Paulo Na Balinaba Óokwo Ikonio
14
1 Óokwo Ikonio, Paulo na Balinaba baazaamo hamo omuunzu yo mukobo ya Abayahudi nko obukuteeka bwáabo. Óomwo baáyolekeelela ha buhicha buháango mpaka Abayahudi beenzi beekiliza Yeézu, hamo na abaantu beenzi ba Abanyamahaánga. 2 Náho Abayahudi áabo abakaanga kumwiíkiliza Yeézu, baabaanza kusunika emiganya yáabo Abanyamahaánga, babone kubatamwa áabo abadugu omuli Kristu. 3 Habwéecho Paulo na Balinaba baazeendelela kwiikala ebilo biinzi áaho Ikonio, nibabagaambila abaantu aha kugima echigaambo cho Omukáma Yeézu. Omukáma nawe yaaba naamanyisa éecho chigaambo choómwe che embabazi omukubahikiliza kukola emanyiso na amahano. 4 Náho, abaantu bo omumuzihwa óogwo baataagana embága ibili. Omuli áabo bakaba nibakuundilana na Abayahudi, abaandi olubazu lwe entumwa.5 Omuli áabo Bayahudi na Abanyamahaánga, hamo na abategeki báabo, baázila omuzeenzo gwo kubeéfoolela kubi Paulo na Balinaba no kubatéela amabáale. 6 Náho obuchilo entumwa baábweene empola éezi, beelukila omuunsi ya Likaonia, omu chaalo cha Lusitira na Derbe ne engeegeelo ye éensi eziheleleene ne éezo. 7 No óokwo baaba niboolekeelela abaantu Empola Nzima za Yeézu.
Paulo Na Balinaba Omumuzihwa Gwa Lusitira
8 Omuli Lusitira, akaba alimo omuuntu óogwo akaba ali enziíngami bulugiilila kuzáalwa kwoómwe, na takahichaga kulibata. 9 Obuchilo Paulo akaba naayolekeelela, óogwo muuntu nawe akaba ayikeele áaho naamuhuliiliza. Paulo yaamuleeba omuméeso ahakumukomela, yaasoombookelwa nka nikwo ayina okwiikiliza kwo kuchizwa. 10 Nikwo Paulo yaámugaambila ahi iláka liháango, “Yimuka! Oyimeelele lwa amagulu gáawe.” Ahonyini óogwo muuntu yaáguluka, yaáyemeelela lwa amaguluge, yaabaanza kulibata libata áaho weénka!
11 Echipípi cha abaantu éecho kachabweene amaléeba áago yakozile Paulo, baabaanza kuhamuka omululimi lwáabo lwe Chilikaonia omukugaamba, “Bamúungu baátuuka hali íichwe omuunsuso ya abaantu!” 12 Baamweeta Balinaba izíina lya múungu wáabo oómo alikwéetwa Zeu. Na Paulo, baamweeta izíina lya múungu wáabo oóndi alikwéetwa Herme,a habwo kuba Paulo niwe akaba alyo omugaambagaambi mukúlu. 13 Ahéelu kache yo omuzihwa óogwo, hakaba heena éenzu ya múungu Zeu. Omugabe we éenzu éezo yaáleeta echimasa che ente no omukako gwe enyaso aha lwíizi lwo omuzihwa. Weényini hamo ne ebipípi éebyo bya abaantu bakaba nibeénda kubataámbila.
14 Náho entumwa Paulo na Balinaba kabaabihuliile éebyo bigaambo, baalaansamula ebizwáalo byáabo,b baáhulumuka bwaangu omugati ye ebipípi éebyo, kunu nibahamuka ahi iláka liháango, 15 “Íimwe baantu! Habwaáchi nimukola amagaambo áaga? Ne éechwe tuli abaantu kwoónka nke éemwe! Tuli áaha kuboólekeelela Empola Nzima nka nikwo, muléke kulámya ebiintu bitéena mugaso, mumuhiindukile Múungu owo obulami! Weényini niwe ayaahaangile igulu, ne éensi, ne enyaanza, na byóona ebilimo. 16 Obuchilo bwe enzáalwa za kala ezahiíngwiile, Múungu akabeékililiza abaantu ba amahaánga góona batuúle no kukola óokwo balikweéhulila. 17 Noolu bityo, talalekiile kweésoomboola. Habwo kuba íimwe akabakolela amazima. Weényini abaleetela enzula kuluga omwiigulu no kubaboneseza omwéezo aha mwaanya gwaágwo, nawe abahaágisa ebyookulya aha amanulilwa omumyóoyo yéenyu.” 18 Noobwo Paulo na Balinaba bakagaamba amagaambo áago, chikaba chigumile kubaángila abaantu be ebipiipi éebyo bataákubataambila.
19 Niho beeza Abayahudi abaandi kuluga Antiokia, na kuluga Ikonio. Baabakoonza koonza abaantu bo óokwo Lusitira, kuhicha baaba no obumo, baámutéela Paulo na amabaale. Baámukululila ahéelu yo omutúulo nibamanya nka nikwo yaáfwa. 20 Náho abaheémba kabaabele baákoba no kumuzoóngoloka, yeémuka, yaasuba omumutuulo. Nche eémo, yaalugaho áaho, yaazeenda hamo na Balinaba omu chaalo cha Derbe.
Okusuba Kwa Paulo Na Balinaba Óokwo Antiokia Omuunsi Ya Siíriya
21 Óokwo Deribe baayoólekelela abaantu Empola Nzima ya Yeézu no kubakoonza koonza béenzi omuli áabo mpaka kuba abaheémba. Kábaabaliile baásuba omukulabila omu chaalo cha Lusitira, Ikonio, na Antiokia. 22 Omu byaalo ebyo, bakagumisa abaheémba no kubatiimbya bazeendelele kuguma omukwiíkiliza kwáabo. Bakaba nibabagaambila, “Omukutaaha omubukáma bwa Múungu, tichikwiíle otalabile omubyaágalazo biinzi.” 23 Omubuli kelezia, Paulo na Balinaba baabatoóleza abaandi omuli áabo beekiliza kuba abanyaampala. Baazila echisiibo no kubasabila omukubahikiiliza omuungalo zo Omukáma, óogwo bakaba baamwiíkilize. 24 Paulo na Balinaba baalabila éensi ya Pisidia, baataahamo omuchaalo cha Paamfilia, 25 baahika omu chaalo cha Perga. Óokwo bakoolekeelela Empola ha bwa Yeézu, niho baagolomoka omumuzihwa gwa Atalia. 26 Buluga áaho babuga no obwaato bwi itaanga, baásuba omu chaalo cha Antiokia omuunsi ya Siíriya. Áaho niho obwa mbele bakaba basabiílwe babe aheéfo ye embabazi ya Múungu ha milimo éezo bakaba baámazile omuluzeendo lwáabo. 27 Obuchilo baahikíle kaandi áaho Antiokia, bakazeeta ekelezia. Baabagaambila góona áago Múungu yaakozile kulabila hali boónyini, na nka nikwo óokwo yaabachiíngulíile Abanyamahaánga olwíizi lwo kwiíkiliza Yeézu. 28 Beékala ha mwaanya mula áaho Antiokia hamo na abaheémba áabo.