22
1 Paulo yaábagaambila, “Íimwe beene béetu na bataata baanze, mukuhuliilize okweétoonganila kwaanze omuméeso géenyu!” 2 Áabo baantu kábaahuliile nkokwo Paulo naagaámba omululimi lwáabo lwe Echiebrania, baaguma kwiikala beésiliize bwooli. Paulo yaazeendelela kubasoomboolela aha kugaamba, 3 “Iinye ndyo Omuyahudi. Nkazaalilwa óokwo omumuzihwa gwa Tarso, omuchaalo cha Kilikia. Náho nkalelelwa áaha Yeruzaléemu. Nkeegeswa ahabuteéka na Gamalieli ebilagilo byóona éebyo twaaléekiilwe na baguuku béetu. Nkazila echihika bwooli kumuheéleza Múungu, nka íimwe nyini mwéena óokwo muli leélo éezi. 4 Nkabaágalaza bwooli abaantu abaakulaatiile Omuhaandaa óogu kuhicha noolu kubéeta. Nkaba niimbakwaáta abakwaáta na abakazi no kubanaga omwiibóhelo. 5 Kaandi noolu omugabe mukúlu wa Múungu hamo ni Itegekelo lya Baalusiingo bóonab ni baalubona baanze nkokwo áaga na aga amazima. Na áabo nyini nibo abaampeele olwaandiko lwo kubatwaálila Abayahudi bazeenzi béetu abali omumuzihwa gwa Damaásiko. Naazeenda óokwo mbone kubakwáata áabo badugu omuli Kristu bo óokwo, no kubaléeta embóhe áabo áaha Yeruzaléemu, babone kwaágalazwa.6 “Obuchilo nkaba ndyo omuluzeendo, omukanya nke esáaha mukaaga ziti zo omwihaangwe, neélilila kuhika Damaásiko. Ahonyini echeéngeezi chaamwéeka bwooli kuluga olugulu nichimmweekela hoona. 7 Naagwa ahaansi, naahulila iláka niliingaambila, ‘Sauli! Sauli! Kanoonyagaláza?’ 8 Áaho naábuuza, ‘Íiwe Mukáma, íiwe oli oóha?’ Yaánsubiza, ‘Iinye ni Yeézu owa Nazaléeti, óogu íiwe olikunyágalaza.’ 9 Áabo abaabele bali hamo neenye bakabona echeéngeezi, náho tibalalihuliile iláka lyo óogwo akagaamba gaamba neenye. 10 Naámubuuza, ‘Íiwe Mukáma, nkole chiíha?’ Yaánsubiza, ‘Yimeelela! Otáahemo omumuzihwa gwa Damaásiko, no óomwo niho olaagaambilwa habwa byoona éebyo olagiilwe obikole.’ 11 Aaho nkaba ntakuhicha kuhweeza habwo kumweeka kwo omwaangac óogwo, habwéecho áabo bazeenzi baanze baankwáata emikono, baányebeembelela, na bityo naáhika Damaásiko.
12 “Áaho hakaba haliho omuuntu oómo, izíina lyoómwe naayetwa Anania. Óogwo Anania akaba amugomokela Múungu omukukulaatila Ebilagilo bya Musa. Kaandi akaba naasiimwa na Abayahudi bóona bo óokwo. 13 Weényini akanyizaho, yaayemeelela héehi neenye, yaángaambila, ‘Íiwe mudugu wéetu Sauli, bona kuhwéeza kaandi!’ Akaziingo áako nyini naámuhwéeza.
14 “Yaángaambila, ‘Múungu wa besiichwe akakutóoza íiwe. Akakola aátyo obóne kusoombookelwa ensoonga yoómwe, no kumubona Óogwo Ayina Entuungwa Nzima, no okulihulila iláka lilikuluga omukanwa ka weényini, 15 habwo kuba nooba lubona woómwe. Olyaágaambila abaantu bóona empola éezo obweéne no kuhulila. 16 Mbweenu, hali chiiha nooyililwa? Yemeelela! Obatizwe, oyozwe ne ebiheno byáawe, omukweeta izíina lyoómwe.’
