Kutúula Ha Bumo Nko Omubili Gúmo
4
1 Mbweenu, íinye óogu ali embóhe habwo kuba nniimukolela Omukáma Yeézu, nniimbasaba mutuúle nkokwo mukwiílwe ha kwéetwa óokwo Múungu yaabeétíile. 2 Mube abachuleezi, abafula, abeéyomelezi, na mube nimwaambana buli oómo omu ngoonzi. 3 Muzile echifu kubweémanya obumo óobwo tukakwaátanganiswa no Omwooyo Mutakatíifu, habwo kutúula hamo omu buhóolo. 4 Habwo kuba heena omubili gúmo no Omwooyo Mutakatíifu gúmo, nka Múungu óokwo yaatweétíile tubone kwiinaankula okweésigwa okuli kumo. 5 Male Omukáma wéetu no oómo, okwiikiliza kwéetu ni kumo, okubatizwa kwéetu nakwo ni kumo, 6 na Múungu oómo, weényini niwe Isiichwe. Naatégeka bóona, naakola emilimo kulabila bóona, na naatuula omuli bóona.7 Náho buli oómo wéetu aheelwe na Kristu embabazi, kwiingana no óokwo Kristu weényini yaayeenzile. 8 Éego kuba Amaandiko Matakatíifu nigagaámba gáti,
“Kayaasutukile olugulu,
akakwáata enkwáate,
yaábaha abaantu engabilano.”a
9 Mbweenu, kugaamba nka nikwo, “Kayaasutukile olugulu,” ensoonga yaáho ni chiíha? Ensoonga yaáho ni nka nikwo, Kristu acháali atakasutukile olugulu, akatuuka ahaansi kuhika kuzimu. 10 Weényini óogwo akatuuka, niwe óogwo nyini ayaasutukile kuza aha lugulu yi igulu lyóona, abone kuhicha kubaho buli hóona. 11 Weényini niwe ayaaheele abaantu engabilano. Abáandi akabahiila kuba entumwa, abáandi ababáasi, abáandi abakúmuuchi be Empola Nzima, na abáandi abalíisa, baliíse no kweégesa, 12 aha chihika cho kubahikiiliza abatakatíifu, ne emilimo yoómwe ekolwe, aha nsoonga eéti, omubili gwa Kristu gubone kwoómbekwa. 13 Echigaambo éecho nichizeendelela kuhicha íichwe twéena katulaaba no obumo omu kwiikiliza kwéetu no omu kumusombookelwa Mutábani wa Múungu. Tuláaba abaantu áabo abakomiile nkóokwo ali Kristu. 14 Mbweenu, titukuteeyechwa kunu na kunu nka abaana abacheche, habwo omuyaga gwa áago meégeso abaantu ababéehi nibatubuyaanganisa. Abaantu áabo, baba nibeénda batuhabise habwa ameégeso gáabo ge ebisuba. 15 Náho, katulaaba nitugaambilana amazima aha mwooyo gwe engoonzi, nitugumisibwa omu magaambo góona, na nitweengana na Kristu. Weényini niwe omutweb gwa abeekiliza bóona.c 16 Weényini naabatelanisa abaantu boómwe bóona nibaba bámo, nkóokwo enzíingo zo omubili ziteelana no okuba omubili gúmo. Keelaaba buli luziingo nilukola omulimo okwo elikweendelwa, omubili nigukula na niguba gwaáguma.d
Obulami Bwa Kala No Obulami Obusha
17 Mbweenu óobu, nniimbagaambila no kubakomeenteleza aha buzizi óobwo Mukáma Yeézu yaampéele nka nikwo, mutaákutúula kaandi nkóokwo batuúla abaantu áabo abatakumumanya Múungu. Ebiteékuzo byáabo tibiina mugaso, 18 no obweenze bwáabo buli omuunsiimbaazi. Bali hala no obulami buluunzi óobwo buluga hali Múungu, habwo busilu bwáabo no obutulugu bwáabo. 19 Tibakuzila ensóni no obuche bwa káti, beetaahize omu ngaanda zóona zo obusaambani. Kaandi beena etuúnku yo kuzeendelela kukola amagaambo áago góona amábi.
20 Náho íimwe, timuleégesizwe mútyo habwa Kristu. 21 Na amazima mukahulila kuluunzi empola habwa Yeézu no kweéyega ameégeso goomwe ga amazima. 22 Mukeégeswa nka nikwo, mulekaane ne engeso zéenyu za kala, éezo ezabaletelíile íimwe kuba ne etuúnku ye ebisuba. 23 Mukeégeswa nka nikwo mukolwe obusha akateékulize ne echihika che emyooyo yaanyu. 24 Kaandi, muzwaále akazeendele kasha, nkóokwo Múungu yaabahaangile mususane náwe, kamulaaba abeena ntúungwa nzima butúnu na abatéena kábi.
25 Ha bwéecho, muleke ebisuba. Buli muuntu aábe naagaambila bazeenzíbe amazima, habwo kuba íichwe twéena ni nke enzíingo zo omubili gúmo. 26 Kamulikusaaya, mutahena, bole! Izóoba litagwamo mucháali muchisaayile. 27 Kusaaya nikuliha Izimu Elikúlu omwáanya kubasíinga. 28 Omwíibi aleke kwíiba kaandi, náho aábe alikukola emilimo mizima habwe engalo zoómwe weényini, abone kuhicha kuba ne echiintu cho kumugabila óogwo atéena chiintu. 29 Mutagaámba amagaambo mábi, náho mugaámbe amagaambo amazima go kwoómbeka abáandi kulugiilila omu byo kubatúunga. Éebyo, nibihicha kuba no omugaso ahali áabo abalikuhulila. 30 Na mutaákumuzololocha Omwooyo Mutakatíifu, habwo kuba weényini no olumanyiso lwa Múungu hali íimwe, óolwo olulikwoóleka nka nikwo, íimwe na abaantu boómwe, kuhicha ha chilo éecho Múungu alituchuúngula.e 31 Mbweenu, mulekaane ni ichubi, echihulumuko, ebiníga, kukuúngana, ebizumi, no obubi bwe engaanda zóona. 32 Mube nimukolelana ebizima, mube abeena echiganyizi, na mube nimuganyílana nkóokwo Múungu yaabaganyíile íimwe aha omuhaanda gwa Kristu.