Okunywaana Ne Ensi Kuba Obubisa Na Múungu
4
1 Óobu, enkuungana ne endwaana éezo ezili omuli íimwe, nimusoomboókelwa nka nikwo entabuko yaazo neelugiilila nkáhi? Nibiluga omuntuúnku zéenyu eza ameelu éezo ezilikusiíngaangana omuli íimwe. 2 Kamulikuba ne etuúnku ye echiintu bunaanka, náho nimubulwa kuchibonesa, muli buligiligi kwiita. Kamulikuba nimukwaátwa ni ichubi habwe echiintu bunaanka, náho mutéena omuháanda gwo kuchibonesa, nimuzogootana no kulwaana. Timukubonesa ebiintu éebyo nimweénda, habwo kuba timukumuneémbelela Múungu! 3 Nóobu obuchilo óobwo nimusaba, timukubonesa, habwo kuba nimusaba habwa akaligile kábi, mubóne kubikolesa éebyo mulikweenda habwa ameelu géenyu.4 Íimwe abasiihani!a Timukusombookelwa nka nikwo kuba munywáani we éensi éezi, nikwo kuba omubisa wa Múungu? Ha bwéecho, buli óogwo alikuloonda kuba munywáani we éensi éezi, niho aba ayekozile kuba omubisa wa Múungu. 5 Mbweenu, nimuzila nka nikwo chaandikilwe busa omu Maandiko Matakatíifu nka nikwo, omwooyo óogwo Múungu akata omuli ichwe, gutuligila kuhika kutububila.b 6 Náho, embabazi éezo tulikuhaabwa na Múungu ni mpáango bwooli. Ha bwéecho eyaandikilwe omu Maandiko Matakatíifu nka nikwo,
“Múungu abanuga áabo abalikweésiingiza,
náho abachulezi, ababonesa embabazi.” c
7 Mbweenu, mube nimumukoondookela Múungu. Náho mube nimulyaánga Izimu Elikúlu, niho lilabeéluka. 8 Mube nimumwiililila Múungu, niho náwe alabeelilila. Íimwe abeena ebiheno, mweéyeze emyooyo yeenyu nko omuuntu alikweéyeza engalo. Íimwe abeena ebihika bibili, muhule ebiteekuzo byaanyu bíbi na mukole ebiteekuzo ebizima. d 9 Muhuliilíze obusuungu habwo kuba obubi bwaanyu, muchule omu kubolooga. Kuseka kwéenyu kuhiinduke kube okuchula, no okunulilwa kwéenyu kuhiinduke kube kuzuzubalililwa. 10 Mweécheeshe omuméeso go Omukáma Múungu, náwe alaábakuza.
Mutaákuchwaaziika Abáandi
11 Badugu baanze omuli Kristu, mutaákuba nimunyeegana. Buli muuntu óogwo alikunyeega muzeenzíwe, niho naába ayaagaya ebilagilo bya Múungu. Na buli óogwo alikumuchwaáziika muzeenzíwe, niho naába achwaaziikile echilagilo cha Múungu. Náho obuchilo óobwo olikuchwaáziika ebilagilo, niho otakukoondokela ebilagilo, náho oyekozile kuba omulamuzi we ebilagilo. 12 Múungu weényini niwe ataho ebilagilo, na niwe omulamuzi. Weényini niwe yaakaáhicha kuchuúngula nali kusikiiza. Náho iiwe oli oóha kuhicha kumuchwaáziika muzeenzi waawe?
Mutaákuba Nimweesiingiza Habwa Nyeéncha
13 Óobu, mumpuliilize kuzima íimwe áabo mulikugaámba muti, “Leélo nali nyeéncha, nituzila oluzeendo kuzeenda omu iboma bunaanka. Nitutuúlayo óokwo omwaaka gwóona, nitutuundayo isúluza lyéetu no kubonesayo omugaso.” 14 Náho íimwe timukusombookelwa áago agalaabagwaamo nyeéncha! Obulami bwéenyu ni chiíha? Ngási obulami ti nko olwóoya, niluloleenkana aha mwáanya muche kwoónka, niho ahonyini nigubula. 15 Nimweendelwa mube nimugaámba muti, “Omukáma Kaálayeenda, tulaaba tuli abalame na nitukola éechi nali éecho.” 16 Náho íimwe, nimweebuga no kweésiingiza habwo kweétoonganila kwaanyu. Okweébuga okuli kuti ni kubi. 17 Mbweenu, omuuntu weéna wéena óogwo alikusombookelwa ebizima éebyo alikweendelwa abikole, náho akabula kubikola, óogwo niwe alikukola ebiheno.