Paulo Kuza Omuunsi Ya Makedonia Na Bugiriki
20
1 Óogwo musaambo kagwaahwéele, Paulo yaayeta abaheémba ba áaho. Káyaabele yaámazile kubagumya emiganya, yaábalaga, mala yaazeenda omuunsi ya Makedonia. 2 Yaaba naahiingula embazu zóona, no kubagumya emiganya ha bigaambo biinzi. Niho yaáhika Bugiriki, 3 yeekalayo óokwo ameezi ásatu. Obuchilo akaba yeéliliza kubaanza oluzeendo lwo kusuba omuunsi ya Siíriya ha muhaanda gwo bwáato bwi itaanga, Paulo yaámanya nkokwo Abayahudi baázizile okweéhanuuza kubi habwa weényini. Habwéecho yaalamula asube omukulabila omuunsi ya Makedonia. 4 Paulo akazeenda hamo na Sopatero, mutábani wa Piiro owo óokwo Beroya, hamo na Aristariko na Sekuundo wo óokwo Teesalonike, na Gayo wo óokwo Deribe, na Timoteo, na Tikiko na Torofimo wo óokowo Asia. 5 Áabo baantu bakeébeembela no kutuliindilila óokwo omumuzihwa gwa Turoa. 6 Obuchilo byaáhwa ebilo bikulu bye Emikaate Ziteena Ituumbyo, twaábuga omubwáato bwi itaanga kuluga omu chaalo cha Filipi. Twaázeenda oluzeendo lwe ebilo bitaanu twaáhika omumuzihwa gwa Turoa, áaho niho twaabugana na bazeenzi béetu. Tweekala áaho ebilo musaanzu.Paulo Naamuzóola Eutiko Omumuzihwa Gwa Turoa
7 Echilo cha Halwaamukáaga olweébazo, tukakoba hamo, tubone kumenyula omukáate. Áaho Paulo yaaba naabiteélaana abaantu hakubakoonza koonza, yaazeendelela kuhicha ituumbi, habwo kuba akaba ayina oluzeendo nyeéncha eémo. 8 Tukakoba omuchiseenge echoombeekilwe olugulu ye éenzu. Óomwo hakaba heena emuli nyiinzi.
9 Aha ndoleelo ye éecho chiseenge, akaba ayikeeleho omusígazi, izíina lyoómwe naayetwa Eutiko. Óogwo Eutiko yaatwáalilizwa otúlo tulemiile bwóoli, habwo kuba Paulo akaba naazeendelela ha mwaanya mula kubiteélaana ahakubakoonza koonza abaantu habwa Yeézu. Niho, Eutiko yaaba yaálemeelelwa no otulo, yaákoongoka kuluga eenzu ya kásatu olugulu, yeechekula ahaansi. Obuchilo abaantu baamwiímucha, baasaanga yaáfwíile. 10 Paulo nawe yaatúuka ahaansi. Yeénama hali óogwo omusígazi, yaámubuúmbatila, yaábagaambila áabo baantu aáti, “Mutatíina! Obulamíbwe achiinabwo!” 11 Mala Paulo yaahanama kaandi no okusuba omuchiseenge cho olugulu, yaamenyula omukaate, yaálya hamo nabo. Yaazeendelela kusoomboola mpaka omulucheelelélwa. Niho yaalugáho áaho, yaázeenda. 12 Áabo baantu baámutwaala óogwo omusígazi omúka, ali mzima, baásemelelwa bwooli omumiganya.
Oluzeendo Lwo Kuhika Mileto
13 Íichwe twaázeenda kuhanama omubwáato bwi itaanga, twaámwebeembelela Paulo omukuhika óokwo Aso. Óokwo niho twaakuundileene tuzekumuhíika weényini, kuba akaba yaálamwiile azeénde óokwo Aso lwa amagulu. 14 Káyaabugeene neechwe óokwo Aso, twáamuhíika omubwáato, twaázeenda hamo kuhicha twaahika Mitilene. 15 Echilo echakulaatiileho, twaatweeka itaanga twaazeenda, twaanogoza kweelekelelana ni iziinga lya Kiyo. Nyeéncha eémo twaáhika omwiiziinga lya Samo. Echilo echakulaatiilého, twaágoba omu chaalo cha Mileto. 16 Paulo akaba alamwiile tubuge tuhiingulizeyo Efeso, kuba akaba atakweenda ayilililweeyo omuchaalo cha Asia. Akaba nayaanguha lúundi kaalahicha, echilo cha Peentekoste chibone kumusaanga yaahikileyo óokwo Yeruzaléemu.
