Ikola Lya Paulo Ha Banyamahaánga
3
1 Habwe embabazi ya Múungu aha banyamahaánga, íinye Paulo, nniimbasabila. Íinye mbohilwe habwe emilimo éezo Kristu Yeézu akaampa ha bwéenyu íimwe Abanyamahaánga. 2 Habwe embabazi yoómwe, Múungu akaampa emilimo yo kubalaanganila íimwe Empola Nzima. Nniinsoombookelwa nka nikwo éecho mwaámazile kuchihulila. 3 Múungu weényini akaánsuululila entaahililo yoómwe éezo ekaba eli olufubo. Ndamazile kubaándikila habwe éecho ha amagaambo mache. 4 Kamulikusoma amagaambo áago naayaandikile, nimuhicha kumanya óokwo nniinsombookelwa éezo entaahililo yo olufubo lwa Múungu habwa Kristu. 5 Kala áaho, Múungu talabasuululwiile abaantu óogwo omuháanda gwoómwe. Náho óobu akozesize Omwooyo gwoómwe kuzisuululila entumwa na ababáasi boómwe abatakatíifu. 6 Nikwo kuzila oóti, óobu na áabo abaantu abatali Abayahudi nibahuungula ebizima éebyo Múungu yaloongize abaantu boómwe. Abaantu bóona áabo abalikwiikiliza Empola Nzima, baábeele nko omubili gúmo, na nibakoba hamo embabazi éezo Múungu akalagana kulabila ahali Kristu Yeézu.7 Múungu akaankola kuba omuhálila wo kulaangaana éezi Empola Nzima, kulugiilila omu ngabilano ye embabazi yoómwe. Akaampa engabilano éezo habwo obuhicha bwoómwe bukúlu. 8 Íinye ndi muto kuchila abatakatíifu ba Múungu bóona na amazima tiinkwiílwe butúnu, náho Múungu akaampa embabazi éezi yo kwoólekeelela Abanyamahaánga obuhite bwa Kristu obutéena ndeengo. 9 Múungu, omuhaangi we ebiintu byóona, akaampa emilimo yo kubateékelela abaantu bóona, basoombookelwe kuluunzi óokwo alikuhikiiliza entaahililo yoómwe éezo akaba afubile obuchilo bwóona. 10 Akakola aátyo kuba, amasala goómwe ga akazeendele kéenzi, gasombooke ha batégeki no omu butwáale bwo omubwiikalo bwe emyooyo, omu kulabila entaahililo ye ekelezia. 11 Múungu akakola aátyo, kulugiilila entaahililo yoómwe ye ebilo byóona, éezo akahikiiliza habwo omuháanda gwo Omukáma wéetu Kristu Yeézu. 12 Óobu, tukaáhicha kuhika ahali Múungu twiina obugimi, habwo kuba nitumwiikiliza Kristu Yeézu na twaakwaátangeene náwe. 13 Ha bwéecho, nniinsaba mutaákufwa emiganya habwe ebyaágalalo éebyo ndikubona ha bwéenyu. Éebyo nibibaleetelela nka nikwo nimuhaábwa isima.
Paulo Naasabila Abakristu Basoombookelwe Engoonzi Za Kristu
14 Mbweenu, habwo kuba amagaambo áago góona, iinye nniimuteelela ebizwi no kumusaba Isiichwe Múungu. 15 Weényini niwe engeso ye ebiintu byóona byo omu igulu ne ebyo omúunsi. 16 Nniimusaba Múungu, habwi ikuzo lyoómwe likúlu, ababonese amagala aha muháanda gwo Omwooyo gwoómwe, gwoónyini gubakole mube emaanzi omu muganya, 17 kuba nka nikwo, Kristu atuúle omu miganya yéenyu, habwo okwiikiliza óokwo mwiina. Kaandi nniimusaba abahwéele kuguma omu ngoonzi. Muzile emizi no oluhazo lwe engoonzi. 18 Mumanye nka nikwo, íimwe hamo na abaantu bóona ba Múungu, mubóne kusombookelwa nka nikwo engoonzi zoómwe okwo zili mpaango bwooli ha bugazi, obuleehi, echéemo, ne echitubi. 19 Nniinsaba mubone kusombookelwa engoonzi éezo, kuba entúungwa zaanyu zisusane ne zoómwe.
20 Múungu akuzibwe! Weényini ahicha kukola amagaambo go kusobeza bwooli, kuchila áago tulikumusaba, nali áago tulikuteékuza nka nikwo yaakaáhicha kugakola. Weényini akola kwiingana na amagala, áago agakola emilimo omuli íichwe. 21 Akuzibwe habwi ikuzo lyoómwe éelyo elibonekana omu kelezia no omuli Kristu Yeézu. Akuzibwe ne enzaalwa zóona, obucha no obuchiile. Amina.