Paulo Naayolekeelela Abaantu Ba Efeso
19
1 Obuchilo Apóolo yaabele ali Koliinto, Paulo nawe yaaba naahiingula omumituula ya hamulaambo, yaagolomokela omumuzihwa gwa Efeso. Óokwo yaabugana na abaheémba bunaanka, 2 yaábabuuza, “Obuchilo mwaamwiikiliize Yeézu, ngási mukanaankula Omwooyo Mutakatíifu?” Baámusubiza, “Mmahi, noobu kuhulila nkokwo aliho, titukahuliize.” 3 Yaábabuuza, “Ngási, ni bubatizo chi óobwo mwabatiizwe?” Baámusubiza, “Ha bubatizo bwa Yohana.”4 Paulo yaábagaambila, “Yohana akabatiza abaantu abaahuungamile ebiheno byáabo, yaaba naabagaambila nkokwo bamwiikilize weényini óogwo aleeza enyuma yoómwe, niwe Yeézu.” 5 Nabo kábaahuliile éebyo bigaambo, baábatizwa ahi izíina lyo Omukáma Yeézu. 6 Obuchilo Paulo akaba naabateelaho emikono, ahonyini Omwooyo Mutakatíifu yaabatuúkila, baabaanza kugaamba aha ndimi eziindi, nibasohoza obubáasi. 7 Na áabo abaantu, kupeetwa kwáabo kukahika abakwaáta nke kumi na bábili.
8 Paulo akakola améezi ásatu naataaha omuunzu yo mukobo gwa Abayahudi. Yaaba naabiteélaana nabo hakubakoonza koonza, naaleengesa kubahaniilila Abaantu habwo obukáma bwa Múungu, babone kwiíkiliza. 9 Náho abaandi baakola emiganya yáabo kuba egumile. Baayaanga kwiikiliza nibazuma Omuhaandaa omuméeso ga abaantu. Habwéecho Paulo yaalekana nabo, yaatwaála Abaheémba boómwe omwiisomelo lyo omuuntu ayetwa Tirano. Buchiile yaaba naabiteélaana óomwo nabo omukubakoonza koonza habwa Yeézu. 10 Paulo yaamala óomwo emyáaka ebili naamanyisa abaantu habwa Yeézu, abaantu bóona bo omuchaalo cha Asia baahicha kuhulila echigaambo cho Mukáma, Abayahudi hamo na Abayunani.
Abasigazi Ba Sikewa Nibateelwa Na Amazimu Mábi
11 Múungu akaba naakola eméenko za mahano ha muhaanda gwa Paulo. 12 Noobu abalwéele abaateelilweho éezo emyéenda no otusila kuluga ahamubili gwoómwe, amalwaala gáabo gakabalugaho, na amazimu mábi gakabalugáho abaantu.
13 Mbweenu hakaba heena Abayahudi abaandi abaazeenzile óoku no óokwo, nibagabiínga amazimu mábi omubaantu. Áabo bakagaamba izíina lyo Omukáma Yeézu nibaleengesa kugabiinga, nibagaámba, “Ahi izíina lya Yeézu óogwo Paulo alikwoólekeelela, niimbalagila nkokwo mulugého ha muuntu óogu!” 14 Omuli áabo hakaba heena abasigazi musaanzu ba Sikewa, omukúlu oómo wa abagabe ba Múungu. 15 Náho izimu libi lyaábasubiza, “Niimmusoomboókelwa Yeézu, na niimmusoomboókelwa Paulo, náho íimwe muli baáhi?” 16 Ahonyini óogwo muuntu ayaabele akwaasilwe ni izimu libi yaábagulukila áabo, yaabasiinga amagala. Yaábateela bwóoli, kuhika beélukila ahéelu bali busa beeno obuhuta.
17 Empola ye éebyo yaasaambáala bwooli omuBayahudi no omuBayunani abamulámya Múungu ba áaho Efeso. Áabo bóona baaba baazila okweétimwa, ni izíina lyo Omukáma Yeézu lyaaba nilikúzwa. 18 Áaho abaantu beenzi abamwiíkilize Yeézu beégaamba omuméeso ga abaantu ha bikolwa byáabo éebyo bakaba bakozile. 19 Na abaantu beenzi omuli áabo abakozile amagaambo go obulozi baásuumbya ebitabu byáabo, baábyóocha omulilo omuméeso ga abaantu. Kabaapeesile obukáani bwe éebyo bitabu byóona, baasaanga nka nikwo nibuhika ebinogoka bye efeeza ebihuumbi makumi atáanu.b 20 Bityo echigaambo cho Omukáma chikasaámbaala omubaantu, no kusaágiliza ha buhicha.
Omusáambo Muháango Omumuzihwa Gwa Efeso
21 Kábyaabele byaáhweele éebyo byóona, Paulo yaalamula omumwooyógwe nkokwo alabile omuunsi ya Makedonia, ne ya Akaya, azeende omuchikaali cha Yeruzaléemu. Yaagaamba aáti, “Kaandaaba naáhikileyo óokwo, kaandi ni lwaampaka nhike kubona echikaali cha Ruumi.” 22 Bityo akabasiindika abaantu bábili omubahwéezi boómwe, Timoteo na Erasto, kuzeenda óokwo Makedonia, weényini yaasigala ha mwaanya omuchaalo cha Asia.