Paulo Naalaga Abanyaampala Be Ekelezia Yo Óokwo Efeso
17 Paulo káyaahikile Mileto, yaayeta abanyaampala be ekelezia yo óokwo Efeso beéze babugane náze. 18 Kábaahikile, yaábagaambila, “Íimwe nimumanya nka nikwo naatwíile neemwe obuchilo bwóona kulugiilia echilo cha mbele obu naalibatiile áaha omuunsi ya Asia. 19 Nkaba niimmuheéleza Omukáma aha kweécheesha bwooli, aha maziga na aha bileengeso naabweene habwe enteba za Abayahudi. 20 Tiindaselekile echigaambo choóna chóona éechaabele chiina omugaso omuli íimwe. Náho nkabeégesa habwéelu no kuhika buli éenzu. 21 Nkabaátulila abayahudi hamo na Abayunani abamulámya Múungu nkokwo bahuungame hali Múungu male bamwiikilize Yeézu, Omukáma wéetu.
22 “Leeba óobu, Omwooyo Mutakatíifu naánsiindíka nzeénde Yeruzaléemu. Tiínkumanya ebigaambo ebiliyo ebilaangwaayo óokwo. 23 Niimmanya kwoónka Omwooyo Mutakatíifu naanhana omuli buli muzihwa nka nikwo okubohwa no okuzugumisibwa nibiindiindilila iinye. 24 Náho tiínkubala obulami bwaanze kuba echiintu choóna chóona cho bukáani hali iinye. Niinyeénda kwoónka mbone kumala oluzeendo lwáanze lwo obuheéleza óobwo naayanaánkwíile kuluga ha Mukáma Yeézu, kwaátula Empola Nzima ze embabazi za Múungu.
25 “Leeba óobu, niimmanya nka nikwo omulíimwe mwéena áabo naabeele naahikileho no kuboólekeelela obukáma bwa Múungu, talibaho óogwo alibona kaandi obuso bwaanze. 26 Habwéecho, echilo éechi cha leélo niimbaatulila nkokwo iinye niinyela, tinyina entaambala yoóna yóona ahabwe enságama yo omuuntu weéna wéena.a 27 Kuba tiindeganyile kuboólekeelela íimwe ensoonga yóona ya Múungu.
28 “Mweékomye íimwe nyini, na mzeemanye embága yoona éezo Omwooyo Mutakatíifu yaabatiilého íimwe kuba abaleebelezi báabo, mubóne kuzeémanya ekelezia éezo ya Múungu nka abaliisa. Ekelezia éezo aguzile aha nsagama yoómwe weényini. 29 Niinmanya nkokwo kaándiba naálugileho, abaantu nke emisega ye enduluhe balyaábeesáakamo omuli íimwe, na tibalileka kubahutaaza néemwe. 30 Noolu kuluga omuli íimwe nyini, nibeemukamo abaantu abalaagaamba ebigaambo ebilikuchulika amazima, no kubakoobya abaheémba babone kubakulaatila boónyini. 31 Habwéecho, mwiikale meeso! Mwiizuke nkokwo aha miaka isatu, nyemisana no omuchilo, tiindalekileho kuhana buli oómo weenyu ha maziga.
32 “Óobu, naabahikiiliza omuungalo za Múungu, na aha chigaambo che embabazi zoómwe. Éecho chigaambo chiina obuhicha bwo kubagumya no kubaha obuhuunguzi íimwe hamo na áabo bóona abatooziibwe hali Múungu.
33 “Iinye tiindeégoongile efeeza, nali ezaháabu nali emyeenda yo omuuntu weéna wéena. 34 Íimwe nyini nimumanya nkokwo nkaba niinkola emilimo ha mikóno yaanze, habwe ebyo kuuntuunga iinye na bazeenzi baanze. 35 Ha buli chigaambo éecho nkozile, nkabooleka nkokwo ni lwaampaka kukola emilimo aha bweeyomeleza tubone kubazuna abaantu abatéena magala. Na kaandi, twiizuke ebigaambo byo Omukáma Yeézu éebyo weényini yaagaambile, ‘Okusohoza kwiina omugisa obusaago kuchila kwaanaankula.’ ”
36 Paulo káyaamazile kugaamba éebyo, yaatéela ebizwi hamo na áabo bóona, yaámusaba Múungu. 37 Buli oómo yaáchula bwooli, baaba nibamubuumbatila omubicha no kumunyweégela. 38 Echaleételiile bazululukwe muno muno chikaba chili echigaambo éecho akagaamba nka nikwo, tibalimubona kaandi obuso bwoómwe. Baámuseéndekeleza mpaka baamuhicha aha bwaato óobwo bwi itaanga.