Olwaandiko lwa Paulo ahali
Tito
Enyaángalucha Ya Paulo hali Tito
1
1 Olwaandiko óolu niinkwaandikila iinye Paulo, omuhálila wa Múungu, ne entumwa wa Yeézu Kristu. Nkatumwa habwo kumanyisa abaantu abatooziibwe na Múungu, babone kumwiíkiliza na kugasoombookelwa amazima habwa Kristu. Amazima áago, nigabooleka kugomokela Múungu, 2 na nigabaha itegezo lyo obulami bwa buchiile. Weényini Múungu akatweésagiza obulami óobwo, buluga butakabaandize obuchilo, nawe tazila bisuba. 3 Mbweenu habuchilo bwoomwe alamwiile kwoóleka butúnu Empola yoómwe Nzima. Nawe Múungu Omuchuúnguzi wéetu akalagila nkokwo, nhaábwe emilimo yo kulaanga empola éezo. 4 Niinkwaandikila íiwe Tito, mwaana waanze wa amazima omu kwiikiliza óokwo tulikukoba hamo. Embabazi no obuhóolo kuluga hali Múungu Táata na hali Kristu Yeézu Omuchuúnguzi wéetu, zibe hamo neewe.Emilimo Ya Tito Omwiiziinga Lya Kirete
5 Kanaalugileyo óokwo Kirete, nkakusaba iiwe kusigalilayo obóne kutaho kuzima áago amagaambo agáandi agasigeele, hamo no kutóoza abanyaampala be ekelezia omuli buli muzihwa, nkokwo naakwoolekeeliile.
6 Omunyaampala wa ekelezia, nayeendelwa kuba muuntu óogwo atéena kutuuzilwa. Aábe iíba wo omukazi oómo weénka,a abaana boómwe babe abeekilizab, bataákuba abazilwa nali abatakukoondookela. 7 Weényini niwe omwiímeelelezi, naayeendelwa aábe omuuntu óogwo atakutuuzilwa, ha kuba aheelwe emilimo ya Múungu. Ataákuba omuuntu óogu ayina ihagi, atéena biniga, atali omutamiizi, atali omusaámbe, kaandi atéena etuúnku mbi yo kubonesa empilya. 8 Náho aábe omufula, óogwo naasemelezwa na mazima, wo okweétegeeleza, we entuungwa nzima, omutakatíifu, owe okweetegeka. 9 Aábe naakwaáta kuzima amagaambo ga amazima habwa Kristu Yeézu, nka nikwo yayegesiibwe. Aaho niho, yakaáhicha kubakomeeza abaantu aha meégeso áago aga amazima, no kubasiinga áabo abalikugahinyooza.
10 Niinkugaambila nntyo, ha kuba áaho Kirete, baliho abaantu béenzi abo abatali abakoondooki, boónyini nibagaámba empola eziteena na mugaso, kaandi na ababéehi, muno muno na áabo abalugiiliile omu diini yáabo ye Echiyahudi. Abo baantu ni lwaampaka obaángile kweégesa, 11 ha kuba nibabahabisa abaantu omumazu meenzi. Nibolekelela empola éezo zitakuhikiililwa kweégeswa, babone kubonesa empilya zo obuhwaahwa. 12 Aaho kala, akaba aliho omubáasi oómo, óogwo mubáasi nawe akaba ali Omukirete. Weényini akagaamba aáti, “Abakirete na abateezi be ebisuba ebilo byoona, baliho nke enyameéswa eziluluhile, beena omuhaánka, kaandi na abaléenga!” 13 Okwaátula óokwo no kwa mazima. Habwéecho, abaantu nka abo, obe nobakaama ha cháaha, obóne kubazuna babone kukomeela ha bwa Ameégeso ga amazima. 14 Baléke kweétegeeleza kaandi emigani za Abayahudi ezitaázilamo na mugaso, ne ebilagilo bya abaantu kwoónka áabo abalekile amazima.
15 Mbweenu, musoomboókelwe nka nikwo, ha abaantu abeena omwooyo gulikweela omuméeso ga Múungu, ebiintu byoona, byeelízwe ti bilofo. Náho, ha abaantu abalofo na abatakumwiíkiliza Múungu, ebiintu byoona omuli boónyini ne ebilofo, ha kuba ebiteékuzo byáabo ne emiganya yáabo, eyizwiile obulofo. 16 Boónyini nibagaámba nkokwo nibamusoomboókelwa Múungu, náho ebikolwa byáabo nibyooleka nka nikwo nibamwaánga. Abaantu áabo nibatamisa, na tibakumukoondookela, tibakugasa ha chigaambo choóna chóona echizima.