Mutabatóla Abahabi
2
1 Badugu baanze, habwo kuba mumwiikiliize Yeézu Kristu, Omukáma wéetu owi ikuzo, mutaákuzila itóla omubaantu. 2 Tugaámbe nka nikwo, omuuntu óogwo ayechumile ebizwáalo biluunzi ne empeto ye ezaháabu aha lukumu, nataaha omu isomelo lyéenyu. Male omuuntu oóndi, omuhabi óogwo azwéele emyéenda eteemukile, náwe akataahámo. 3 Niho, nimumunyegeza óogwo ayechumile ebizwáalo biluunzi habwo kumuha isima, nimumugaambila nka nikwo, “Iiwe oikala áaha, niho haluunzi.” Náho omuhabi óogwo, mwaamugaambila nka nikwo, “Iiwe oyemeelele áaho,” nali “Oyikále ahaansi áaha omumagulu gaanze.” 4 Ngási! Timukuleeba nka nikwo nimweetóla íimwe nyini? Timukuleeba nka nikwo mwaabeele abalamuzi habwe biteekuzo bibi ebitahikile?5 Badugu baanze enfula, mumpuliilize kuzima. Ngási Múungu tatoolize abahabi be éensi éezi, abone kubazila abahíte omu kwiikiliza? Ngási ta abahabi nibo baleenaankula obukáma óobwo weényini yalageene hali áabo balikumweenda? 6 Náho, íimwe nimubagoókela abahabi! Ngási, mwaáyebilwe nka nikwo abahíte nibo balikubagookela na kubatwaala omwi lamulilo? 7 Ngási tibo áabo nyini abahíte abazuma izíina liluunzi lya Yeézu Kristu éelyo mwaalukilwe?
8 Aha Amaandiko Matakatíifu, echilagilo cho obukáma bwa Múungu chigaamba nka nikwo, “Omweénde mutúuzi waawe, nko óokwo olikweéyeenda iiwe nyini.” a Keelaaba nimuzila mútyo, nimuzila kuzima. 9 Náho, kamulikuba nimubatola abaantu, niho mulikuhena ebiheno, ne ebilagilo nibibalegelela nka nikwo íimwe na abaheni.
10 Omuuntu kalikukwáata ebilagilo byóona, náho akeekuumpa aha chilagilo chimo, niho alikubalwa nka nikwo yaahena omuli byóona. 11 Manya si! Múungu óogwo nyini ayatiileho echilagilo éecho echigaamba nka nikwo, “Otasaambana,” b niwe óogwo nyini ayatiileho echilagilo éecho nyini echigaamba nka nikwo, “Otaliita.” c Ha bwéecho, nóobu keelaaba otakasaambeene, náho oyisile, noobalwa nka nikwo oli omuheni we ebilagilo.
12 Mbweenu, mube nimugaámba no kukola omu kweékomya echilagilo éecho (empola nzima) echilikuleeta obweéyagaaluzi. Mwiizuke nka nikwo Múungu alaábachwaáziika kwiingana ne echilagilo éecho. 13 Kuba Múungu talimuzilila echiganyizi omuuntu óogwo atakuzilila chiganyizi ha báandi. Náho kabilaaba weényini naabazilila echiganyizi abáandi, Múungu náwe alaamuzilila echiganyizi náwe aha echilo cho omuchwaáziiko.
Okwiikiliza Kwéenyu Kuzeendane Ne Ebikolwa Byaanyu
14 Badugu baanze, heena mugaso chi aha muuntu óogwo alikugaamba nka nikwo ayina okwiikiliza, náho atéena ebikolwa éebyo ebilikusohoza okwiikiliza? Ngási, okwiikiliza kwa kazeendele áako kwaakaáhicha kumuchuúngula? 15 Keelaaba aliho mudugu waawe, nali munyaányoko omuli Kristu, ali busa atéena bizwáalo na naabulabulilwa ebyookulya bya buchiile, 16 no omuuntu oómo kuluga omuli íimwe akamugaambila nka nikwo, “Zeénda no obuhóolo, oyote omulilo male ohaaged,” kunu atamuheele no kumuzuna ebyokumutuunga ebilikweeendelwa ha mubili gwoómwe, éecho chiina mugaso chi hali weényini? 17 Bityo nyini nikwo bili koolikuba oyina okwiikiliza kwoónka, náho oteena ebikolwa éebyo ebilikusohoza okwiikiliza. Neemanyisa nka nikwo okwiikiliza óokwo kufwiile.
18 Choónka omuuntu oóndi yaakaáhicha kugaamba nka nikwo, “Iiwe oyine okwiikiliza, neenye nyina ebikolwa éebyo ebilikusohoza okwiikiliza.” Mbweenu, nniimugaambila nka nikwo, “Onyoleke okwiikiliza kwáawe, okuteena ebikolwa. Náho íinye nyize nkwooleke okwiikiliza kwaanze ha muhaanda gwe ebikolwa byaanze.”
19 Ngási, iiwe nooyikiliza nka nikwo heena Múungu oómo weénka? Nookola kuzima kwiikiliza oótyo. Náho nago amazimu geekiliza gatyo nyini, mala gazuguma habwo obutíini!
20 Iiwe oli omufweéla! Ngási ochaali ochaáyeenda kwoólekwa nka nikwo okwiikiliza kutéena bikolwa bizima, tikwiina mugaso? 21 Ilooko tuleebe isiichweénkulu Ibrahímu. Áaho óobu akamusohoza mutábaniwe ali Izáaka ahi itaámbilo aábe echitáambo, náwe Múungu niho áaho akamubala kuba owa amazima omuméeso goómwe habwe ebikolwa byoómwe. 22 Ngási, tokubona nka nikwo okwiikiliza kwa Ibrahímu kukaba nikuzeendana na ebikolwa byoómwe? Okwiikiliza kwoómwe kukahikiilizibwa habwe ebikolwa byoómwe. 23 Ha bwéecho gakahikiilizibwa áago agayaandikilwe omu Maandiko Matakatíifu nka nikwo, “Ibrahímu akamwiikiliza Múungu, ha bwéecho Múungu yaamubala kuba omuuntu owa amazima omuméeso goómwe.” e Ibrahímu náwe yaayetwa nka nikwo ni munywáani wa Múungu.
24 Mbweenu, nimuleeba nka nikwo Múungu naamubala omuuntu kuba owa amazima omuméeso goómwe habwe ebikolwa éebyo ebilikusohoza okwiikiliza, tiyo kwoónka habwo okwiikiliza kwoómwe.
25 Kaandi náwe Rahabu, óogwo omusiihani. Bityo nyini, na weényini akabalwa kuba owa amazima, habwe ebikolwa byoomwe, kuba akanyegeza abacheéngelezi omúka yoómwe, yaábazuna omukusubayo, mala yaababonesa kunyoloomboka omukulugamo omu iboma ha kulabila omuháanda oguundi.f
26 Bityo nyini, kagulikuba omubili gwo obulami gutaaganisiibwe no omwooyo guba gufwiile, biba bityo nyini ha kwiikiliza kwo omuuntu óogwo atéena ebikolwa éebyo ebilikusohoza okwiikiliza, kuba kufwiile.