Kornelio Omuruumi Naamweéta Peétero
10
1 Omumuzihwa gwa Kaizaalia hakaba heena omwiímeelelezi wa abalwaanila ngoma, izíina lyoómwe naayetwa Kornelio. Óogwo akeémeelelela abalwaanila ngoma igana omumbaga éezo yaayesilwe Embága ya Abalwaanila Ngoma ye Echiitalia. 2 Weényini akaba naamukoondokela no kweétaho hali Múungu, hamo na abaantu bóona omúka yoómwe. Akaba naamusaba Múungu buli mwaanya, no kubaha ebigabo ha abaantu abahabi. 3 Chilo chimo esáaha mweenda zíti za nyemisana, Kornelio akabona ameezaho. Omumeezaho áago, yaabona maléeka wa Múungu naamwiizáho. Maléeka óogwo yaámugaambila, “Kornelio!” 4 Nawe Kornelio yaamukomela améeso óogwo maléeka ha butiini, naamubuúza, “Mukáma, ni chiíha?”Óogwo maléeka yaámusubiza, “Okusaba kwáawe na nka nikwo olikuzuna abahabi byaahika omwiigulu na kuba obwiizukizoa omuméeso ga Múungu. 5 Óobu, osiindike abaantu bazeénde omumuzihwa gwa Yopa, bamuléete omuuntu alikwéetwa Simoni, izíina lyoómwe eliindi Peétero. 6 Naatuúla omuunzu ya Simoni, omuhazi we eémpu. Éenzu yoómwe éeli ahaangeégeelo ye enziba.”
7 Obuchilo maléeka yaamazile kugaambila Kornelio áago, yaalugáho. Kornelio yaáyeta abahalila bábili, no omulwaanila ngoma oómo omubahwéezi boómwe óogwo alikweétaho hali Múungu. 8 Kornelio yaábasoomboolela góona áago okwo gaabaho, yaábasiíndika bazeénde Yopa.
Ameezaho Hali Peétero
9 Nyencha eémo, obuchilo áabo baantu básatu bakaba beéliliza Yopa, Peétero yaahanama olugulu ye éenzub kumusaba Múungu. Ekaba éeli esáaha mukáaga zíti za nyemisana. 10 Yaalumwa enzala, yeegoonga kulya. Obuchilo bakaba nibamuloongeza echookulya, yaatwaalilizibwa no okubona ameezaaho. 11 Omumeezaho óomwo yaabona igulu lyaáchiinguka, ne echiintu nki isuuka liháango eli kwaasilwe embazu zaályo iína, ekaba neetuúchwa ahaansi mpaka ahi itaka. 12 Omugati yaályo hakaba heenamo buli lugaanda lwe enyameéswa: enyameéswa eziina amagulu aána, enyameéswa éezo ezilikwaázula ahaansi, ne enyonyi.
13 Áaho Peétero yaahulila iláka, nilimugaambila, “Peétero, oyimeelele, obaáge, mala oólye!” 14 Peétero yaámugaambila, “Mmahi, íiwe Mukáma! Tiínkalyaaga echookulya choóna chóona éecho echili omuzilo nali echilofo!”c 15 Éelyo iláka lyaámugaambila Peétero, “Otaákubyeeta no omuzilo ebiintu éebyo Múungu yaáyelize.” 16 Echigaambo éechi chaásubiililwa entulo isatu, niho elyo isuuka lyaasubibwa omwiigulu.
17 Obuchilo Peétero akaba achali acheébuuza ha bwe ensoonga ya ameezaho áago yaabweene, abaantu áabo básatu áabo bakasiindikwa na Kornelio baáyemeelela ahéelu yo omulyaango gwe éenzu yoómwe éezo. Bakaba baábuuliliize éenzu ye Simoni, nikwo baazimanyile éenzu niyo éezi. 18 Baatéela hodi no kubuuza, “Ngási, heena omuzenyi óomu, óogwo izíinalye ni Simoni alikwéetwa Peétero?” 19 No obuchilo Peétero akaba naateekuza áago meezaho, Omwooyo Mutakatíifu yaámugaambila, “Huliiliza! Heena abaantu básatu áaha, nibakuloondela. 20 Bityo Otuúke ahaansi, mala ozeénde hamo nabo. Otaákuba no kutahwa tahwa habwo kuba iinye niinye naábasiindika hali íiwe.”
21 Peétero yaatuuka ahaansi, yaábagaambila áabo baantu, “Iinye niwe óogu mulikuloondéla. Ha bwaáchi mwéeza?” 22 Baámugaambila, “Twaatumwa no omwiímeelelezi oómo wa abalwaanila ngoma, izíina lyoómwe naayetwa Kornelio. Óogwo aheébwa isima na abaantu bóona abali Abayahudi, nka nikwo weényini agomokela Múungu, kaandi no omuuntu we entuungwa nzima hamuganya. Maléeka omutakatíifu wa Múungu yaamugaambila akunyégeze omuunzu yoómwe, abone kuhuliiliza amagaambo áago olaamugaambila.” 23 Niho Peétero yaabanyegeza omuunzu, babe abazenyi boómwe. Nyencha eémo, Peétero na abazenyibe baabaanza oluzeendo, hamo na abadugu báche omuli Kristu kuluga Yopa.
