Olwaandiko Lwa Paulo Hali
Filemoni
Empola
1
1 Iinye Paulo, embóhe habwo kwoólekeelela Empola Nzima habwa Yeézu Kristu, niinkwaandikila iiwe Filemoni. Iinye na mudugu wéetu Timoteo, nitukwaangalucha iiwe engaanzi yeetu, no omukózi muzeenzi wéetu. 2 Nitumwaangalucha na munyaányechwe Afia, no omulwaani muzeenzi wéetu Arikipo, hamo na abeekiliza bóona áabo abalikweékobya omúka yaawe.3 Embabazi no buhóolo kuluga hali Isiichwe Múungu na Omukáma Yeézu Kristu zibe hamo neemwe.
Okusiima No Okusaba Kwa Paulo Habwa Filemoni
4 Buli kukusabila, mba niimmusiima Múungu, 5 habwo kuba niinhulila nka nikwo noozeendelela kumweésiga Omukáma Yeézu no kuzila engoonzi ha abatakatíifu bóona. 6 Okwiikiliza kwáawe kukukozile oóbe no obumo na abaandi. Óobu, niinsaba nka nikwo, obumo óobwo bukole emilimo omuliiwe ha kumanya amazima góona, áago tulikweendelwa kukola omuli Yeézu Kristu. 7 Mweene wéetu, engoonzi zaawe ziimbonesize amanulilwa maháango no kuungumya muno, habwo kuba osemeliize emiganya ya abatakatíifu.
Paulo Naasaba Filemoni Amuganyile Onesimo
8 Habwéecho, noolu nyina obuzizi kuluga ahali Kristu bwo kukulagila éecho olikweendelwa kukola, tiínkukola ntyo. 9 Náho, habwe engoonzi mbweene ni kuzima nkusabe, iinye Paulo omunyaampala, kaandi embóhe habwa Kristu Yeézu. 10 Niinkusaba echigaambo chimo, habwa Onesimo.a Weényini ni nka mutábani waanze, neenye ndi nke iíse, habwo kuba nkamuzaala abone kumwiíkiliza Yeézu Kristu, obuchilo naabele ndyo omwiibohelo. 11 Aaho olwaámbele, weényini akaba atakukugasa, náho óobu naakugasa iiwe bwooli, noolu neenye.
12 Óobu niimmusubya hali iiwe, weényini niwe enfula yaanze. 13 Kaandi naakaáyeenzile ayikale neenye, kuba abone omwáanya gwo kuumpweela nka nikwo iiwe okwo wakumpweéliile, obuchilo ndyo omwiibohelo habwe Empola Nzima. 14 Náho tiínkweenda kukola echigaambo choóna chóona iiwe otéena kwiikiliza. Tiínkweenda kukuhatika nka nikwo ompweele, náho niinyeénda okole ebizima habwe engoonzi zaawe.
15 Lúundi, Onesimo akaluga owaáwe ha mwáanya muche, kuba oóbe náze kaandi buchiile. 16 Kubaandiza óobu, weényini tí nko omuhalila kaandi hali iiwe, náho weényini asaagile omuhalila, na ni mudugu wéetu we engoonzi. Iinye niimweénda bwooli, neewe noomweénda bwooli kusaagáho, byoona nko omuuntu na nko omudugu aha Mukáma Yeézu.
17 Mbweenu nu, kabilaaba noleeba nka nikwo iinye nyina obumo neewe, omweenaánkule óogwo nkokwo waakunyinaánkwiile iinye. 18 Na kabilaaba akakuhenela echigaambo choóna chóona, nali noomutoónga echiintu, otoónge iinye. 19 Iinye nyini Paulo, naáyaandika kwo omukóno gwáanze nka nikwo, niinkuliha. Tiínkweenda kukugaambila nka nikwo niinkutoónga, habwo kuba kwiingana no kwoólekeelela kwaanze, iiwe okachuúngulwa. 20 Oobu, mudugu waanze, onkuúndile echigaambo éechi, ha bwo Omukáma Yeézu. Nuliza omuganya gwáanze nka nikwo omudugu omuli Kristu yaakukozile.
21 Niinkwaandikila aga, hakuba niinsoombookelwa nka nikwo, nooyikiliza. Kaandi niinsoombookelwa nka nikwo, habwi isima lyaawe, nookola kusaaga okwo naasaba.
22 Hamo na áago, ondoongeze ahokwiikala, habwo kuba niintegeza nka nikwo aha kusaba kwéenyu, Múungu naanzuna mbone kwiizayo óokwo.
Empola Yo Kulaga