23
1 Áaho Paulo yaabakomela améeso áabo abi Itegekelo ya Balusiingo Ba Abayahudi, yaábagaambila, “Íimwe beene béetu, iinye mbele niintuula no omuganya gulikwéela ogutakuundegelela buchiile, kuhicha echilo cha leélo niintuúla kuzima omuméeso ga Múungu.” 2 Mukúlu wa abagabe Anania, kaayahuliile aátyo, ahonyini yaábalagila abeémeeliile héehi na Paulo nka nikwo bamutéele ikóofi hamunwa. 3 Niho Paulo yaámugaambila óogwo Anania aáti, “Neewe Múungu naakuteéla, íiwe, oluguta olusiigilwe echokaa!a Íiwe nooyikala áaha obóne kunnchwaáziika aha kwiingana ne ebilagilo, na kunu íiwe nyini tokubihikiiliza ebilagilo aha kugaamba nka nikwo nteélwe ikofi!”4 Áaho abaantu abeémeeliile omuumpelo baámugaambila, “Mbési, noohichaho oóta kumuzuma omugabe mukúlu wa Múungu?” 5 Paulo yaábasubiza, “Íimwe beene béetu, tinaásoombookelwa nka nikwo niwe omugabe mukúlu wa Múungu. Kuba chaandikilwe nka nikwo, ‘Otáakuba nogaámba kubi ha omutégeki wéenyu.’b”
6 Áaho omuli áabo balusiingo, Paulo akasoombookelwa nka nikwo héenamo Abasadukayo,c na Abafalisayo. Habwéecho yaahamuka ahi iláka omu itegekelo óomwo hakugaamba, “Íimwe beene béetu, iinye ndyo Omufalisayo, omwaana wa Abafalisayo. Niinchwaaziíkwa habwo kuba niintegeza nka nikwo abáfwiile balaázooka.” 7 Paulo káyaamazile kugaamba éebyo, háaba emyeéhakaniso omuli áabo Abafalisayo na Abasadukayo, ni itegekelo yoona baásaambaala omu kuzogootana. 8 Aha ensoonga, Abasadukayo bateekuza nka nikwo tiheenaho kuzóoka kwa abáfwiile, nali kubaho kwa maléeka, nali izimu. Náho Abafalisayo boónyini nibakuúnda nka nikwo áago góona galiho.
9 Áaho omuli áabo bakulu haaba omusuniko bwooli. Omuli áabo abeégesa be ebilagilo be edíini za Abafalisayo, beemeelela, baáhakana nibagaamba, “Tihaliho obuzilwa bwoóna bwóona óobwo twaabona aha muuntu óogu. Hámo lúundi omwóoyo nali maléeka yaágaamba nawe!” 10 Áabo bakulu ba Abayahudi baáhakana bwooli, niho óogwo omukúlu wa abalwaanila ngoma yaátiina nka nikwo bakaámulaansamula Paulo ebinogoka nogoka. Bityo yaábagaambila áabo abalwaanila ngoma boómwe nka nikwo batáahemo omugati yáabo Abayahudi lwa amani, babone kumuchuúngula Paulo, bamutwáale omu olwaanzabuga lwe enkáambi yáabo.
11 Omuunsimbaazi ye echilo éecho, Omukáma yaáyemeelela omuumpelo yo mwa Paulo, yaámugaambila, “Gumya omuganya! Nka nikwo waánnyatula áaha Yeruzaléemu, bityo nikwo olikuhatikwa oótyo nyini onsiínze óokwo omuchikaali cha Ruumi.”
Obuhanuuzi Bwo Kumwíita Paulo
12 Kabwaachíile enchaákala, áabo Abayahudi baazila obuhanuuzi bubi habwa weényini Paulo. Baazila endagano nka nikwo tibakulya, nali okunywa, mpaka babe baámwiísile Paulo. 13 Áabo abakozile óobwo buhanuuzi bakaba bali abaantu kusáagaho makumi aána. 14 Baazeenda aha bakulu ba abagabe na ha banyaampala ba Abayahudi, baábagaambila, “Twaálahila kuba ne echisiibo cho obutalya choóna chóona kuhicha twaámwiita Paulo. 15 Habwéecho óobu, íimwe hamo ni Itegekelo ya Balusiingo mumusabe omukúlu wa abalwaanila ngoma amuléete Paulo ahaansi hali íimwe. Mweékole nka nikwo nimweénda kusoombookelwa kuzima ebigaambo éebyo alikuchwaáziikilwa, ne éechwe tuli buligiligi kumwíita atakahikile áaha.”
