Yeézu Kristu Atusabila
2
1 Abaana baanze enfula, naabaandikila amagaambo áaga, nka nikwo mutaákuzila ebiheno. Náho kabilaaba omuuntu yaakola ebiheno, amanye nka nikwo twiinaze omuneémbelezi omuméeso ge Isiichwe Múungu. Ogwo niwe Yeézu Kristu, owa amazima. 2 Weényini niwe echitáambo cho kutukwaátanisa na Múungu ha kuganyilwa ebiheno byéetu. Kaandi tiyo ebiheno byéetu byoónka, náho kuganyilwa ebiheno bya abaantu bóona be éensi.3 Katulaaba nitukoondookela ebilagilo bya Múungu, niho nitusoomboókelwa nka nikwo nitumusoombookelwa. 4 Weéna wéena ogwo alikugaamba nka nikwo naamumusoombookelwa Múungu kunu atakukoondokela ebilagilo byoómwe, no omubeehi, na amazima tigalimo omuli weényini. 5 Náho omuuntu ogwo alikukoondookela echigaambo choómwe, weényini óogwo niwe ayina engoonzi zihikile za amazima ga Múungu. Hali bityo nitusoomboókelwa nka nikwo tuli omuli weényini Múungu. 6 Omuuntu ogwo alikugaamba nka nikwo naayikala omuli weényini Múungu, naayeendelwa atuúle aátyo nyini, nkokwo Yeézu yaatwiile.
Echilagilo Cha Yeézu Habwe Engoonzi
7 Enfula záanze, echilagilo éecho ndikubaándikila tí chisha, náho ne echilagilo éecho nyini echa kala éecho mukaba nimuchisoombookelwa kulugiilila aha bubaandizo.a Echilagilo éecho cha kala, nicho echigaambo éecho mwaahuliile. 8 Nóobu bityo, echilagilo éecho ndikubaándikila, nicho chisha. Amazima gaácho nigabonwa omu bulami bwa Yeézu Kristu, no omu bulami bwéenyu, ha kuba ensiimbaazi nehiingula no óogwo omwaangab gwa amazima gwaámazile kumweeka.
9 Omuuntu óogwo alikugaamba nka nikwo naatuula omu mwaanga kunu naamutamwa mudugúwe, óogwo na leélo óobu nyini naába acháali achaátuula omu nsiimbaazi. 10 Weéna wéena ogwo ayina engoonzi hali mudugúwe, atuula omu mwaanga. Tihaliho choóna chóona omuunda yoómwe cho kuleételela abaantu bakole ebiheno. 11 Náho óogwo alikumutamwa mudugúwe, óogwo acháali ali omu nsiimbaazi. Kaandi naalibata omu nsiimbaazi, atéena okusombookelwa áaho alikuzeenda, ha kuba ensiimbaazi ehumisize améeso goómwe.
12 Niimbaandikila abaana baanze enfula,
ha kuba mwaáganyiilwe ebiheno byéenyu ha kulabila izíina lya Yeézu Kristu.
13 Niimbaandikila íimwe ba táata,
ha kuba mwaámusoomboókelwa Yeézu Kristu,
ogwo ayaabele aliho kulugiilila ha bubaandizo.
Niimbaandikila íimwe abasigazi,
ha kuba mwaámusiinga óogwo Omuzilwa.
Niimbaandikila íimwe abayaánda,
ha kuba mwaámusoomboókelwa Isiichwe Múungu.
14 Niimbaandikila íimwe ba táata,
ha kuba mwaámusoomboókelwa weényini,
ogwo ayaabele aliho kulugiilila ha bubaandizo.
Niimbaandikila íimwe abasigazi,
ha kuba mwíina amagala,
ne echigaambo cha Múungu nichiikala omumyooyo yaanyu,
kaandi mwaámusiinga óogwo Omuzilwa.
