Kutúula Nka Abaana Ba Múungu
3
1 Muleebe óokwo Isiichwe Múungu alikutweenda bwooli, nka nikwo íichwe nitubona kwéetwa abaana boómwe! Mazima na nikwo tuli. Náho abaantu áabo abatakumugoomokela Múungu, tibakusombookelwa nka nikwo íichwe na abaana ba Múungu, habwo kuba tibakumumanya weényini. 2 Enfula záanze, nitumanya nka nikwo óobu nyini, íichwe na abaana ba Múungu, náho tekasoomboókile butúnu óokwo tulyaaba tuli. Nóobu bityo, nitusoomboókelwa nka nikwo obuchilo óobwo Kristu alisuba kaandi, tulyaásusana náze, habwo kuba tulyaámubona nka nikwo aáli. 3 Omuuntu weéna wéena ogwo alikutegeza nka nikwo alaásusana na Kristu, ayeyeze abone kuba omutakatíifu, nka nikwo Kristu weényini ali omutakatíifu.4 Weéna wéena ogwo akola ebíbi, agookela ebilagilo bya Múungu, habwe ensoonga kukola ebíbi, nikwo kuhinyooza ebilagilo hakalyo. 5 Nimusoomboókelwa nka nikwo Kristu akeeza omúunsi, abone kwiihaho ebiheno byéetu. Kaandi weényini téena chiheno choóna chóona. 6 Óobu, eli butúnu nka nikwo, weéna wéena ogwo alikuzeendelela kuba no obumo náze, takuzeendelela kukola ebiheno. Náho weéna wéena ogwo alikuzeendelela kukola ebiheno, takusombookelwa nka nikwo Kristu no oóha, kaandi takumusoombookelwa.
7 Óobu, abaana baanze enfula, mteekililizana omuuntu weéna wéena abahabise. Weéna wéena ogwo alikukola amagaambo ga amazima, no owa amazima omuméeso ga Múungu, nkóokwo Kristu ali owa amazima. 8 Náho weéna wéena ogwo azeendelela kukola ebiheno, óogwo no omuuntu wi Izimu Elikúlu. Nitumanya tútyo, habwo kuba Izimu Elikúlu no omukola biheno kulugiilila kala. Niyo ensoonga Omutábani wa Múungu akeeza omúunsi, abone kusiisagula emilimo yi Izimu Elikúlu.
9 Omuuntu weéna wéena ogwo ayaábeele omwaana wa Múungu, takuzeendelela kukola ebiheno, habwo kuba ayina entúungwa ya Múungu omuunda yoómwe. Tiyaákuhicha kuzeendelela kukola ebiheno, habwo kuba no omwaana wa Múungu. 10 Náho omuuntu ogwo atakukola amagaambo ge ntúungwa nzima nali ogwo atakumweenda mudugúwe, óogwo tí mwaana wa Múungu. Bityo aha nsoonga éezi twaakahicha kubasoomboókelwa abaana ba Múungu na abaana bi Izimu Elikúlu.
Okweendana
11 Kulugiilila aha bubaandizo, mwaáhuliize empola nka nikwo tweendane íichwe omuli íichwe nyini. 12 Tutaákuba nka Kaini, ogwo ayaayisile omulúmuna. Weényini akatégekwa no óogwo omuzilwa ali Izimu Elikúlu.a Na habwaáchi akamwiita? Akamwiita habwo kuba ebikolwa byoómwe Kaini bikaba bili bíbi, náho ebyo omulúmuna bikaba bili ebya amazima.
13 Óobu, badugu baanze, mutaákusobelwa keelaaba abaantu áabo abatakumugoomokela Múungu kabalaabatamwa. 14 Íichwe nitusoomboókelwa nka nikwo twaalugile omu magala go olufu, no óobu twiine obulami bwo bucha no buchiile. Nitusoomboókelwa tútyo ha kuba nitubeénda badugu béetu. Omuuntu weéna wéena ogwo atéena engoonzi, óogwo naába acháali achili omu magala go olufu.b 15 Omuuntu weéna wéena ogwo alikutamwa mudugúwe, óogwo no omwiisi. Íimwe nimusoomboókelwa kuluunzi nka nikwo táliho omwiisi ogwo ayina obulami bwa bucha no buchiile omuli weényini.
16 Kristu, kayaasohweeze obulami bwoómwe habwi íichwe, akatwoóleka engoonzi za mazima. Kaandi ne íichwe tútyo nyini, nitweendélwa kusohoza obulami bwéetu habwa badugu béetu. 17 Kelaaba omuuntu weéna wéena óogwo ayina amabonwa ge éensi, no kumubona mudugúwe naayeenda omusuumbuuso, náho weényini akabula kuzila omwooyo gwe embabazi yo kumusuumbuusa, ngási mazima omuli weényini zilimo engoonzi za Múungu?
18 Baana baanze enfula, okweendana kwéetu kutaákuba ha bigaambo byoónka, náho tweendane kuzima ha kweékolela ebikolwa bizima. 19 Katulayeendana tútyo, niho twiine obweétegeleza nka nikwo nitukulaatila amazima, kaandi emiganya yéetu nechuleéla omuméeso ga Múungu. 20 Nóobu tulaaba nituchwaaziikwa omu miganya yéetu nka nikwo tukozile ebiheno, nitusoomboókelwa nka nikwo Múungu niwe mukúlu kusaaga emiganya yéetu, kaandi naasoombookelwa byóona.
21 Enfula záanze, kabilaaba titukuchwaáziikilwa omu miganya yéetu, twakaáhicha kwiiza omuméeso ga Múungu ha bugimi. 22 Kaandi nitwiinaánkula kuluga hali weényini choóna chóona éecho tulikumusaba, habwo kuba nitugomookela ebilagilo byoómwe no kukola éebyo ebilikumusemeleza.
23 Echilagilo choómwe nicho éechi, nka nikwo twiikilize izíina lyo Omwaana woómwe Yeézu Kristu, no kweendana nkóokwo yaatulagiile. 24 Omuuntu weéna wéena ogwo agomookela ebilagilo byoómwe, óogwo azeendelela kwiikala hamo náze Múungu, náwe Múungu ayikala omuli weényini. Nitusoomboókelwa nka nikwo Múungu atuula hamo ne íichwe, habwo kuba twiinaze Omwooyo Mutakatíifu ogwo yatuhéele.