Kuhiindulwa Omuganya Kwa Sauli
9
1 Omwáanya óogwo, Sauli akazeendelela na amatiinisa goómwe go kwíita abaheémba bo Omukáma. Yaazeenda ha mugabe mukúlu wa Múungu, 2 yaámusaba amuhe enyaandiko zo kumumanyisa, azeénde nazo omuunzu ze emikobo ya Múungu zo omuzihwa gwa Damaásiko. Empapula éezo zimwiikililize nka nikwo, kaálasaanga óokwo omuheémba weéna wéena we embága elikwéetwa Omuhaanda,a bali abakwaáta nali abakazi, ababohe no kubaléeta Yeruzaléemu.3 Niho Sauli yaazeenda Damaásiko. Kayeelilize omumuzihwa, ahonyini omwaangab chiháango kuluga omwiigulu chaámumulikila embazu zóona. 4 Yaagwa ahaansi, yaahulila iláka nilimubuúza, “Sauli, Sauli! Ensoonga chi noonyagalaza?” 5 Sauli yaabuuza, “Íiwe, Mukáma oli oóha?” Yaámugaambila, “Iinye niwe Yeézu, íiwe óogwo olikwaágalaza. 6 Óobu, oyimeelele! Zeénda otaahemo omumuzihwa, óomwo noogaambilwa óomwo noogaambilwa áago ohikiiliilwe okole.”
7 Abaantu áabo abaabele nibazeénda hamo na Sauli baáyemeelela chée! Ha bwokuba nabo bakahulila iláka éelyo, náho tibalabweene omuuntu weéna wéena. 8 Sauli yeemuka ahaansi,yaáyemeelela, yaahuumbulula améeso goómwe, náho talahichize kuleeba chiintu. Áabo bazeenzíbe baákwaata omukonógwe hakumuhabula, baamutaashamo omuli Damaásiko. 9 Yeekala óomwo ha ebilo bisatu, talahichize kuhwéeza, kulya choóna chóona, nali kunywa.
10 Óokwo Damaásiko, hakaba heena omuheémba oómo wa Yeézu, izíina lyoómwe Anania. Omukáma yaámweeta Anania omumeezaho, “Anania!” Nawe yaáyetabila, “Kaláme, Mukáma.” 11 Omukáma yaámugaambila, “Óobu zeénda omuunzu yo mwa Yuda, éezo eli aha muhaanda gúmo ogugololokile. Obuulilize óomwo omuuntu óogwo ayaaluga omumuzihwa gwa Tarso, izíina lyoómwe naayetwa Sauli. Óobu naasaba Múungu. 12 Nawe yaábweene ameezaho. Omumeezaho áago, akabona omukwaáta izíina lyoómwe Anania nataaha omuunzu éezo alimo weényini, naátaho emikono haluguluye, kuba abone kuleeba kaandi.”
13 Náho Anania yaágaamba, “Mukáma, abaantu beenzi baángaambiile empola zo omuuntu óogwo na nka nikwo yaabakoliile ebíbi abatakatíifu báawe óokwo Yeruzaléemu! 14 No óobu alyáaha, ayina obuhicha kuluga ha bagabe abakulu abakwáate bóona áabo abalikusaba ahi izíina lyáawe.”
15 Náho Omukáma yaámugaambila Anania, “Zeénda kwoónka! Omuuntu óogwo, imutoólize aábe omuhalila waanze, abone kumanyisa izíina lyaanze ha Abanyamahaánga, ha bakama báabo, na nóobu aha Abayahudi. 16 Iinye nyini nniimwoolekeelela nka nikwo ni lwaampaka ayagalale bwooli habwi izíina lyaanze.”
17 Habwéecho, Anania yaázeenda, yaataaha omuunzu éezo. Yaataho emikono yoómwe halugulu ya Sauli, yaámugaambila, “Mudugu waanze Sauli, Omukáma Yeézu ayakweésuulukiize omumuhaanda obuchilo okaba nooyiza áaha. Omukáma óogwo yaántuma hali íiwe, obóne kaandi kuhweeza, mala oyizuzwe obuhicha bwo Omwooyo Mutakatíifu.” 18 Ahonyini ebiintu nka amagaamba byaálagala kuluga omuméeso go mwa Sauli, yaahicha kuleeba kaandi, yaáyemeelela, yaábatizwa. 19 Mala yaalya ebyookulya, yaazila amagala kaandi.
