Kuluga Omulufu Kwiiza Omubulami
2
1 Íimwe mukaba muli nka abafwiile habwe ebiheno byéenyu. 2 Obuchilo óobwo, mukaba nimukola amagaambo mábi ge éensi éezi. Mukaba nimulikondoókela Izimu Elikúlu, omukáma wa amazimu omu bwíile. Weényini ahanuuluza áabo abatakumugoomokela Múungu.a 3 Íichwe twéena neechwe, tukaba tuli nka boónyini, tukaba nitukola ebikolwa ebye emibili no obweenze bwéetu bukaba nibuligila tubikole. Tukaba tuli nka abaantu abáandi okwo bali omuunsi éezi. Tukazaalwa ne entabuko yo obuzilwa, habwéecho tukanigahalilwa na Múungu, mala yakaátuchwaázikiile. 4 Náho Múungu no owe echiganyizi chiháango, ne engoonzi zoómwe ahali íichwe tiziina muhelo. 5 Íichwe tukaba tuli nka abafwiile habwe ebiheno byéetu. Náho Múungu akatukola kuba abalame hamo na Kristu.b Akatuchuúngula habwe embabazi yoómwe. 6 Omu kukwaátaangana kwéetu na Kristu Yeézu, Múungu akatuzoola kuluga omu bafwiile hamo náwe, yaatwiikaza hamo náwe tubone kutégeka hamo náwe omubwiikalo bwe emyooyo. 7 Akakola aátyo, abone kwoóleka omu buchilo obulikwíiza embabazi zóomwe ezisaagiliize omu mazima goomwe hali íichwe áabo twiina obumo omu kukwaátaangana na Kristu Yeézu. 8 Múungu akabachuungula habwe embabazi ye echiganyizi choómwe, aha muháanda gwo kwíikiliza. Óobwo buchuúnguzi tibukwiiza habwe echifu chéenyu, éezo ne entono ye engabilano yéenyu kuluga hali Múungu. 9 Timulachuungwiilwe habwe ebikolwa bwéenyu, ha bwéecho, omuuntu weéna wéena atakwiiza akeebuga. 10 Múungu akatuhaanga nkokwo tuli. Akatuhaanga obusha habwo kukwaátaangana kwéetu na Kristu Yeézu, kuba tukole ebikolwa ebizima éebyo akatuloongeza tukole.Kukwaátanisibwa Kwa Abayahudi Na Abanyamahaánga Kulabila Ahali Kristu
11 Mbweenu mwiizuke nkokwo mwaabele muli áaho kala. Entabuko yaanyu neya abanyamahaánga, ti ya abaantu ba Múungu. Abayahudi bakaba nibabeéta íimwe “abaantu abatasázilwe ikóba lyo obukwaáta,” náho boónyini nibeeyeta áabo abasázilwe ikóba lyo obukwaáta, ensoonga okusalwa kwi ikóba okulikukolwa ne engalo aha mibili yáabo. 12 Mwiizuke nka nikwo, obuchilo óobwo timulabeele nimumusoomboókelwa habwa Kristu. Mukaba mutakweehuliliza na abaantu ba Iziraeli, mukaba muli abazenyi áabo timulabeele mwiinakwíile endagano yoóna yóona omu ndagano yáabo. Timulabeele ni itegezo na mukatúula nka abaantu áabo abatakumusoombookelwa Múungu omuunsi éezi. 13 Náho óobu, habwo kukwaátaangana kwéenyu na Kristu Yeézu, íimwe áabo kala áaho mukaba muli hala na Múungu, óobu mwaáleésilwe héehi habwo omuháanda gwe enságama ya Kristu. 14 Kristu weényini aleesile obuhóolo ahagáti yéetu, Abayahudi na abaantu abatali Abayahudi. Akatukola íichwe áabo tukaba tutageene, kuba no obumo. Akeehaho obubisa óobwo bwaatutaaganiseze nko olusíika. 15 Kayaasohweeze omubili gwoómwe, akeehaho ebilagilo bya Múungu hamo na ebilagilo byoómwe, kuba kuluga embága ibili éezo, akole embága eémo eénsha. Bityo nikwo akaléeta obuhóolo ahagáti yéetu. 16 Kristu akeehaho obubisa bwéetu habwo omuháanda gwo kufwa kwoómwe ahamusalaba. Akakwaátanisa embága ibili éezo kuba eémo no kutukwaátanisa ahali Múungu. 17 Mbweenu, Kristu obuchilo akeeza, yasuugaanisa Empola Nzima zo obuhóolo, hali íimwe áabo mukaba timukumusombookelwa Múungu, na hali áabo Abayahudi abaabele nibamusoomboókelwa. 18 Habwo kuba Kristu akafweela ahamusalaba, kulabila hali weényini, íichwe twéena, Abayahudi na abatali Abayahudi, tubonesize omwáanya gwo kumwiílila héehi Isiichwe habwo omuháanda gúmo gwo Omwooyo Mutakatíifu.
19 Mbweenu óobu, íimwe ti abazenyi nali abahiínguzi kaandi, náho mwaábeele abatúuzi hamo na abaantu ba Múungu, abaantu bo olugaanda lwoómwe. 20 Íimwe mwaábeele nke éenzu éezo eyoombekilwe aha luhazo, no oluhazo óolwo ne entumwa na ababáasi.c Kristu Yeézu weényini niwe ikulugusi igazi lyo oluhazo óolwo. 21 Weényini niwe alikwoómbeka ikiindaánsi lyóona kuhicha nilikwaatana kuluunzi, no kulikola libe liháango nke éenzu ya Múungu entakatíifu habwo Omukáma. 22 Aha kukwaátaangana náwe, íimwe kaandi, nimukwaatana hamo na abáandi bóona, kuba obwiikalo bwa Múungu ha muháanda gwo Omwooyo gwoómwe.