Abaefeso 1

Olwaandiko Lwa Paulo Ha

Abaefeso

Empola

1 Íinye Paulo, nkéetwa habwe engoonzi za Múungu, kuba entumwa ya Kristu Yeézu. Niimbaandikila íimwe abatakatíifu ba Múungu áabo mulikutúula omu chaalo cho óokwo Efeso. Íimwe muli abeésigwa aha kukwaátaangana na Kristu Yeézu.

2 Embabazi no obuhóolo ebilikuluga hali Isiichwe Múungu, na aha Mukáma Yeézu Kristu, bibe hamo neemwe.

Emigisa Yo Omwooyo

3 Akuzibwe Múungu ne Iíse wo Omukáma wéetu Yeézu Kristu, ogwo akatufuuha aha buli migisa zóona zo omwooyo, omubwiikalo bwe emyooyo, aha kukwaátaangana na Kristu.

4 Obuchilo Múungu akaba atakahaangile oluhazo lwe éensi, akatutóoza tube abaantu boómwe ha muhaanda gwo kukwaátaangana kwéetu na Kristu. Akakola aátyo, atuboneseze kuba abatakatíifu áabo tutéena entaambala omuméeso goómwe. Habwe engoonzi yoómwe, 5 Múungu akaba alamwíile kuluga kala, kutukóla kuba abaana boómwe aha muháanda gwa Yeézu Kristu. Akalamula kukola aátyo, habwo kuba nikwo yaayeenzile. 6 Ha bwéecho, nitumusiima Múungu habwe embabazi zoómwe zo kusobeza, éezo akatuha busa aha omuháanda gwo Omwaana woómwe engaanzi.

7 Múungu akatuchuúngula kulabila enságama ya Yeézu Kristu, ensoonga atuganyiile ebiheno byéetu byóona, kwiingana no obwiinzi bwe embabazi zoómwe. 8 Náwe akatuha obusáago bwe embabazi zoómwe, kaandi aleeteliile tube na amasala góona no obweenze. 9 Akozile tusoombookelwe olufubo lwe echihika chizima che engoonzíze, na akeenda kuzikola kulabila hali Kristu. 10 Echihika cha Múungu ni nka nikwo, obuchilo óobwo yaayeenzile kabulihika, alyaátelanisa hamo ebiintu byóona ebyo omu igulu ne byo omúunsi, no kubikola bibe ahaansi yo obutégeki bwa Kristu.

11 Múungu akozile amagaambo góona kwiingana ne engoonzíze. Weényini akatutóoza íichwe Abayahudi kuba abahuunguzi bo obuchuúnguzi ha muhaanda gwa Yeézu Kristu, nkokwo chabele chili echihika choómwe kulugiilila kala. 12 Ha bwéecho, íichwe Abayahudi áabo tweebeembiile omu kumweésiga Kristu, tubone kuba omweésiingizo gwi ikuzo lya Múungu.

13 Neemwe kaandi áabo mutali Abayahudi, mwaahuliile amagaambo ga amazima, nizo Empola Nzima éezo eleesile obuchuúnguzi bwéenyu. Habwo kumwiíkiliza kwaanyu Kristu, Múungu náwe akabataho Omwooyo Mutakatíifu nko olumanyiso lwe endagano éezo yabalageene. Omu kukola aátyo, akooleka nka nikwo, íimwe na aboómwe. 14 Óogwo Omwooyo Mutakatíifu no omusiimbo hali íichwe nyini nka nikwo, Múungu naatuha byóona ebyo yalageene nka nikwo yaakatuhéele. Óogwo Mwooyo nigwo óogwo Múungu akataho kuhika obuchilo bwo kutuchuúngula íichwe abaantu boómwe. Tusiime ikuzo lyoómwe!

Paulo Naasabila Abakristu Ba Efeso

15 Nniimusiima Múungu, habwa amagaambo góona áago akatukolela. Kulugiilila óobu naahuliile empola za akazeendele okwo mulikumwiíkiliza Omukáma Yeézu no okweenda abaantu bóona ba Múungu, 16 tiínkuleka kumusiima Múungu ha bwéenyu. Nniimbeezuka omwáanya gwóona omu kusaba kwaanze. 17 Nniimusaba Múungu wo Omukáma wéetu Yeézu Kristu, Isiichwe owi ikuzo, ababoneseze omwooyo gwa amasala no gwo kusuululilwa, kuba mubóne kukula omu masala ha kumusombookelwa weényini. 18 Abahwéele emiganya yaanyu ebóne kusombookelwa itegezo lyo kutóoza kwoómwe okwo kuli, no okusoombookelwa obuhite bwo obuhuúnguzi bwi ikuzo lyoómwe óobwo yaalagiile abaantu boómwe. 19 Nniimusaba Múungu nkokwo muhiche kusombookelwa obuzizi bwoómwe bukúlu hali íichwe áabo tuli abeekiliza. Obuhicha óobwo bulikukola emilimo omuli íichwe, ni nka amagala goómwe maháango 20 áago akakola ahali Kristu obuchilo akamuzoola kuluga omu bafwiile. Mála yaamuta olubazu lwi isima lwo omu ngalo yoómwe yo obulyo omubwiikalo bwe emyooyo, 21 olugulu bwóoli kusáaga obukáma bwóona. Óokwo, Kristu naatégeka abatégeki bóona hamo na abali omubwiikalo bwe emyooyo, bóona abeene obutwáale, abeena obuhicha, abeena amagala, abeena ikuzo, na abeena obwanaángwa bwoóna bwóona. Naabatégeka niwe mukulu wa bóona, ti muunsi óomu kwoónka, nóobu omuunsi éezo alikwiiza. 22 Múungu amuheele Kristu obutégeki ahalugulu ye ebiintu byóona, ne ekelezia eheelwe weényini aábe niwe omutwe gwe ebiintu éebyo byóona. 23 Ekelezia nigwo omubili gwa Kristu, nayo eyizwiile no obuhikiilizwa bwoómwe. Weényini niwe alikuhikiiliza ebiintu byóona buli haantu.