Kutúula Óokwo Múungu Ayeendáho
5
1 Habwo kuba muli batabani ba Múungu abo ayeénda, mususane náwe. 2 Mutuúle omu ngoonzi, nko óokwo Kristu akatweenda íichwe, akeésohoza kufwa habwéetu, yaaba echitáambo éecho echiine omulaango muzima ahali Múungu.3 Náho obusaambania nakáti butahulilwa omuli íimwe, nali obulofo ne etuúnku za amabonwa, habwo kuba ebikolwa bye engaanda éezo tibizila akáanya omu batakatíifu. 4 Nakáti mutagaámba ebigaambo ebye ensoni, ebigaambo ebye echifweéla nali obuhakani, éebyo tibikweendélwa, náho ebilikweendelwa ne éebyo ebili byo kumusiima Múungu.b 5 Kuba ne etuúnku za amabonwa ni nko okulamya ebisusano bitali Múungu.c Musoomboókelwe aha mazima nka nikwo abeena etuúnku za amabonwa, abasiihani, na abalofo tibakuhuungula choóna chóona omubukáma bwa Kristu na Múungu.d 6 Mutakuunda omuuntu weéna wéena akababéeha habwa amagaambo nka áago agateenamo nsoonga, kuba áago magaambo nigo galeetelela echiníga cha Múungu aha abaantu áabo abalikwáanga kugomookela ebilagilóbye. 7 Ha bwéecho, mutateelana na abaantu nka áabo. 8 Áaho kala, íimwe mukaba muli omuunsiimbaazi, náho óobu, muli omu mwaanga omu kukwaátaangana kwéenyu no Omukáma Yeézu. Mbweenu óobu, mulame nka abaana abali omu mwaanga! 9 Habwo kuba amagoomba go mwaanga no kukola ebikolwa byóona ebigololokile ne ebye ntúungwa nzima, ne bya amazima. 10 Muzile obweeyomeleza bwo kusombookelwa amagaambo áago agalikumusemelela Omukáma. 11 Mutaákuba nimusiimbahala ne ebikolwa bye ensiimbaazi kuba tibiina mugaso, náho mubite ha bwéelu. 12 Hakuba amagaambo áago galikukolwa habwe eseleke na abaantu abaheni, na age ensóni nóobu kugagaamba. 13 Náho buli chiintu chóona kachilikumulikwa no omwaanga chimanyiika, na amazima gaácho gasombooka. 14 Niyo ensoonga egaambwa nka nikwo,
“Imuka iiwe óogwo ohuniile!
Ozooke kuluga omu bafwiile,
na Kristu aléeza kukumulikila.”e
15 Mbweenu, mube abeétegeelezi nka nikwo mulikutuulaho. Mutaákuba nka abaantu abasilu, náho mutuúle nka abeena amasala. 16 Mukoze kuluunzi obuchilo óobu, habwo kuba ebilo éebi abaantu nibakola obuzilwa bwiinzi. 17 Ha bwéecho, mutaákuba abasilu, náho muleengese kusoomboókelwa áago agali engoonzi yo Omukáma. 18 Kaandi mutatamiila evíini, habwo kuba kutamiila nikuleetelela omuuntu kukola amagaambo ge ensóni. Náho íimwe mwiizuzwe no Omwooyo Mutakatíifu. 19 Oluhooyo lwéenyu lube lwe enzina zi ikuzo, ezaburi, ne enzina zo omumwooyo. Mumuzinile no kumweéyaanda Omukáma Yeézu aha myóoyo yaanyu yóona. 20 Kaandi, mube nimumusiima Isiichwe Múungu, omu magaambo góona, buchiile, habwa amagaambo góona áago Omukáma wéetu Yeézu Kristu akozile. 21 Mube nimukoondoókelana íimwe omuli íimwe, habwo kuba nimumweeganya Kristu.
Ameégeso Habwa Abakázi Na Abaseeza
22 Íimwe abakázi, buli oómo weenyu aábe naamukoondoókela iíba, nko kumukoondookela Omukáma wéetu.f 23 Habwo kuba omuseeza nigwo omutweg gwa mukazíwe, nka Kristu kwa ali omutwe gwe ekelezia, náwe no omuchuúnguzi we éezo kelezia, niyo omubilígwe. 24 Mbweenu, nka nikwo ekelezia emukoondoókela Kristu bityo nyini na buli mukázi náwe amukoondoókele iíba ahali buli chigaambo. 25 Na buli museeza, aábe ne engoonzi aha mukazíwe,h nka Kristu okwo yazizile engoonzi habwe kelezia, akeésohoza habwa yoónyini. 26 Akakola aátyo habwe echigaambóche abone kwéeza ekelezia, kayaabeele yaámazile kuzisemeza aha kuzóoza na ameenzi.i 27 Kuba abone kweéboneseza ekelezia éezo elikukuzibwa, eteena katokoozi nali kunyaankabala nali choóna chóona nke éebyo náho eébe entakatíifu eteena entaambala.j 28 Bityo nyini, buli museeza naayeendelwa amweénde mukázi woómwe nko omubili gwoómwe nyini. Omuseeza óogwo alikumweenda mukazíwe, weényini óogwo ayeyeenda. 29 Ha kuba tiheena omuuntu hoóna hóona óogwo atamwa omubiligwe, náho aguliísa no kugweémanya, nka Kristu óokwo ayemanya ekelezia yoómwe, 30 ne neechwe tuli enziingo zo omubili gwoómwe. 31 Ha bwéecho, omukwaáta amuléka iíse na nyina, náwe azeénda kweékwaatanisa na mukazíwe, nabo bábili baaba omubili gúmo.k 32 Omu magaambo áaga heenamo echihwe, ne echihwe éecho ni chiháango chilikusobeza. Náho íinye nniingaámba amagaambo agalikusaaswa empola ya Kristu ne ekelezia.
33 Mbweenu, nniimbagaambila kaandi nka nikwo, buli museeza amweénde mukazíwe nko óokwo ayeyeenda weényini, na buli mukázi náwe, ataleka kumukondookela iíba.