23 Ha buchilo óobwo nyini áaho Efeso, haabaho omusáambo muháango bwóoli habwo Omuhaanda guliinya. 24 Kuba omuli óogwo omuzihwa hakaba heena omuheesi we ebisusano bye efeeza, izíina lyoómwe ni Demetiriusi. Nawe akaba ahéesa otuzu twe eféeza twa múungu wáabo we echikazi alikwéetwa Aritemi, na akaba ababonesa abahéesi bazeenzíbe ibona liháango. 25 Weényini akabasuumbya áabo abaheesi bazeenzíbe, hamo na abakozi abáandi abaabele nibakola emilimo éezo. Yaábagaambila, “Íimwe bakwaáta, nimusoomboókelwa kuzima nkokwo obuhite bwéetu nibutegeza isuluza eeli. 26 Óobu mwaábona no kuhulila óogwo Paulo óokwo alikubakoonza no kubahiindula omunsoonga abaantu beenzi ba áaha Efeso, hamo héehi echaalo chóona cha Asia. Naagaambila abaantu nkokwo ebisusano éebyo bilikukolwa ha mikono ya abaantu tí bamúungu ba amazima. 27 Eliho entaambala nkokwo éezi milimo yéetu neebaanza kuhaabwa izíina libi. Na tí bityo kwoónka, kaandi ne eenzu ya múungu wéetu mukúlu Aritemi, nayo neebalwa kuba tí kaantu. Noobu na Aritemi weényini, óogu alamibwa omuchaalo chóona cha Asia no omuunsi eziindi zóona, naatuúchwa kuluga obukúlu bwoómwe.”
28 Abaheesi áabo kábaahuliile ebigaambo éebyo bya Demetrio baakwaatwa echihulumuko muno. Baabaanza kuteela eyoombo nibagaámba, “Aritemi wa Abaefeso niwe mukúlu!” 29 Omuzihwa gwóona gwa Efeso gwaaba no okutahwa tahwa. Abaantu babakwáata Gayo na Aristariko, abatuuzi ba Makedonia abaazizile oluzeendo hamo na Paulo. Baatáahilamo hamo omwiikobezo lye emizaano. 30 Paulo yeegoonga nkokwo aázemo omuumbaga éezo ya abaantu, náho abaheémba bazeenzíbe tibalamukuundiile. 31 Noobu na abaandi banywaanibe omubakúlu bo óokwo omuchaalo cha Asia, nabo bamusiindikila empola yo kumwaangila nkokwo ataákutaahámo omu lugo hali áabo baantu.
32 Embága éezo baazila omubuyaangano bwóoli. Abáandi bakaba nibateéla empamo baáti, na abáandi nibahamuka kuundi. Abeenzi tibalamanyile noobu ne echabakobize óomwo. 33 Abayahudi bamusiindika Alekisanda omuméeso ga áabo baantu. Áaho abaantu abáandi baamuhanuuza ahiilaka liháango. Nawe yaábazibikiliza ahamukono áabo abaantu bóona nkokwo beesize, habwo kuba akaba naayeénda kweehohóola omuméeso gáabo. 34 Náho obuchilo bamanyile nkokwo weényini no Muyahudi, baatela eyoombo hamo aha masaaha ábili, nibagaámba, “Aritemi wa Abaefeso niwe mukúlu!”
35 Omuhelo, omwaandiki mukúlu wo omuli óogwo omuzihwa yaabachuleeza áabo baantu. Yaábagaambila, “Íimwe bakwaáta ba Efeso, buli muuntu omuunsi eziindi zóona naamanya nka nikwo óogwo omuzihwa gwa Efeso nigwo omwiímeelelezi we éenzu ya múungu mukúlu Aritemi, hamo ne echisusano choómwe echaalageele kuluga omwiigulu. 36 Habwéecho, tihaliho omuuntu óogu ayakwaangile amagaambo áaga, bityo nimuhatikwa muchuleéle, na mutaákuzila echipaampo choóna chóona ha bwiila. 37 Kuba áaba baantu áabo mwaaleta áaha, tihaliho chiintu éecho baayiba omuunzu ya bamúungu béetu. Noobu na múungu wéetu Aritemi weényini, tibaámuzuma. 38 Habwéecho kabilaaba Demetiriusi na bazeenzibe abaheesi beene ebilegelelo no omuuntu bunaanka, twíina ahaantu ho kulamulila ebilagilo, na abalamuzi be ebilagilo baliho. Áaho niho balikweendelwa balegelelane. 39 Na kamulaaba mwiine amagaambo agáandi goóna góona, mugatwáale aha mukobo gwa abaantu ogulikwiikililizwa ne bilagilo byéetu. 40 Kuba tweéganye nka nikwo twaakaáhicha kulégelelwa habwo omusáambo muháango óogwo twaakola leelo. Neechwe titwíina kalyo áako tulaahicha kugaamba óomwo, habwo kuba óogu musáambo gubele guli busa.” 41 Káyaamazile kugaamba áago, yaabaleka bazeénde.