Itegekelo Lya Yeruzaleemu
15
1 Abaantu bunáanka bakaluga Yudea, baagolomoka áaho omumuzihwa gwa Antiokia kuluga Yudea. Baabaanza kweégesa abadugu omuli Kristu omukugaamba, “Kamulaaba mutasazilwe amakoba kwiingana ne entuungwa éezo twaalekiilwe na Musa, timukuhicha kuchuúnguka.” 2 Éecho chigaambo chaaleetelela Paulo na Balinaba nabo kuhakana bwooli na áabo baantu. Omuhelo, ekelezia ya áaho Antiokia yaalamula nkokwo Paulo na Balinaba hamo na abeekiliza abaandi omuli áabo bazeénde hamo Yeruzaléemu, babone kubugana óokwo ne ntumwa za Yeézu na aha banyaampala be ekelezia ahaampola ye éechigaambo éecho. 3 Ekelezia yaabasiíndika kuzeenda. Paulo na áabo bazeenzíbe, baalabila omuunsi ya Foonike, no omuli Samalia, baaba nibabasoomboólela abaantu nkokwo Abanyamahaánga bamwiikiliize Yeézu. Empola éezo zaábasemelela bwóoli abadugu bóona omuli Kristu.4 Kabaahikile Yeruzaléemu, baayenankulwa kuzima ne ekelezia yo okwo, hamo na entumwa za Yeezu, na abanyampala. Baabaha empola za byoona éebyo Múungu yaakozile kulabila hali boónyini. 5 Náho Abeekiliza bunaanka be embága ya Abafalisayoa baáyemeelela, baágaamba, “Abanyamahaánga nabo bahatikwe kusalwa amakóba, na balagilwe kukoondoókela ebilagilo byóona bya Musa.”
6 Habwéecho, entumwa za Yeézu na áabo abanyaampala be ekelezia baakoba hamo babone kweéhanuuza kuzima éecho chigaambo. 7 Kábaabeele baámazile omwáanya mula omukweéhanuuza, Peétero yaáyemeelela, yaábagaambila, “Íimwe beene béetu, nimumanya nkokwo bulugiilila kala Múungu akaantooza iinye kubaátulila Abanyamahaánga babone kuhulila no kwiikiliza echigaambo che Empola Nzima. 8 Nawe Múungu niwe alikumanya emiganya ya abaantu, akabaátulila nka nikwo naabeekiliza omukubaha Omwooyo Mutakatíifu nkokwo yaatuheele íichwe. 9 Habwéecho tiheenaho obuchilanisi obwo Múungu yaakozile hali íichwe na boónyini, habwo kuba na boónyini ha muhaanda óogwo nyini gwo kwiikiliza akabéeza emiganya yáabo. 10 Mbweenu, habwaáchi nimumuleengesa Múungu hakubatweeka omugaámba omubicha bya abaheémba, óogwo beesichweenkulu gukabalema, neechwe nyini nigutulema kugusutula? 11 Mmahi! Íichwe nitwiikiliza nka nikwo nituchuungulwa ha bwe embabazi zo Omukáma Yeézu, nka boónyini okwo balikuchuúngulwaho.”
12 Áaho embága yóona yeésiza chee! Baaba abokumuhuliliiza Balinaba na Paulo nibabasoomboólela nka nikwo emanyiso na amahano go okusobeza áago Múungu yaakozile omuli áabo Abanyamahaánga hakulabila hali boónyini. 13 Obuchilo kabamazile kusoomboola, Yakobo nawe yaagaamba aáti, “Íimwe beene béetu, munhuliilize! 14 Simonib yaátusoombooliile nkokwo Múungu hakubaanza akabeékomya Abanyamahaánga ahakutóoza abaantu kuluga omuli áabo habwi izíina lyoómwe. 15 Echigaambo éechi nichiikililizana hamo na Amagaambo ga ababáasi nkokwo gaayaandikilwe,
16 ‘Ahamuheleeluko gwe ebigaambo éebi, ndyaásuba,
neenye ndyaázoombeka kaandi éenzu ya Daudi eyaagwíile.
Niinyoombeka kaandi amatongo goómwe no kugasemeza,
17 kuba abaantu abaandi babone kumuloondela Omukáma, noolu áabo Abanyamahaánga,
bóona abalikwéetwa ahi izíina lyaanze, naagaámba Omukáma’c alikukola byóona éebi,
18 ebyaasoomboókile bulugiilila kala.”
