Abazeele Na Abaana
6
1 Íimwe abayaánda, mubakoondookele abazeele baanyu, habwo kuba mukwateene no Omukáma Yeézu, kuba kukola mútyo ne echigaambo cha amazima. 2 Obakúze iíso na nyoko, éechi nicho echilagilo cha mbele echiina endagano nka nikwo, 3 “Obonese emigisa no kulama ebilo biinzi omúunsi.”a4 Neemwe ba táata, mutabachaáhukila abaana baanyu. Náho, mubalele omu kubahana no kubeégesa entúungwa nzima ezilikuluga aha Mukáma Yeézu.b
Ameégeso Habwa Abakáma Na Abazáana Báabo
5 Íimwe abazáana, mubakoondookele abakáma abalikubatégeka omúunsi éezi, aha kutiina no kweéganya na ha kugololokwa omuganya. Mubakoondookele nka nikwo mulikumukoondookela Kristu. 6 Na kaandi etaákuba kwoónka ha káanya áako balikubaleeba, kuba mubóne kweéseengeleza ha baantu, náho mube nka abazáana ba Kristu abakola ha muganya gúmo, áago agalikumusemelela Múungu, 7 ha chihika chizima nko kumugomookela Omukáma na tibo abaantu. 8 Musoomboókelwe nka nikwo, buli muuntu naasubizwa no kwiinaankula kuluga ha Mukáma kwiingana ne éebyo ebizima éebyo yaakozile, aábe ali omuzáana nali óogwo atali muzáana.c
9 Neemwe abakáma, mubakolele abazáana baanyu ebizima mútyo nyini. Obutabatiínisa, kunu nimusoomboókelwa nka nikwo, Omukáma wáabo no Omukáma waanyu aba oómo, náwe ali omu igulu, na nimusoomboókelwa nka nikwo weényini tazila bweendezi ha muuntu.d
Kukoza Ebikwáato Bya Múungu Ha Kulwaana Ni Izimu Elikúlu
10 Male, mugume kuba emaanzi omu kukwaátaangana no Omukáma, muzile obuhicha bwa amagala ga weényini. 11 Muzwaále ebikwáato byóona éebya Múungu, mubóne kuhicha kweétaanisa ne enteba zi Izimu Elikúlu. 12 Habwo kuba endwaana yeetu ti habwe enságama no omubili, náho nitulwaana no kunuga abatégeki na abeena obuhicha, abakulu be éensi yo obuzilwa, na aha magala ga amazimu agali omubwiikalo bwe emyooyo. 13 Habwe ensoonga éezo muzwaále ebikwáato byóona bya Múungu, mubóne kuhicha kweémela ha chilo cho obuzilwa, na kamulaaba mwaáhichize góona, mube mugumile. 14 Ha bwéecho mweemeelele, amazima gabe nko omusumi ogubanywa éenda, na amazima ga akazeendele kaanyu omumeeso ga Múungu gabe nke echizwaalo che enchiíngilizi ya aha kalezi. 15 Kaandi, echifu cho kwaátula Empola Nzima yo obuhóolo chibe nke enkeeto aha amagulu gáanyu. 16 Obusaago bwa áago góona, okwiikiliza kube nke enchingilizi omuungalo záanyu, ebahweele kuchiíngiliza emyaambi yóona yo omulilo gwo óogwo omuzilwa ali Izimu Elikúlu. 17 Obuchuúnguzi bube nke engofiíla yi isiinza aha mitwe yaanyu, ne echigaambo cha Múungu chibe nke embaanda éezo mulikuhaabwa no Omwooyo Mutakatíifu.
18 Mube nimusaba obuchilo bwóona omu ngaanda zóona za akasabile na akaleémbeleze, kwiingana óokwo Omwooyo Mutakatíifu alikubeémbelela. Mutaákweelemwa habwe echigaambo éecho, na mube bweémi kubasabila abatakatíifu ba Múungu bóona. 19 Mube nimuunnsabila neenye nka nikwo, Múungu aábe naámpa amagaambo go kugaamba, buli óobu ndaaba nniinyolekeelela habwa Yeézu Kristu, mbone kuba nniinyatula aha bugimi amazima áago Múungu akasuulula aha Mpola Nzima. 20 Íinye ndyo omugaambi we éezo Mpola Nzima habwa Yeézu Kristu, ne éecho nicho chilikuleételela mmbe omu ibohelo. Mbweenu, muunnsabile mbone kuhicha kwaátula aha bugimi nko óokwo ndikweendelwa.
Amagaambo Go Kulaga
21 Tikiko, mudugu wéetu engaanzi no omuhálila omweésigwa wo Omukáma Yeézu, naabagaambila buli chiintu, mubóne kusombookelwa óokwo ndikuzeendelela ne éecho ndikukola.e 22 Nniimusiindika hali íimwe, mubone kusombookelwa óokwo tulikuzeendelela no kubatiimbya emiganya.