Kusoombookelwa Ameégeso Ge Ebisuba Na Aga Amazima
4
1 Enfula záanze, mutaákwiikililizana na buli mwooyo. Náho muzileengese no kuzikaguza mubóne kuzisoombookelwa kuluunzi kazilaaba nizilugiílila hali Múungu nali mahi, habwo kuba ababáasi béenzi be ebisuba beésulukiize omúunsi. 2 Ogu nigwo omuháanda gwo okusombookelwa Omwooyo gwa Múungu. Buli mwooyo ogulakúunda nka nikwo Yeézu Kristu akeeza omúunsi yaaba omuuntu, óogwo mwooyo niguluga hali Múungu. 3 Náho buli mwooyo ogutakukúunda nka nikwo Yeézu akaba ali omuuntu, óogwo mwooyo tigukuluga hali Múungu. Óogwo nigwo omwooyo gwo omuhakanisa wa Kristu. Neemwe, mwaáhuliize nka nikwo óogwo mwooyo gwo omubisa nigwiiza, na kaandi gwaámazile kuhika omuunsi.4 Náho íimwe baana baanze enfula, íimwe muli abaana ba Múungu, neemwe mwaábasiinga áabo ababáasi be ebisuba. Kuba Omwooyo gwa Múungu oguli omuli íimwe ni mukúlu, na weényini ayina obuhicha kusaaga omwooyo gwi Izimu Elikúlu óogwo ogulikubeembelela abaantu áabo abatakumugoomokela Múungu. 5 Áabo ababáasi be ebisuba na abe éensi. Ha bwéecho bagaámba ebigaambo bye éensi, na abaantu áabo abatakumugoomokela Múungu, nibabahulila. 6 Íichwe tuli abaana ba Múungu. Weéna wéena ogwo alikumusoombookelwa Múungu, naatuhuliiliza. Náho ogwo atali omwaana wa Múungu, takutuhuliiliza. Bityo nikwo tulikusombookelwaaho akachilano ha baantu áabo balikweébeembelelwa no Omwooyo gwa mazima, na áabo balikweébeembelelwa no omwooyo gwe ebisuba.
Engoonzi Za Múungu
7 Enfula záanze, tweendane íichwe omuli íichwe nyini, habwo kuba engoonzi ziluga hali Múungu. Omuuntu weéna wéena ogwo ayina engoonzi, óogwo no omwaana wa Múungu, kaandi naamusoomboókelwa Múungu. 8 Náho weéna wéena ogwo atéena engoonzi, óogwo takumusoombookelwa Múungu, habwo kuba Múungu ne engoonzi.
9 Múungu akooleka engoonzi zoómwe hali íichwe ha kumusiíndika Omwaana woómwe ali nyakámo kwiiza omúunsi, kuba kulabila hali weényini tubone obulami. 10 Éezi nizo engoonzi, tí nka nikwo íichwe tukabaanza kumweenda Múungu, náho nka nikwo weényini niwe akatweenda íichwe. Niyo ensoonga akamusiíndika Omwaana woómwe, abone kuba echitáambo cho kutukwaátanisa na Múungu ha kuganyilwa ebiheno byéetu. 11 Enfula záanze, keelaaba Múungu akatweenda íichwe aátyo, nitweendélwa ne echwe tweendane. 12 Táliho omuuntu weéna wéena ogwo ayaalamubweene Múungu mazima. Náho katulayeendana, Múungu naatuula omu bumo ne íichwe, ne engoonzi zoómwe zihikile omuli íichwe.
13 Íichwe twiine obumo na Múungu, náwe Múungu ayina obumo ne íichwe. Nitusoomboókelwa tútyo, habwo kuba atuheele Omwooyo gwoómwe. 14 Íichwe tweébonela no kwáatula nka nikwo Isiichwe Múungu akamusiíndika Omwaana woómwe omúunsi, abone kuba Omuchuúnguzi wa abaantu bóona. 15 Omuuntu weéna wéena ogwo alikwiikiliza nka nikwo Yeézu ni Mutábani wa Múungu, óogwo naazeendelela kuzila obumo na Múungu, na Múungu naazila obumo omuli óogwo muuntu. 16 Óobu, neechwe nitusoomboókelwa no kwiikiliza nka nikwo Múungu naatweénda. Múungu ne engoonzi. Weéna wéena ogwo alikutuula omuungoonzi, niwe ayina obumo na Múungu, náwe Múungu naába ayina obumo no omuuntu óogwo.
17 Ha muháanda óogwo, engoonzi zihikile omuunda yéetu, tubone kuzila obugimi echilo cho omuchwaáziiko. Engoonzi éezo zihikile, habwo kuba obulami bwéetu omúunsi óomu nibususana nkokwo Yeézu yaatwiile. 18 Engoonzi tizizila kweéganya, habwo kuba engoonzi za mazima ziihaho kweéganya kwóona. Okweeganya na habwo kutíina omuchwaáziiko. Ha bwéecho omuuntu ogwo ayina okweeganya takahikiliilwe engoonzi omuli weényini.
19 Íichwe twiina engoonzi, habwo kuba Múungu niwe akeebeembela kutweenda íichwe. 20 Kabilaaba omuuntu weéna wéena naagaamba nka nikwo naamweénda Múungu, kunu naamutámwa mudugúwe, óogwo no omubeehi. Kuba kaálaaba atakumweenda mudugúwe ogwo alikumubona, tiyaákuhicha kumweenda Múungu ogwo atakamubonaga. 21 Mbweenu, Múungu atuheele echilagilo éechi nka nikwo, omuuntu weéna wéena ogwo alikumweenda Múungu, naayeendelwa kaandi azile engoonzi na mudugúwe.a