16 Óobwo buhanuuzi bubi bwa Abayahudi áabo, kasi omwiihwa wa Paulo yaábuhulila! Bityo yaazeenda omuli óolwo olwaanzabuga luháango lwa abalwaanila ngoma, yaámumanyisa Paulo. 17 Áaho Paulo yaámweeta omwiímeelelezi oómo wa abalwaanila ngoma, yaámugaambila, “Otwáale óogu musígazi ahamukúlu, habwo kuba ayina echigaambo éecho alaamugaambila.” 18 Habwéecho óogwo omwiímweelelezi yaamutwáala óogwo musígazi ahali omukúlu, yaámugaambila, “Óogwo embóhe Paulo yaányeta. Yaansaba nka nikwo nkuleétele óogu musígazi, iíngu ayina echigaambo cho kukugaambila.” 19 Óogwo omukúlu yaamukola omusígazi óogwo ahamukono, yaamutwáala ahabweéseleke, yaámubúuza, “Nooyeénda kuúngaambila biíha?”
20 Óogwo musígazi yaámusubiza, “Abayahudi baákozile obuhanuuzi nka nikwo bakusabe obaleétele Paulo nyeéncha omuméeso gi Itegekelo ya Balusiingo baabo. Nibeekola nka nikwo nibeénda kusoombookelwa kuzima amagaambo áago alikuchwaáziikwa. 21 Náho otaákukoonzwa koonzwa, habwo kuba heena Abayahudi kusaágiliza makumi aána bali bweémi kumubaándila Paulo omumuhaanda. Baálahila kuhicha kufwa kwoómwe nka nikwo tibakulya, nali kunywa, kabalaaba batakamwiísile Paulo. Óobu nibeloónza, baliindiliile kwoónka obakuúndile.” 22 Áaho omukúlu óogwo yaámugaambila omusígazi óogwo omukugaamba, “Otamugaambila omuuntu weéna wéena nka nikwo waámanyisa éezi mpola!” Niho yaámukuundila azeénde.
Paulo Naatwaálwa Aha Mwaanaángwa Feliki
23 Kahaabaliile óogwo mukúlu yaáyeta abeémeelelezi bábili ba abalwaanila ngoma abali ahaansi yoómwe, yaábagaambila, “Muloónza abalwaanila ngoma magana ábili abalaazeenda lwa amagulu, hamo na abaandi makumi musaanzu abalaazeenda aha faláasi, na abaandi magana ábili abalaazeenda beemukize amachúmu. Áabo bóona babe bweémi kulugaho áaha esáaha isatu zo omuchilo, abo kuzeenda omumuzihwa gwa Kaizaalia. 24 Paulo nawe ahaábwe efaláasi zo kuhanama, abone kuhika kuzima owo omwaanaángwa Feliki.”
25 Óogwo mukúlu wa abalwaanila ngoma yaayaandika olwaandiko olulikugaamba luti,
26 “Íiwe owe isima, omwaanaángwa Feliki, iinye Klaudio Lusia niinkwaangalucha.
27 Óogu muuntu akakwáatwa na Abayahudi, nibeénda bamwíite. Náho iinye nkeeza na abalwaanila ngoma baanze, naámuchuúngula. Nkaba naágaambiilwe nka nikwo weényini no Omuruumi. 28 Nkeenda kumanya ensoonga éezo Abayahudi bakaba nibamulegelela, habwéecho naamutwaala omuméeso gi Itegekelo ya Balusiingo báabo. 29 Naamanya nka nikwo nibamulégelela aha amabúuzo áago gali habwe ebilagilo byáabo. Náho aha lyáago gi yaalégelelwa nago, tihaliho echigaambo choóna chóona éecho chaakuleteleeliile ayitwe, nali kubohwa. 30 Náho kánaamanyisizwe empola nka nikwo heena obuhanuuzi bubi habwa weényini, naámusiíndika óokwo hali íiwe. Kaandi nkabalagila áabo abalégelelezi boómwe nka nikwo óokwo niho beéze bamulégelele omuméeso gáawe.”
31 Habwéecho áabo abalwaanila ngoma baamutwáala Paulo nka nikwo baalagiilwe, baamutwáala omuchilo óomwo nyini baamuhicha omumuzihwa gwa Antipatri. 32 Kabwaachíile, áabo abalwaanila ngoma abaazeenzile lwa amagulu baasuba omu lwaanzabuga lwáabo oluhaango, baabaleka bazeenzi báabo abaazeenzile lwe efaláasi bazeénde hamo na Paulo. 33 Obuchilo áabo baahika óokwo omumuzihwa gwa Kaizaalia, no kumuhikiiliza omumikono yo omwaanaángwa óolwo lwaandiko, baáhikiiliza nawe Paulo hali weényini. 34 Omwaanaángwa káyaamazile kusoma óolwo lwaandiko, yaábabúuza, “Óogu muuntu no wa eensi chi?” Obuchilo yaasoomboóliilwe nka nikwo Paulo no owo omuchaalo cha Kilikia, 35 yaámugaambila, “Amagaambo gáawe, niingahuliiliza obuchilo abalégeelezi baawe kabaleéza.” Áaho óogwo omwaanaángwa yaalagila nka nikwo Paulo bamweemanye omuchikaali cho obutegeki bwa Herode.