Ameégeso Ga Amazima
2
1 Óobu íiwe Tito, obe nooyegesa abaantu amagaambo áago agalikuzeendana na ameégeso ga amazima. 2 Obe nooyegesa abanyaampala, bazile okwiibalilila, isima, abeena kweétegeeleza, bakwaatilile kuzima ameégeso go okwiikiliza kwéetu, bazile engoonzi za amazima habaandi, na bagime omu kweéyomeleza.3 Bityo nyini, na abakeékulu nabo, obeégese babe na akazeendele áako akalikumukuza Múungu. Bataákuba abanyeegani, abatamiizi, náho babe nibeégesa amazima, 4 kuba babone kweégesa abakazi abahalákazi, kweenda beebabo na abaana báabo. 5 Kaandi, babeegese babe no okweétegeeleza, bazile emiganya elikweela, bakole kuluunzi emilimo omuunzu záabo, babe ne entuungwa nzima, na abalikubazilila isima beebabo. Beegeswe bazile batyo, kuba batachikola echigaambo cha Múungu kugaywa.
6 Bityo nyini, ha abahalákazi na abasigazi, obahane babe no okwiibalilila. 7 Neewe, nooyeendelwa obe ga nookola ebizima hali buli kaantu koona, obóne kuboóleka emanyiso zo kweéyegaho. No omu meégeso gaawe, obe ga nooyolecha amazima ni isima. 8 Ameégeso gaawe, gabe ga mazima áago agatakunugwa na abaantu, ha kuba bóona abalayeenda kuganuga, bakolwe ensoni, habwo kuba nibabulwa echigaambo cho kutunyeega.
9 Abahálila nabo, obeégese kukoondoókela abakáma báabo, babe nibabanuliza omumagaambo góona, batahakana nabo. 10 Batabeébila, náho babe abeesigwa hali byoona, emilimo yáabo yóona ebone kukola abaandi kunulilwa Ameégeso ga Múungu Omuchuúnguzi wéetu.
11 Obe nooyegesa amagaambo áago, ha kuba embabazi ya Múungu éezo elikuchuúngula abaantu bóona yaáchiingulilwe. 12 Embabazi éezo, neetweegesa kwáanga obuzilwa ne etuúnku ze éensi. Habwéecho, obuchilo tuli omuunsi éezi tube no okweébalilila, tube ne entuungwa nzima, na tube abalikumugomokela Múungu. 13 Twiikale tútyo, obuchilo nitutegeza itegezo lyo omugisa, lyo kusuba kwa Yeézu Kristu. Echilo éecho, alaábonwa omu ikuzo lyoómwe. Weényini niwe Múungu wéetu Mukúlu na niwe Omuchuúnguzi wéetu. 14 Weényini akeésohoza kufwa habwa íichwe, abone kutuchuúngula, tweekala tweéyagalwiile kuluga omubiheno byóona, no kutwéeza, tubone kuba abaantu boómwe ba amazima, áabo abalikweéyemaho hachihika kukola ebizima.
15 Mbweenu óobu, okozese obuzizi bwaawe omukweégesa áago góona, omu kugumisa no omu kuhana abaantu. Habwéecho, oteekiliza kugaywa no omuuntu weéna wéena.