Peétero Naasoomboola Amagaambo Ageesuúlukiize Ha Abanyamahaánga
11
1 Entumwa za Yeézu na abadugu omuli Kristu abáandi óokwo Yudea, baahulila empola nka nikwo Abanyamahaánga nabo beékiliza echigaambo cha Múungu. 2 Habwéecho, obuchilo Peétero yaasubile Yeruzaléemu, Abayahudi áabo baabaanza kumweéfuuza, 3 nibagaámba, “Íiwe okataaha omuunzu eyina abaantu abatasazilwe amakobaa no kulya ebyookulya hamo nabo!”4 Niho Peétero yaábaanza kubasoomboolela amagaambo góona nka nikwo okwo byaabeeleho, naagaamba, 5 “Chilo chimo nkaba ndyo omumuzihwa gwa Yopa nimmusaba Múungu, naatwaalilizibwa na kubona ameezaho. Omumeezaho áago, naabona echiintu nki isuúka liháango elyaabele nilituúlwa ahaansi kuluga omwiigulu, kunu embazu zaályo iína zikwaasilwe, nalyo lyaatukila ahaampelo yaanze. 6 Nkalikomela améeso kuzima, naabona enyameéswa zo omuunsi eza buli lugaanda: enyameéswa eziina amagulu aána, enyameéswa éezo ezilikwaázula, ne enyonyi zo olugulu.
7 “Niho naahulila iláka niliingaambila, ‘Peétero, yimeelela! Baága no okulya!’ 8 Naágaamba, ‘Mmahi, Mukáma! Tiínkalyaaga mahi echookulya choóna chóona éecho chili omuzilo nali echilofo!’ 9 Náho nkahulila kaandi iláka éelyo kuluga omwiigulu, niliingaambila, ‘Otaákubyeeta no omuzilo ebiintu éebyo Múungu yaáyelize.’ 10 Echigaambo éecho chikabaho entulo isatu, mala ebiintu éebyo byóona byaákweéswa kusuba kaandi omwiigulu.
11 “Ahonyini abaantu básatu áabo abaatumilwe kuluga Kaizaalia baahika omuméeso ge éenzu éezo nkaba niinyikala. 12 Omwooyo Mutakatíifu yaángaambila nka nikwo nzeénde hamo nabo, ntaákuzila okutahwa tahwa. Habwéecho naazeenda nabo, na áaba abadugu betu mukáaga bakazeenda neechwe hamo. Obuchilo twaazilemo omuunzu ya Kornelio, 13 yaátusoomboolela nkokwo yaamubwéene maléeka omúka yoómwe, yaámugaambila, ‘Obasiindike abaantu kuza okwo Yopa, bamwéete Simoni óogwo alikwéetwa Peétero ayize. 14 Óogwo niwe alakugaambila empola, na hakulabila empola éezo íiwe na abaantu bóona be eka yaawe yóona nimuchuungulwa.’
15 “Kanabaandize kubagaambila abaantu áabo empola, niho Omwooyo Mutakatíifu yaabezaho, nkokwo yaatwiizileho habubaandizo. 16 Neezuka echigaambo éecho Omukáma akatugaambila, ‘Yohana akabatiza abaantu aha meenzi, náho íimwe nimubatizwa aha Mwooyo Mutakatíifu.’ 17 Habwéecho obwo obuhicha obwo Múungu akatuha íichwe áabo tulikumwiíkiliza Omukáma Yeézu Kristu, niyo éezo nyini yaábaha nabo áaba baantu. Mbweenu! Iinye ndi oóha nsiingaangáne na Múungu?”
18 Obuchilo Abayahudi áabo kebaahuliile amagaambo áago, beésiza. Baámweésiingiza Múungu nibagaámba, “Kasi, Múungu yaábaha obuhicha kulekela ebiheno byáabo Abanyamahaánga, babone obulame bwo obucha no buchiile!”
Kufúuhwa kwa Abeekiliza Ba Yeézu Óokwo Antiokia eya Syria
19 Abaandi ba Abeekiliza áabo abasaambeele aha kwaágalazwa kwiingana no kwíitwa kwa Stefano, bakeelukila omuuunsi ya Foonike, Kipro, no omuchaalo cha Antiokia. No óokwo hoona, baaba nibagaamba Empola za Yeézu ha Abayahudi boónka. 20 Náho abeekiliza abaandi kuluga éensi ya Kipro no omumuzihwa gwa Kurene baazeenda Antiokia. Áaba baabaanza kwoólekeelela Empola Nzima éezo zo Omukáma Yeézu noolu ha Abanyamahaánga. 21 No obuhicha bwo Omukáma bukaba buli hamo nabo, na abaantu beenzi bwooli baámwiíkiliza no kumukulaatila Omukáma.
22 Obuchilo kábaahuliile empola za abaheémba áabo omuli Antiokia, ekelezia ya Yeruzaléemu yaamutuma Balinaba azeénde óokwo. 23 Obuchilo yaahika óokwo, akabona nka nikwo Múungu yaabaha abaantu áabo embabazi zoómwe. Yaánulilwa bwooli, naabagumya emiganya bazeendelele ne ensoonga yo kuba abeésigwa ha Mukáma. 24 Balinaba akaba ali omuuntu ayetegéeliize na ayizwiile obuhicha bwo Omwooyo Mutakatíifu no kumwiíkiliza Múungu. No kukanya kwe embága ya abaantu bo Omukáma kwaáyoongela bwooli.
25 Mala Balinaba yaazeenda Tarso kumuloondela Sauli okwo. 26 Obuchilo yaamubwéene, yaámuleeta áaho Antiokia. Áabo bábili beekala ne ekelezia óokwo omwaaka gwóona, baaba nibéegesa abaantu beenzi bwooli ha bwa Yeézu. Áaho omuli Antiokia nimwo abaheémba ba Yeézu bakabáanza kwéetwa Abakristu.
27 Omubilo éebyo, bakéeza omuli Antiokia ababáasi kuluga Yeruzaléemu. 28 Oómo wáabo, izíina lyoómwe naayetwa Agabo, yaáyemeelela omumukobo, yaágaamba obubáasi ha muhaanda gwo Omwooyo Mutakatíifu nka nikwo enzala mpaango elyéeza omuunsi éezi yóona. Kahaabaliile, enzala éezo ekabaho omubuchilo Kaizaali Klaudio akaba naategeka. 29 Habwéecho, abaheémba baalamula nka nikwo, buli oómo wáabo, kwiingana no obuhicha bwoómwe, asohoze okuzuna habwa abadugu omuli Kristu bazeenzíbe áabo bakaba nibatuúla Yudea. 30 Baakola batyo, baabaha Balinaba na Sauli engabilano éezo, babone kuzitwáala ha banyaampala ba ekelezia yo óokwo Yudea.