Olwaandiko Lwa
Yakobo
Empola
1
1 Iinye Yakobo omuzáana wa Múungu no owo Omukáma Yeézu Kristu. Niimbaandikila íimwe abeekiliza be endími ikumi ne bili,a áabo musaambeele omuunsi zóona. Niimbaangalucha!Mube Na Amanulilwa Aha Nchilo Ze Ebileengeso
2 Badugu baanze omuli Kristu, muleebe nka nikwo na manulilwa goónka obuchilo óobwo mulikuleetelelwa ebyaágalalo ne ebileengeso bya buli lugaanda, 3 habwo kuba nimusoomboókelwa nka nikwo okwiikiliza kwéenyu kakulikuleengesibwa, nikubaha amagala go obweémezi. 4 Muzeendelele kweémela kuhicha omuhelo, mubóne kuba abahikile na abeétegeelize, mutéena kubulabulilwa chiintu choóna chóona.
5 Náho kabilaaba oómo wáanyu naabulabulilwa na amasala, mbweenu naayeendelwa agasabe hali Múungu, náwe abaha omu kusaanduka, mala tabakáama. 6 Náho obuchilo naamusaba Múungu, neeyeendelwa asabe omu kwiikiliza, atéena kutahwa tahwa. Keelaaba omuuntu ayina okutahwa tahwa, naasusa ikoonzo lyo omu nziba éelyo elilikusuumwa no omuyaga gukalitwaala óoku no óokwo. 7 Omuuntu nko óogwo atateekuza nka nikwo naabonesa kwiinaankula echiintu choóna chóona kuluga ha Mukáma Múungu. 8 Omuuntu nko óogwo we ebihika bibili, atahwatahwa omu kazeendele koómwe kóona.
9 Náho omwiikiliza óogwo ali omuhabi óogwo atéena ikuzo lyoóna lyóona, naayeendelwa anulilwe, habwo kuba Múungu amuheele ikuzo. 10 Náwe omwiikiliza omuhíte naayeendelwa kuba omweécheesha ha kuba omwiikiliza.b Habwo kuba abahite bóona balaáhwaho nke enyaso zo omuunkaamba. 11 Izóoba kalisohola, omusana gwaályo gwaáka, lyoomesa emimelo ne enyaso zaázo nduunzi zilagala no kunyaankabala no obuluunzi bwaazo tibuchisemela kaandi. Bityo nyini nikwo chilyáaba na ha omuhite, naanyaankabala ali omu lwaágalalo lwe milimo yoómwe.
12 Ayina omugisa omuuntu óogwo alikwéeyomeleza omu bileengeso, habwo kuba obuchilo naába yasiinga ebileengeso, naayenaánkula kuluga ha Mukáma Múungu engabilano yo obulami bwa buchiile, nko óokwo yaazisagiize kubabonesa bóona áabo balikumweenda.
13 Obuchilo omuuntu naaleetelelwa kuleengesibwa, atagaamba nka nikwo, “Niindeengeswa na Múungu,” habwo kuba Múungu taleengesa omuuntu weéna wéena bityo, na weényini náwe taleengeswa no obuzilwa. 14 Náho buli muuntu aleengeswa habwo kukweeswa no kubéehwa béehwa ne etuúnku yoómwe mbi. 15 Obuchilo etuúnku éezo kekomeela, eleteleela kukola ebiheno. Ne ebiheno kibikomeela bileetelela olufu.c
16 Badugu baanze enfula, mutábeehwa. 17 Buli ngabilano éezo eli nduunzi ne engabilano éezo ehikile yi tulikuhaabwa, biiza kuluga omu igulu hali Múungu, Omuhaangi we myaanga zóona zo omu igulu. Múungu no omweésigwa obuchilo bwóona, na tahiinduka nko óokwo echibého chihiinduka. 18 Nko óokwo weényini akeenda, akatuzaala kulabila echigaambo choómwe cha amazima, kutukóla tube abaana boómwe. Akakola aátyo, tubone kúba nki igesa lya mbele omuli éebyo byóona éebyo akahaanga.
Kuhulila Echigaambo Cha Múungu No Kuchigomookela.
19 Badugu baanze enfula, mumpuliilize kuzima. Buli muuntu aábe no obwiila bwo kuhuliliiza, náho ataba no obwaangu bwo kugaamba nali kusaaya, 20 habwo kuba omuuntu kasaaya, tiyaákuhicha kukola amazima áago elikweendelwa omuméeso ga Múungu. 21 Ha bwéecho, mweélige na amagaambo góona go obulofo no obuzilwa bwóona obusaagiliize. Mkwaáte habwo obuchuleezi echigaambo éecho Múungu atiile omu miganya yaanyu, habwo kuba éecho nicho chilikuhicha kubachuúngula.
22 Mutaákuba nimweebeéha! Mutaákuba abaantu áabo abahuliiliza kwoónka echigaambo cha Múungu, náho mube abaantu áabo abakola nka nikwo chilikulagila. 23 Omuuntu óogwo alikuhuliiliza echigaambo cha Múungu, náho takukola nka nikwo chilikumulagila akole, óogwo naasusana omuuntu óogwo alikweeleeba ensusoye ahi ilole. 24 Áaho kalikumala kweéleeba, naaluga aha ilole, bwaangu naayebwa nka nikwo aáli. 25 Náho omuuntu óogwo alikuleeba omukweétegeeleza ebilagilo ebihikile ebilikuleetela abaantu obweéyagaaluzi, no kuzeendelela kubyeékomya na tikwo kubihuliiliza kwoónka male akamala akabinagilana, óogwo niwe alibona omugisa habwo kukola aátyo.
26 Kabilaaba omuuntu naayebona nka nikwo weényini no omunyadiini wa Múungu, habwo kubula kulweemaho olulimi lwoómwe lukaza omukugaamba amabi, óogwo naayebeéha, ne ediini yoómwe tékumugasa choóna chóona. 27 Ediini éezo elikumunuliza Múungu Isiichwe ne éezo etéena katokoozi omuméeso ga Múungu niyo éezi, yo kuhweela enfuuzi ne entuúmbakazi omu nnaku záabo, hamo no kweéliga omu biheno bye éensi éezi.