17 “Mala, kánabeele naasubile Yeruzaléemu, obuchilo naabeele niimmusaba Múungu omuunzu yoómwe, nkatwaalilizibwa omumeezaho. 18 Naamubona Omukáma Yeézu naangaambila, ‘Lahúka bwaangu! Olugemo Yeruzaléemu habwo kuba tibakubwiíkiliza obubona bwáawe ha bwaánze.’ 19 Naámusubiza, ‘Mukáma, boónyini nibamanya nka nikwo naazeenzile buli éenzu ye emikobo ya Abayahudi mbone kubasiindika omwiibóhelo no kubateela áabo abalikukwiíkiliza. 20 Kaandi obuchilo obwáamba bwa lubona wáawe Stefano bwaseésilwe, iinye nyini nkaba nyemeeliile halubazu, niinyikililizana ne echikolwa éecho no kubyeémanya ebizwáalo bya abaamwiísile.’ 21 Náho Omukáma yaánsubiza, ‘Ozeénde, habwo kuba niinkusiindika hala aha Abanyamahaánga.’ ”
Paulo Naayemanyisa Nkokwo Nawe No Omuruumi
22 Éecho chipípi cha abaantu bakaba nibamuhuliliza kuhicha káyaagaambile echigaambo éecho, niho baahamuka hamalaka gáabo no kuteela eyoómbo nibagaámba, “Mumwiíhe lugulu! Omuunsi éezi, Takugasa alame!” 23 Áabo baantu baaba nibateela eyoombo, nibazuúla no kuhuunga ebizwáalo byáabo no kusaamula enkuungu olugulu.d 24 Niho óogwo mukúlu wa abalwaanila ngoma yaábalagila abalwaanila ngoma boómwe nka nikwo bamutaashemo Paulo omu olwaanzabuga luhaango lwe enkáambi yáabo. Kaandi yaabagaambila bamukaguze Paulo omukumutéela ensaanzu, abone kumanya na habwaáchi echaaletelela áabo baantu bamwaánile. 25 Kábaamazile kumukoma ne enkóba, Paulo yaámubúuza mwiímeelelezi oómo wa abalwaanila ngoma ayemeeliile heehi omukugaamba, “Ngási nimukuundilwa ne ebilagilo kumutéela Omuruumi, achali atakachwaáziikilwe?”
26 Óogwo mwiímeelelezi wa abalwaanila ngoma kaayahuliile éebyo, yaazeenda hali mukúlu wáabo, yaámubuuza, “Nooyeénda kukola chiiha? Ha kuba óogu muuntu no Omuruumi.” 27 Óogwo omukúlu wáabo yaamwiizaho Paulo, yaámubúuza, “Ongaambile, íiwe oli Omuruumi?” Paulo yaámusubiza, “Éego, mazima nikwo.” 28 Óogwo mukúlu yaámugaambila, “Iinye Obulúumi bwaanze nkabubonesa hakuliha empilya nyinzi.” Paulo yaámusubiza, “Iinye ndyo Omuruumi wo obuteéka.”
29 Ahonyini áabo abalwaanila ngoma abaabele bali bweémi kumubuúliliza Paulo baalugáho baámuleka. Óogwo omukúlu wáabo nawe yaátiina káyaamanyile nka nikwo Paulo no Omuruumi, habwo kuba akamukoma.
Paulo omu Itegekelo Ya Balusiingo Bóona Ba Abayahudi
30 Nyeéncha eémo, óogwo lusiingo yaayeenda kumanya buli éecho chaaletelela Paulo kulégelelwa na áabo Abayahudi. Habwéecho yaámulekulila Paulo, yaálagila abakulu ba abagabe hamo ni Itegekelo ya Balusiingo bóona bakobe hamo. Kahaabaliile yaámuleta aheéfo Paulo, yaamwiimeleza amumeeso gáabo.