Paulo Naalégelelwa Omuméeso Ga Omwaanaángwa Feliki
24
1 Kabyaabele byaáhiingwíile ebilo bitáanu, omukúlu wa abagabe ba Múungu Anania yaátuuka áaho omumuzihwa gwa Kaizaalia. Akahika hamo na abanyaampala báche ba Bayahudi, no omutoóngani oómo, izíina lyoómwe ni Tertulo. Áabo bóona baamumanyisa omwaanaángwa Feliki amagaambo áago bakaba nibamulégelela Paulo. 2 Paulo káyayesilwe ataahemo omugati, Tertulo yaabaanza kumulégelela naagaámba, “Owi isima Feliki, habwaáwe nitubona obuhóolo bwiinzi omuunsi yaawe, na ha bwiímeelelezi bwáawe amagaambo mábi nigasemezibwa kusaaga habwi ihaánga éeli. 3 Mbweenu nitugenaánkula amagaambo áaga góona hali buli muhaanda na buli hoona, ha kusiima bwooli. 4 Náho ntaákwíiza kukutamisa bwooli, nitukusaba otweégumisilize kutuhulíiliza amagaamhayo bo máche ha bufula bwáawe.5 “Twaamubona omuuntu óogu no muzaaza, omutaándiki wo musaambo omuBayahudi bóona omuunsi, kaandi no mweebeembezi we embága ya ababisa elikweetwa Abanazaléeti abatakukuúndilana ne edíini yéetu. 6 Kaandi akaleengesa okulofola éenzu ya Múungu, ahonyini twaámukwáata. [Twaayeenda kumuchwaáziika aha kwiingana ne ebilagilo byéetu. 7 Náho óogwo mukúlu wa abalwaanila ngoma Lisia yaáhika yaamutunyaga lwa amani kuluga omuungalo zéetu, 8 yaálagila nka nikwo abalegeelezi boomwe bahike omuméeso gaawe.] Obuchilo íiwe nyini olaamucheéngelela, niho olaamanya amazima ge éebi bigaambo byóona éebyo twáamulegelela hali íiwe.” 9 Áago magaambo go mwa Tertulo, Abayahudi baakuundilana nágo nka nikwo na aga amazima.
Paulo Naayehohóola Omuméeso Go Omwaanaángwa Feliki
10 Áaho omwaanaángwa yaámuliíngulila Paulo nka nikwo nawe agaámbe. Bityo nawe yaabaanza kugaamba, “Iinye niimmanya nka nikwo íiwe olabeele omulamuzi we éensi éezi ha mwaanya gwe emyáaka miinzi. Bityo iinye naánulilwa kweétoonganila omuméeso gáawe. 11 Íiwe nyini wakaáhichize kweékomeenteleza kuzima nka nikwo tibikahiíngwiile kusáaga ebilo ikumi na bibili kulugiilila obuchilo naahanamile kuzeenda Yeruzaléemu kumulámya óokwo Múungu. 12 Áaba abalikuundegelela tibalaánsaangile ndi omukuhakana na abaantu, nali kuleételela abaantu bazile omusaambo, gube óomwo omuunzu ya Múungu, nali omuunzu záabo ze emikobo, nali ahaantu ahaandi omumuzihwa. 13 Kaandi áaga amagaambo áago balikuundegelela, tibakuhicha kumanyisa nka nikwo na aga amazima.
14 “Áaga ndikwiigaamba omuméeso gáawe, niimmulámya Múungu wa besiichwe enkúlu, no kumuheéleza ahakulabila Omuhaanda,a óogwo abaantu aaba nibagaámba ne embága ya ababisa be ediini yéetu. Hamo na áago, niinyikiliza amagaambo góona agalikuzeendana ne Ebilagilo bya Musa, na agayaandikilwe omubitabu bya ababáasi. 15 Neenye niimutegeza Múungu, nka abaantu aba óokwo nabo balikumutégeza, nkokwo Múungu alaázoola abáfwiile bóona, abe entuungwa nzima ahamuganya, hamo na ababisa. 16 Habwéecho, niinyeéyomeleza obucha no obuchiile kutuula no omuganya gulikwéela ogwo ogutakuundegelela omuméeso ga Múungu, nali omuméeso ga abaantu ebilo byóona.
17 “Mbweenu kánabeele naámazile emyáaka miinzi ntaliho Yeruzaléemu, nkasuba mbone kubaleétela abaantu baanze echokubagasa habwa abahabi no kusohoza ebigabo hali Múungu. 18 Obuchilo áaba baantu abaansaangile niinkola áago omuunzu ya Múungu, nkaba naáyeyelize. Kaandi tiindaziilemo óomwo hamo ne embága ya abaantu, nali kukola omusaambo óomwo. 19 Náho óomwo omuunzu ya Múungu bakaba balimo Abayahudi abaandi abaalugile omuchaalo cha Asia. Áabo, nibo bakaba bahikiilwe kuundegelela áaha hali iiwe, kabaakubeele beena echigaambo choóna chóona habwiinye. 20 Nali áaba abaliho áaha, bagaámbe ebiheno byoona éebyo baabweene hali iinye obuchilo nayemeeliile omu Itegekelo ya Balusiingo Ba Bayahudi. 21 Bagaámbe byoona, náho kwoónka obuchilo niindaáya ahi iláka liháango omuméeso gáabo omukugaamba, ‘Iinye niinchwaaziíkwa omuméeso géenyu leélo habwo okuzooka kwa abáfwiile.’ ”
22 Feliki akasoombookelwa kuzima empola yo Omuhaanda. Bítyo yaayeemeeleza ha mwaanya itegekelo éezo, naabagaambila áabo abalegeelezi ba Paulo aáti, “Niindamula omuchwaáziiko habwe entoóngana yaanyu obuchilo óogwo omukúlu wa abalwaanila ngoma Lusia kaáleeza áaha.” 23 Áaho Feliki yaámugaambila omwiímeelelezi wa abalwaanila ngoma aáti, “Omweékomye Paulo, náho kaandi oóbe noomuha omwáanya gwo okwiíyagaalula. Abanywáani boómwe babe nibakuundilwa kumuhwéela cho kumugasa weényini.”
Paulo Omuméeso Go Omwaanaángwa Feliki Na Drusila
24 Obuchilo byaahiingwíile ebilo bíche, óogwo Feliki yéeza hamo na mukazi womwe Drusila, omuhalákazi wa Abayahudi. Áaho yaamweetela Paulo, yaamuhuliliza naahoyelela habwe empola zo okwiikiliza omukweékwaatanisa na Kristu Yeézu. 25 Yaazeendelela kubiteélaana hakubakoonza koonza habwe empola ze entuungwa nzima omuméeso ga Múungu, okutuula kuzima kwo kwiibalilila, na nka nikwo Múungu alibachwaaziíka abaantu. Obuchilo Feliki kaayahuliile éebyo, yaátiina. Yaámusubiza Paulo omukugaamba aáti, “Óobu wakaáhicha kuzeenda. Niinkweéta kaandi kiindaabonesa omwáanya.” 26 Feliki akaba naategeza nka nikwo Paulo amuhe empilya. Bityo entulo nyiinzi yaazeendelela kumwéeta Paulo, abone kuhooya náze.
27 Káhabeele yaáhiingwiile emyáaka ibili, Porkio Festo yaatwáala omwáanya gwo mwa Feliki. Nawe Feliki akaba ayeenda kweéseengeleza aha Abayahudi, bityo yaamuleka Paulo oomwo omwiibóhelo.