15 Ha bwéecho, mutaákweenda kukola obuzilwa nka abaantu áabo abatakumugoomokela Múungu. Nniingaámba kaandi, mutaákweenda obuzilwa bwoóna bwóona bwo omúunsi.c Kabilaaba omuuntu weéna wéena naayeénda obuzilwa bwo omúunsi, takumweenda Isiichwe Múungu, 16 ha kuba obuzilwa óobwo tibukuluga hali Múungu, náho nibuluga omúunsi. Obuzilwa bwo omúunsi nizo entúungwa éezi, etuúnku mbi zo kuligila mubili, ichubi lya améeso, ne emyeésiingizo mibi ya amabonwa. 17 Éensi éezi hamo ne etuúnku zaáyo mbi, nizihiingula. Náho weéna wéena ogwo alikukola áago agalikumusemelela Múungu, naába no obulami bwo bucha no buchiile.
Mube Méeso Na Abahakanisa Ba Kristu
18 Abaana baanze enfula, ebilo bi ihelezo byaáhika! Mwaáhuliize nka nikwo omubisa wa Kristud naayiza, na nóobu abahakanisa béenzi ba Kristu baamazile kwiiza. Bityo nikwo tulikumanya nka nikwo tuli omu bilo bi ihelezo. 19 Abaantu áabo balugiliile omu makelezia géetu, náho tibalabeele no obumo bwa mazima ne íichwe. Kabyaakubeele beena no obumo bwa mazima ne íichwe, bakasigeele hali íichwe. Náho bakalugayo, ebone kuba aha bweélu nka nikwo tibalabeele no obumo ne íichwe.
20 Náho íimwe, Yeézu Omutakatíifu yaábaha Omwooyo gwoómwe,e óobu íimwe bóona nimugasoomboókelwa amazima. 21 Tiínkubaándikila olwaandiko óolu ha kuba timukugasoomboókelwa amazima, náho habwo kuba nimugamanya. Kaandi nimusoomboókelwa nka nikwo tihaliho ebisuba byoóna byóona éebyo bililugiilila omuli áago amazima. 22 Omuuntu omubeehi no oóha? Omuuntu omubeehi ni weéna wéena ogwo alikwaanga nka nikwo Yeézu niwe Masiya.f Weéna wéena ogwo alikumwaanga Isiichwe Múungu na Yeézu Omwaana woómwe, óogwo niwe omuhakanisa wa Kristu. 23 Omuuntu óogwo alikumwaanga Omutábani wa Múungu, óogwo téena obumo ne Isiichwe Múungu. Náho, omuuntu ogwo alikumukúunda Omutábani wa Múungu omuméeso ga abaantu, óogwo kaandi naába ayina obumo ne Isiichwe Múungu.
24 Óobu, muzeendelele kugeékomya omu miganya yaanyu amagaambo áago mulikweégeswa kulugiilila aha bubaandizo. Kabilaaba nimuzeendelela kweékomya ameégeso áago, niho mulazeendelela kuba no obumo no Omutábani wa Múungu, ne Isiichwe Múungu. 25 Endagano éezo akatweésagiza ni nka nikwo, nitwinaánkula obulami bwo bucha no buchiile.
26 Niimbaandikila amagaambo áago, kubahana habwa abaantu áabo balikuleengesa kubahabisa. 27 Náho íimwe, Kristu yaábaha Omwooyo Mutakatíifu, ogwo naatuúla omuli íimwe. Óogwo niwe alikubeégesa byóona, na ameégeso goómwe na aga mazima, tí ge ebisuba. Ha bwéecho, timukweendelwa omuuntu oóndi abeégese.g Na nkokwo Omwooyo abeegesize, muzeendelele kuba no obumo omuli Kristu.
28 Óobu abaana baanze enfula, muzeendelele kwiikala omu obumo na Kristu, kuba obuchilo óobwo alisuba kaandi, tugime, tutaákwiiza tukagooka.
29 Nimusoomboókelwa nka nikwo weényini no owa amazima. Ha bwéecho musoomboókelwe nka nikwo weéna wéena ogwo alikukola amazima, no omwaana wa Múungu.