Kuzunwa Kwa Peétero Kuluga Omwiibóhelo
12
1 Omubilo éebyo, omukáma Herode yaabaanza kubaágalaza abeekiliza abaandi abe ekelezia. 2 Akalagila Yakoboa mudugu wa Yohana ayitwe ha lubaadi. 3 Obuchilo káyaabweene nka nikwo echikolwa éecho chaábanulila Abayahudi, yaalagila na Peétero akwaátwe. Éechi chikabaho obuchilo bwe Echilo chikúlu che Emikaate Etéena Ituumbyo. 4 Káyaamazile kumukwáata Peétero, Herode yaalagila ateébwe omwiibóhelo. Yaamuhikiiliza ha bipípi bina bya abalwaanila ngoma bana bána, babone kumweékomya. Akaba ayeenzile amuchwaáziike omuméeso ga abaantu Echilo cha Paásika kachilaaba chaáhwéele. 5 Bityo, Peétero akaba atiilwe omwiibóhelo, náho ekelezia ekaba neyeéyomeleza bwooli kumusabila hali Múungu.6 Omuchilo cho kwiimukila echilo éecho Herode akaba yaálamwíile kumuchwaáziika Peétero, weényini akaba alyaamile ahagáti ya abalwaanila ngoma bábili, abohilwe ne eminyololo ebili. Ahéelu yo olwíizi lwe éezo nzu, abalwaanila ngoma abáandi bakaba nibaheekomya.
7 Ahonyini yeésulukizaho maléeka wo Omukáma yayemeelela ahaantu áaho Peétero akaba ali, omwaangab gwaáyaka omugati ye echiséenge éecho. Maléeka yaamukolaho Peétero omulubazu kumuhiinda, naámugaambila, “Yimuka bwaangu!” Male eminyololo éezo akaba akomilwe Peétero omumikono yaálagala ahaansi! 8 Áaho maléeka yaámugaambila, “Ozwaále ebizwáalo byáawe ne enkéeto zaawe.” Naye Peétero yaakola aátyo. Maléeka yaámugaambila, “Zwaála ebebo yaawe, onkuláatile!” 9 Peétero yaámukulaatila óogwo maléeka, niboolekela ahéelu yi ibóhelo. Náho Peétero talamanyile nka nikwo ebikolwa éebyo byóona bya maléeka bikaba bili bya mazima, akaba naateekuza nka nikwo naabona ameezaho kwoónka. 10 Peétero no óogwo maléeka bahiíngula ha abalwaanila ngoma ba mbele, na ba kabili, baahika aha olwíizi lwi isiinza lwi ileembo lyo kutaahilamo omumuzihwa. Olwíizi óolwo lwaáchiinguka lwoónka, baasohola ahéelu yi ibóhelo. Baalibata omuhaanda gúmo, ahonyini óogwo maléeka yaámuleka Peétero.
11 Áaho Peétero kayaámanyile nka nikwo áago agáamugwéela gaaba gatali ebiloosi, yaágaamba, “Óobu naamanya ha mazima, Omukáma yaansiindikiile maléeka woómwe. Yaánchuúngwíile kuluga engalo za Herode, no kuluga omumabi góona áago Abayahudi baabele nibategeza kunkolela.”
12 Obuchilo Peétero káyaamanyile éebyo, yaázeenda ahaanzu ya Mariamu, nyina Yohana ayetwa Mariko. Omuunzu éezo, abeekiliza beenzi bakaba bakobile, nibamusaba Múungu habwa Peétero. 13 Peétero yaateela hodi aha lwíizi lwi iléembo lye éenzu éezo. Omuhalákazi oómo omuzanakazi, izíina lyoómwe Roda, yeeza kuhuliiliza nka nikwo no oóha. 14 Obuchilo yaasoombookilwe iláka lya Peétero, yaánulilwa bwooli, yaásuba obutamuchiíngulila. Yaábagaambila bóona omuunzu, “Peétero ayemeeliile ahachisasi!”
15 Áabo baámubúuza, “Ngási waásala?” Náho óogwo omuhalákazi yaákomeenteleza nka nikwo libele lili iláka lya Peétero éelyo yaahulila. Niho baámugaambila, “Mazima óogwo ni maléeka woómwe.”
16 Omwáanya óogwo Peétero akaba naazeendelela kuteéla hodi ahi iléembo. Obuchilo kabachiíngwiile iléembo, baámubona, baásobelwa muno. 17 Peétero yaayemeéleza omukóno kubamanyisa beésize, yaábagaambila nkokwo Omukáma yaamusohoza kuluga omwiibóhelo. Niho yaábagaambila, “Empola éezi, mumugaambile Yakobo na badugu béetu abáandi.” Mala Peétero yaalugáho áaho, yaazeenda ahaantu ahaandi.
18 Kahaabeele omulucheelelelwa, óokwo omwiibóhelo abalwaanila ngoma baaba no kutahwa tahwa kwiinzi bwooli habwa áago agaámugwéela Peétero. 19 Herode yaalagila abalwaanila ngoma boómwe bamuloondele Peétero bwooli, náho talabweenwe. Habwéecho, yaalagila abalwaanila ngoma áabo abaabele nibamweékomya Peétero babuulilizwe. Obuchilo baabuzilwe cho kusubya, yaalagila beétwe. Káyaabaliile Herode yaalugáho áaho Yudea, yaazeenda óokwo Kaizaalia, yeekala óokwo ha mwaanya.
Okufa Kwo Omukáma Herode
20 Mbweenu, Herode akaba asaayile bwooli ha baantu ba Tíilo, na ba Sidóoni. Habwéecho abaantu áabo baamuzeendela Herode ahansoonga eémo kusaba nka nikwo babe no obuhóolo, habwo kuba omumizihwa záabo bakaba babonesa ebyookulya kuluga éensi ya Herode. Baámukóoba kóoba Bulasto, óogwo akaba ali omwiímeelelezi wa éenzu yo Omukáma Herode, akuundilane nabo omuméeso ga Herode.
21 Echilo éecho omukáma Herode akaba atóolize kubonana nabo, yaázwaala ebizwáalo byoómwe bye echikáma, yeékala aha chitebe choómwe, yaágaamba ebigaambo omuméeso ga abaantu. 22 Áaho abaantu áabo baabaanza kumweésiingiza, nibatéela eyoombo omukugaamba, “Éeli tilyo iláka lyo omuuntu! Éelyo ni iláka lya Múungu!” 23 Ahonyini, habwo kuba Herode talamuheele Múungu ikuzo lyoómwe, maléeka wo Omukáma yaámuteela Herode aha ndwáala yo kulumwa enzóka zo muúnda, yaafwa.
24 Empola za Múungu habwa Yeézu zikazeendelela kusaámbaala omu abaantu, na abeekiliza baáyoongela bwooli.
25 Nabo Balinaba na Sauli kabaamazile okuheéleza kwáabo kwo kutwáala empilya ezitoolizwe aha beekiliza óokwo Yeruzaléemu, baasuba Antiokia bali hamo na Yohana, alikwéetwa ahiiziina eliindi Mariko.