Kusíinga Ebiheno
5
1 Buli muuntu ogwo alikwiikiliza nka nikwo Yeézu ni Masiya, óogwo no omwaana wa Múungu. Weéna wéena ogwo alikumweenda iíse, ayeenda no omwaana we eése. 2 Bityo nikwo tulikusombookelwa nka nikwo nitubeénda abaana ba Múungu, omu kumweenda Múungu no kugomookela ebilagilo byoómwe. 3 Kuba kumweenda Múungu no kugomookela ebilagilo byoómwe, nabyo ebilagilo byoómwe tibikulemeela, 4 habwo kuba buli mwaana wa Múungu asíinga obuzilwa bwe éensi. Obuzilwa óobwo, nitubusiínga habwo okwiikiliza kwéetu. 5 Ngási! No oóha ogwo yaakaáhicha kusíinga obuzilwa bwe éensi? No óogwo weénka alikwiikiliza nka nikwo Yeézu no Omutábani wa Múungu.Amazima Habwo Óogu Yeézu Kristu
6 Yeézu Kristu niwe ayeezile aha muháanda gwa meenzi ne enságamaa. Tí habwa ameenzi goónka, náho habwa ameenzi na habwe enságama. Náwe Omwooyo Mutakatíifu niwe aayatula nka nikwo áago na aga amazima, 7 habwo kuba weényini Omwooyo Mutakatíifu niwe amazima. 8 Heena baalubona básatu áabo abalikwaátula empola za Yeézu Kristu [omu igulu nabo ni, Isiichwe, Echigaambo, no Omwooyo Mutakatíifu, na básatu áaba no obumo. 9 Kaandi heena ebiintu bisatu éebyo ebilikwaátula omúunsi],b no Omwooyo, améenzi, ne enságama, na básatu bóona aba nibeekililizana ha mpola eémo. Katuleekiliza obwaátuzi bwa abaantu, mazima twiikilize obwaátuzi bukúlu busaagile bwa Múungu habwo kuba ni Múungu weényini óogwo amwaátwiile Omwaanawe.
10 Omuuntu weéna wéena ogwo alikumwiíkiliza Omutábani wa Múungu, naába ayinabwo obwaátuzi óobwo bwa amazima omuli weényini. Náho ogwo atakumwiíkiliza Múungu, naamukola Múungu kuba omubeehi, habwo kuba takeekiliize obwaátuzi bwa Múungu óobwo yaasohweeze habwo óogwo Mwaanawe. 11 No obwaátuzi óobwo nibwo óobu, Múungu atuheele obulami bwo bucha no buchiile, no obulami óobwo buli omuli óogwo Mwaana woómwe. 12 Weéna wéena ogwo ayinaze Omutábani wa Múungu, ayinabwo obulami óobwo. Náho ogwo ateenaze Omutábani wa Múungu, óogwo tayina bulami.
Kuba No Obugimi Omuméeso Ga Múungu
13 Naábaandikila empola éezi, íimwe áabo mulikumwiíkiliza ahi izíina lya Mutábani wa Múungu, mubóne kusombookelwa nka nikwo mwíinabwo obulami bwo bucha no buchiile. 14 Neechwe twiina obugimi omuméeso ga Múungu. Nitusoomboókelwa nka nikwo katulikumusaba choóna chóona kwiingana ne engoonzi zoómwe, naatuhulila. 15 Keelaaba nitusoomboókelwa nka nikwo weényini atuhuliiliza obuchilo nitumusaba, áaho twiine obweétegeleza nka nikwo tweénaankwiile choona éecho chi twaamusaba.
16 Omuuntu kaálamubona mudugúwe naakola ebiheno ebilikumutaáganisa weényini hala na Múungu obucha no obuchiile, amusabile hali Múungu, náwe Múungu naamuha obulami bwo obucha no obuchiilie. Nibiba bityo hali áabo abalikukola ebiheno ebitakubataáganisa hala na Múungu obucha no obuchiile. Heena ebiheno bityo byo kumutaáganisa omuuntu hala na Múungu. Iinye tiínkugaamba amusabile habwe éebyo. 17 Buli choóna chóona éecho chitali cha amazima chiba echiheno, náho ti buli chiheno nichimutaaganisa omuuntu hala na Múungu obucha no obuchiile.
Amagaambo Gi Ihelezo
18 Nitusoomboókelwa nka nikwo buli muuntu ogwo ali omwaana wa Múungu takuzeendelela omukukola ebiheno,c habwo kuba Omutábani wa Múungu naamweekomya,d no óogwo Omuzilwae tiyaákuhicha kumukola choóna chóona. 19 Nitusoomboókelwa nka nikwo íichwe na abaana ba Múungu, na abaantu áabo abatakumugoomokela Múungu nibatégekwa no óogwo Omuzilwa. 20 Kaandi nitusoomboókelwa nka nikwo Omutábani wa Múungu yeézile, náwe atuheele obweenze, tubone kumusombookelwa óogwo owa amazima. Neechwe tuli omuli weényini ogwo owa amazima, ensoonga tuli omuli weényini Omwaana woómwe Yeézu Kristu. Óogu niwe Múungu owa mazima, na niwe obulami bwo obucha no obuchiile.
21 Abaana baanze enfula, mweélige ne ebisusano bya bamuungu.f