Olulimi
3
1 Badugu baanze omuli Kristu, omuli íimwe mtaákubamo abeégesa béenzi, habwo kuba nimusoomboókelwa nka nikwo Múungu alyaatuchwaaziika íichwe abeégesa kusaaga abaantu abáandi. 2 Na mazima nka nikwo, abaantu bóona baba nibahena omu muháanda bunaanka bunaanka. Keelaaba omuuntu weéna wéena takuhaba aha kafumoolele koómwe, óogwo niwe omuuntu óogwo akobile, kaandi naahicha kugwaángila omubili gwoómwe.3 Muleebe, nitutaho amachoolelo aha minwa ye efaláasi, obuchilo nituzihatika efaláasi zitukondoókele, Tútyo nituhiindula emibili yaázo yóona. 4 Kaandi muleebe obwaato nabwo, nóobu buli buháango bwooli, na nibutwaalwa no omuyaga gwe echiihule, náho buchoolwa no olusukáani luche bwooli, mala buzeenda hoóna hóona hi bulikweélekwa no omugobi, buzeende. 5 Bityo nyini olulimi nalwo no oluziingo luche aha omubili, náho niluhicha kumweésiga amagaambo maháango bwooli. Leeba nka nikwo óokwo omulilo muche gwoocha no kusikiiza echibila chiháango! 6 Bityo, olulimi nalwo ni nko omulilo, lwiizwiile obuzilwa bwóona. Nóobu olulimi luli oluziingo lumo kwoónka omu mubili, náho nilusugaanisa obuzilwa aha muuntu wéena, no kusikiiza obulami bwoómwe bwóona, na lweényini nilusikiizwa omulyoongoola lyo omulilo gwa kuzimu.
7 Abaantu abalikuhicha kutuunga enyameéswa za buli lugaanda zóona, ne enyonyi, ne enzóka, ne ebihaángwa byóona byo omu enziba. 8 Náho tihaliho omuuntu óogwo yaakaáhicha kulweemaho olulimi. Mazima olulimi ni lubi, tilukutégekwa, na nilwiita nko obulogo.
9 Nitugaambisa olulimi habwo kumukúza Omukáma Múungu, Isiichwe. Náho nitugaambisa olulimi óolwo nyini habwo kuchéena abaantu áabo Múungu ahaangile habwa akasusanile koómwe. 10 Kuluga omumunwa óogwo nyini, nimwo galuga amagaambo go kufuuhwa, na go kuchéena. Badugu baanze, áago tigakweendelwa gabe gatyo. 11 Tíhaliho enzweelo éezo esohoza meenzi go omuta na ameenzi go omwoonyo! 12 Badugu baanze, omuti gwo omutíini niguhicha kuzáala amagoomba ge emizeituni? Nali omuti gwe emizabibu niguhicha kuzáala amagoomba go omutíini? Mbweenu, nóobu enzweelo ya meenzi go omwóonyo tekuhicha kusohoza ameenzi go omuta.
Amasala Ga Mazima Galuga Hali Múungu
13 No oóha omuli íimwe óogwo ayina amasala no obweétegeeleza? Mbweenu, ayoleke aátyo habwa akazeendele koómwe kaluunzi, kunu naakola ebikolwa ebizima omu kuchuleela óokwo kulugiilila omu masala.
14 Náho kamulaaba mwiina ichubi lyo kunigahala, no olwaango aha miganya yéenyu, mutaákweesiima nka nikwo mwíina amasala, ne ebisuba kwoónka. 15 Amasala ga akazeendele áako, tikakuluga hali Múungu, náho na amasala ge éensi, ni mábi na agalikuluga ahi Izimu Elikúlu. 16 Hoóna hóona áaho heena ichubi no olwaango, niho heena omusaambo na ebiheno bya buli lugaanda.
17 Náho, amasala áago agalikuluga hali Múungu, hakubaanza ni maluunzi, kaandi na ageene obuhóolo, na ageene buchuleezi, gahuliliza abaantu abáandi, na ageene echiganyizi chiháango na agalikusohoza ebikolwa ebizima biinzi, na etéena bweendezi nali atéena obugóbya. 18 Abaantu abazila obuhóolo, babiba embibo yo obuhóolo, niho bagesa entúungwa nzima.