Olwaandiko Lwo Kubaanza Lwa
Yohana
Yeézu Niwe Echigaambo Cho Obulami
1
1 Nitubamanyisa empola ze echigaambo cho obulami, éecho echaabele chiliho kuluga ha bubaandizo.a Íichwe tukachihulila, tukachibona ha méeso géetu nyini, tukachileeba no kuchikwaataho ne engalo zéetu. 2 Obulami óobwo bukeésulukiiza, ne echwe twaábubona. Óobu nitukumuucha no kulaangaana amazima habwo obulami bwa buchiile, óobwo obwaabele buli hali Isiichwe Múungu, náho óobu bwaásuulwiilwe hali íichwe. b 3 Nitubalaanganila neemwe nyini empola habwa Yeézu óogwo twaabweene no kumuhuliiliza, mubóne kwiikala omu obumo ne éechwe omu kwiikiliza. Obumo óobwo twiina buli hamo ne Isiichwe Múungu, no Omwaana woómwe Yeézu Kristu. 4 Nitubaandikila éebi, tubone neechwe bóona kuhikiilizwa amanulilwa géetu.Kutúula Omu Mwaanga
5 Mbweenu, éezi niyo empola éezo tuhuliile kuluga hali Yeézu Kristu, niyo tulikubalaanga nka nikwo, Múungu niwe omwaanga,c náwe tazila nsiimbaazi yoóna yóona omuli weényini. 6 Kabilaaba nitugaámba nka nikwo twiine obumo náze, kunu nituzeendelela kutúula omu nsiimbaazi, nituba twaágaamba ebisuba, na kaandi titukukola amazima. 7 Náho, kabilaaba nitutuúla omu mwaanga, nka Múungu kwaáli omu mwaanga, áaho niho tulikuba no obumo íichwe boónyini hali íichwe. Kaandi enságama yo Omwaana woómwe Yeézu, neetweéza ebiheno byéetu byóona.
8 Kabilaaba nitugaámba nka nikwo íichwe titwíina ebiheno byoóna byóona, nniitweebeéha íichwe nyini, na amazima tigalimo omuli íichwe. 9 Náho, keelaaba nitweegaamba butúnu ebiheno byéetu, Múungu naatuganyila ebiheno byéetu no kutweéza obubi bwóona, ha kuba weényini no omweésigwa no owa amazima. 10 Keelaaba nitugaámba nka nikwo titukakozile ebiheno, nitumukola Múungu kuba omubeehi, kaandi echigaambo choómwe tichilimo omuli íichwe.