Peétero Omuunzu Ya Kornelio
24 Echilo echakulaatileho, baahika omumuzihwa gwa Kaizaalia. Baasaanga Kornelio yaákoba kobize badugúbe, hamo na abanywaanibe, baliho babaliindiliile. 25 Obuchilo Peétero naataahámo, Kornelio akeeza yaámwaanaankula, yaateela ebizwi omuméeso gomwe no kwíinama ahaansi kumuha ikuzo. 26 Náho Peétero yaámweemeeleza naámugaambila, “Oyimeelele! Iinye ndyo omuuntu kwoónka nkéewe!” 27 Niho Peétero na Kornelio baataaha omuunzu kunu nibahooya, baasaanga abaantu beenzi bakobile omuunzu. 28 Peétero yaábagaambila, “Íimwe nimumanya kuzima nka nikwo no omuzilo íichwe Abayahudi kusiimbahala na abaantu ba amahaánga agáandi. Noobu kubayeélela, titukukuúndilwa. Náho Múungu yaanyoleka nka nikwo ntaákuteekuza omuuntu weéna wéena nkokwo no omulofo, nali no omuzilo. 29 Niyo ensoonga obuchilo nimuunnyeta, neeza nteena kweéganya. Mbweenu, na habwaáchi nimuunnyeta?”
30 Kornelio yaámugaambila, “Ebilo bisatu éebyo bihiingwíile, mbeele ndyo omúka niimmusaba Múungu, esaaha nke éezi, ensoonga esaaha mweenda nyemisana. Ahonyini naabona omuuntu ayemeeliile omuméeso gaanze azwéele ebizwáalo ebilikweengelela. 31 Yaángaambila, ‘Kornelio, Múungu yaahulila okusaba kwáawe, naayizuka nkokwo olikuzuna abahabi. 32 Habwéecho, óobu osiindike abaantu omumuzihwa gwa Yopa, bamuléete Simoni óogwo alikwéetwa Peétero. Naatuúla nko omuzenyi omúka ya Simoni, omusisiimi we eémpu.d Éenzu yoómwe éeli ahaangeégeelo ye enyaanza.’ 33 Niyo ensoonga ntumile abaantu hali íiwe bwaangu, neewe waakola kuzima kwíiza. Óobu twéena tuli omuméeso go Omukáma Múungu, tubone kuhulila buli chigaambo éecho Omukáma yaakulagila kutugaambila.”
34 Áaho Peétero yaágaambila abaantu áabo aáti, “Óobu niho naamanya nka nikwo, mazima Múungu tazila bweendeza omubaantu! 35 Naabakuúnda abaantu ba buli lugaanda áabo abalikumukoondóokela, no kukola amazima omuméeso goómwe. 36 Nimusoomboókelwa empola éezo weényini akasiindika ha Baizilaeli. Babéele niboolekeelelwa Empola Nzima zo obuhóolo hakulabila hali Yeézu Kristu. Óogu Yeézu niwe Omukáma wa abaantu bóona. 37 Kaandi nimusoomboókelwa amagaambo áago agagwíile omuunsi yóona ya Yudea. Gakabaandiza Galiláaya, obuchilo Yohana Omubátiza yaáyolekeeliile obubatizo. 38 Múungu yaamutoólize Yeézu owa Nazaléeti hakumwiítilila Omwooyo Mutakatíifu no obuhicha. Yeézu nawe akazeenda ahaantu hóona, naakola ebizima no kuchiza bóona áabo bakaba nibaagalazwa ni Izimu Elikúlu, habwo kuba Múungu akaba ali hamo náze.
39 “Neechwe nibo baalubona ba amagaambo góona áago Yeézu yaakozile omuunsi ya Abayahudi, na Yeruzaléemu. Bakamwíita ha kumubáamba aha musalaba, 40 náho Múungu akamuzóola echilo cha kásatu, yaamwooleka ha baantu. 41 Talabwéenwe ha baantu bóona, náho akabonekana hali baalubona áabo Múungu akaba yaátoólize kumubona, na baalubona áabo nibo íichwe, áabo twaaliile no okunywa hamo náze káyaabeele yaázookile kuluga omubafwíile. 42 Akatulagila kwoólekeelela abaantu Empola Nzima, no kugaamba okwaátula nka nikwo weényini niwe ayatooziibwe na Múungu, achwaaziíke abeene obulame na abáfwiile. 43 Amaandiko ga Ababáasi bóona gagaámba okwaátula nkokwo habwa weényini, omuuntu weéna wéena óogwo alikumwiíkiliza naaganyilwa ebiheno byoómwe kulabila ahi izíina lya Yeézu.”
Kwaanaankula Omwooyo Mutakatíifu Ha Abanyamahaánga
44 Obuchilo Peétero akaba achali naagaamba éebyo, bóona áabo bakaba nibamuhuliliiza, Omwooyo Mutakatíifu yaabezamo. 45 Áabo Bayahudi abeésigwa abo bakaba beézile hamo na Peétero, baákamaala bwooli kuleeba nkokwo Múungu yaaseesa obuhicha bwo Omwooyo Mutakatíifu ha Abanyamahaánga. 46 Kuba bakahulila abaantu áabo nibagaámba omundimi eziindie nibakumukuza Múungu. Áaho Peétero yaágaamba, 47 “Ngási heena omuuntu weéna wéena wo kwaángila abaantu áaba bataákubatizwa aha meenzi? Beenaankula Omwooyo Mutakatíifu nkokwo néechwe twaamwaanaákwíile.” 48 Habwéecho Peétero yaabalagila nka nikwo babatizwe ahi izíina lya Yeézu Kristu. Niho baámusaba Peétero ayikale nabo aha bilo bíche.