19 Yakobo yaazeendelela kugaamba, “Habwéecho okulamula kwáanze ni kuti, tutaákubaagalaza Abanyamahaánga abalikumuhiindukila Múungu. 20 Náho nitweendelwa tubaandikile olwandiko lwo kubagaambila nkokwo beélige ne ebyookulya ebisohweezwe omukweétoongeleza ebisusano bya bamuungu, emize mibi yo obusiihani, kulya ebituungaánwa ebihotwéele,d no okunywa obwáamba. 21 Kuba buluga kala, ebilagilo bya Musa bibeele nibyoolekeelelwa omuli buli muzihwa, no kusomwa omuunzu ze emikobo za Abayahudi buli chilo cha Sabato.”
Olwaandiko Ha Abeekiliza Abanyamahaánga
22 Áaho éezo ntumwa za Yeézu na áabo abanyaampala, hamo ne ekelezia yoona yo óokwo Yeruzaléemu baalamula nkokwo batoóze abaandi omuli áabo abalaazeenda hamo na Paulo na Balinaba omu muchaalo cha Antiokia. Bityo omuli áabo badugu omuli Kristu, baatooza abeébeembezi bábili, oómo ni Yuda ayaabele ayetwa Barsaba, no oóndi ni Sila. 23 Áabo baátumwa kuzeenda no olwaandiko olulikugaamba luti,
“Íichwe entumwa hamo na abanyaampala, abadugu bazeenzi benyu ba Yeézu, nitubaangalucha íimwe abadugu omuli Kristu Abanyamahaánga abali omu chaalo cha Antiokia, no omuunsi ya Siíriya, no omuchaalo cha Kilikia. 24 Tuhuliile nkokwo abaantu bunaanka abalugile oweetu bakabagaambila ebigaambo byo kubahabisa, no kubaágalaza emiganya yéenyu. Íichwe titulabatumile. 25 Habwéecho, tweekililizana nkokwo tutoóze abakwaáta no kubasiíndika hali íimwe, beéze hamo ne engaanzi zeetu Balinaba na Paulo. 26 Abaantu áaba bali omubuhuta bwo obulame bwáabo ha bwi izíina lyo Omukáma wéetu Yeézu Kristu. 27 Habwéecho áabo twaabasiindika hali íimwe, Yuda na Sila, boónyini áaba nibabamanyisa ahamunwa gwáabo éebyo twaayaandika. 28 Kuba byaámunulila Omwooyo Mutakatíifu ne éechwe tweekiliza tutaákubatweeka omugugu gwoóna gwóona kusaaga amagaambo áaga. 29 Mweélige ne ebyookulya ebisohweezwe ha chitaambo che ebisusano, kunywa obwáamba, kulya enyama ze ebituungaánwa ebihotwéele, no kukola obusiihani. Kamuleeliga ne éebyo, nimuba mwaákola kuzima. Mube no obuhóolo.”
30 Kabáabeele baálagilwe, baagolomoka kuzeenda Antiokia. Baábakobya kobya abeekiliza, baabaha óolwo lwandiko. 31 Abeekiliza áabo kabaalusomile, lwaabagumya emiganya, baánulilwa. 32 Nabo Yuda na Sila, áabo abaabele bali ababáasi, baábagaambila áabo abadugu bazeenzi báabo ebigaambo biinzi byo kubagumya emiganya, no kubakola bagume. 33 Kábaabeele beékeele óokwo ha mwaanya, áabo abadugu omuli Kristu baábakuundila nkokwo basube óokwo hali áabo ababasiíndikile, baábalaga aha buhóolo. [ 34 Náho Sila weényini yaabona nkokwo ni kuzima asigaleyo óokwo.] 35 Paulo na Balinaba nabo bakasigala óokwo Antiokia, nibeegesa no kwoólekeelela echigaambo cho Omukáma, hamo na abaantu abáandi beenzi.
Paulo Na Balinaba Nibalekáana
36 Kabyaáhiingwiile ebilo, Paulo yaagaambila Balinaba aáti, “Tusube aha badugu omuli buli muzihwa óogwo twaayegesize echigaambo cho Omukáma, tubone kubayeélela no kuleeba nka nikwo balikuzeendelela.” 37 Omuluzeendo óolwo, Balinaba akeenda bamutwaale Yohana ayaabele ayetwa Mariko azeénde hamo nábo. 38 Náho Paulo yaabona nkokwo tí kuzima Mariko azeénde hamo nabo, habwo kuba akabaleka óokwo omuchaalo cha Paamfilia, na talazeendeliile kukola nabo emilimo.
39 Eecho chaaleetelela boónyini okuhakana kuhaango no obutahuliilizana, kuhicha baálekaana. Balinaba yaámutwaala Mariko, baazeenda hamo omubwáato bwi itaanga mpaka baahika omwiiziinga lya Kipro. 40 Paulo nawe yaatooza Sila. Naábo abadugu omuli Kristu baábasabila embabazi zo Omukáma, niho Paulo na Sila baázeenda. 41 Baalabila omuunsi ya Siíriya no omuchaalo cha Kilikia, nibagagumisa amakelezia.