaana ogwo akaba atoloka kuluga owa mukamawe, kabaabele bamukwaata bakaba bamuchwaáziika. Mbweenu Paulo akaba naamusiindika Onesimo owa mukamawe ali Filemoni. Niho Paulo kumuha Onesimo olwaandiko amutwaálile Filemoni. Omu lwaandiko olwo Paulo akamusaba Filemoni amuzilile engoonzi nko Omukristu muzeenzíwe.