Kukola Ebikolwa Bizima Ha Baantu Bóona
3
1 Obe noobezukiza abaantu nka nikwo, babe ni isima no obukoondooki ha batwaáliliza na ha abatégeki. Na babe bweémi kukola buli chigaambo echizima. 2 Kaandi obagaambile nka nikwo, batamuzuma omuuntu weéna wéena, bataákuba abalwaani, babe abateékaani abalikweenda obuhóolo, na babe abalikweécheesha ha abaantu bóona.3 Aaho kala, obuchilo tukaba tuchaali kumwiíkiliza Yeézu, íichwe néechwe tukaba tuli abafweéla, abagome, kaandi twaábeéhilwe. Tukaba tuli abahálila be etuúnku mbi ze éensi no oluhagali hagali olwa bunaanka bunaanka. Obulami bwéetu bukaba buli bwo kukola amabi ni ichubi. Abaantu bakaba nibatutamwa, neechwe tukaba nitubatamwa. 4 “Náho, Múungu Omuchuúnguzi wéetu, yaáyolekile nka nikwo weényini ni muzima na naayeénda abaantu bwooli, yaátuchuúngula, 5 tiyo habwo kuba, íichwe tukakola echigaambo choóna chóona echizima, náho na habwe echiganyizi choómwe. Akatuchuúngula aha muhaanda gwo kutwéeza ebiheno byéetu, omu kutuzaala okwa kabili. Kaandi atuheele obulami obusha ha muhaanda gwo Omwooyo Mutakatíifu. 6 Múungu akatuseesela Omwooyo Mutakatíifu ha bwiinzi, kulabila hali Yeézu Kristu Omuchuúnguzi wéetu, 7 na habwo kuba twaámazile kupeetwa kuba abeésigwa ha bwe embabazi zoómwe, óobu nitutegeza kuhuungula obulami bwa buchiile.”
8 Obusoomboozi óobu no bwo kweésigwa. Na ha bwa áago góona, niinyeénda íiwe ogakomeenteleze bwooli, kuba áabo abamwiíkilize Múungu bataákuleka kuba no bweeyomeleza bwo kukola ebizima. Amagaambo áago ni mazima, kaandi geena omugaso ha baantu bóona. 9 Náho, oyelige no obuhakani bwe echisilu, no kweébuga ha mazíina ga baguúku, ne endwaana ne emyeéhakaniso habwe ebilagilo bya Musa. Áago góona tigéena mugaso gwoóna gwóona. 10 Omuuntu óogwo alikuteélanisa abaantu, omuháne entulo ya mbele, kaandi omuháne entulo ya kabili. Kábilaaba ataákuhulila, mutaatuluzane náze butúnu. 11 Waámanya nka nikwo, omuuntu nko óogwo yaálekile amazima, naazeendelela kukola ebiheno. Weényini naayechwaazikila weénka.
Empola zo Kulaga
12 Naalamula kuzeenda kwiikala omu chaalo cho óokwo Nikopoli, omubuchilo bwe embého. Náho, nniimusiindika Aritema, nali Tikiko okwo owaáwe. Kaálahikayo óokwo, iiwe laanguha kwiiza Nikopoli tubonane. 13 Ozile obweeyomeleza kuhweela Zena, óogwo omutoóngani, na Apóolo. Obáhe byoona byo kubazuna omumuháanda, bataákubulwa kaantu. 14 Abeekiliza bazeenzi béetu nabo, beéyege kukola ebizima, bahiche kusuumbuusa abaantu éebyo okubagasa. Kabalaakola batyo, obulami bwáabo nibuzila omugaso.
15 Abaantu bóona abali hamo neenye áaha, nibakwaangalucha. Mbweenu obu neewe, obaángaluche abeekiliza abe engoonzi bóona. Embabazi ya Múungu eébe hamo neemwe mwéena.