Sauli Naamuheeléza Yeézu Omumuzihwa gwa Damaásiko
Ha bilo bíche, Sauli akeekala hamo na abaheémba ba Yeézu omuli Damaásiko. 20 Ahonyini yaabaanza kuboólekeelela omuunzu ze emikobo ya Abayahudi, naabasoomboólela empola za Yeézu, nka nikwo weényini niwe Omwaana wa Múungu. 21 Abaantu bóona abo abamuhuliile Sauli baásobelwa bwooli, beébuuza, “Omuuntu óogu, tíwe óogwo akaba naayagalaza abaantu abalikusaba omwiiziina lya Yeézu óokwo Yeruzaléemu? Kaandi tíwe óogu ayeezila aha abakwáate abaantu áabo abatwáale aha abagabe bakulu ba Múungu?” 22 Náho Sauli akaba naáguma kubona amagala go kweégesa abaantu. Kaandi, akaba naabamanyisa Abayahudi ba Damaásiko aha Amaandiko Amatakatíifu nka nikwo Yeézu niwe Masiya, mpaka baalemwa kumuhakanisa.
23 Kabyaabeele ebilo biinzi byaáhiíngwíile, Abayahudi baakola okweehanuuza kwo kumwíita Sauli. 24 Omuchilo na nyemisana Abayahudi baaba nibamuteébeleza omumaleembo go omuzihwa óogwo, kuba kaálasohola babone kumwíita. Náho Sauli yaahaabwa empola zo obweehanuuzi óobwo. 25 Bityo, abaheémba boómwe baamutwaala omuchilo, baámutuucha ali omuchitukulu aha kulabila ahaantu aheene omwáanya omulukuta.
Sauli Óokwo Yeruzaléemu
26 Sauli akasuba Yeruzaléemu. Obuchilo óobwo káyaahikile, yaaba naaleengesa kukwaátaangana hamo na abaheémba ba Yeézu. Náho áabo bóona bakamutiina habwo kuba bakaba batakumwiíkiliza nkokwo yaabeele omuheémba wa Yeézu. 27 Náho Balinaba yaámutwáala Sauli aha ntumwa zo Yeézu. Yaábagaambila nkokwo Sauli akabona Omukáma omumuhaanda ali omuluzeendo kuza Damaásiko, na nkokwo Omukáma yaáhooyile nawe. Kaandi, yaabagaambila nka nikwo aha kugima yaayoleekeeliile abaantu bo óokwo ahi izíina lya Yeézu.
28 Habwéecho Sauli yeekala hamo na abaheémba ba Yeézu naataahámo no kusohola omuli Yeruzaléemu no okwoólekeelela abaantu empola ha kugima ahi izíina lyo Omukáma. 29 Akaba naahooya no kuhakana na Abayahudi áabo abagaambile Echiyunani, náho boónyini bakaba nibaloónda kumwíita. 30 Abadugu omuli Kristu, kabaamanyile empola éezo, baámuseéndekeleza mpaka omumuzihwa gwa Kaizaalia, no kuluga óokwo, baamusiíndika azeénde óokwo Tarso.c
31 Mála, ekelezia ekaba eyina obuhóolo embazu zóona zo omuli Yudea, Galiláaya, na Samalia. Abeekiliza ba buli haantu bakazeendelela kukomeela no kutiimbibwa omuganya no Omwooyo Mutakatíifu. Kaandi, abeekiliza áabo baaba nibamweeganya Omukáma ahi isima, no kukanya kwáabo kukazeendelela kwoongela.
Ainea Naachizwa
32 Peétero káyaabeele naazeénda buli haantu, chilo chimo akahika kubayeélela abatakatíifu áabo bakaba nibatuúla omu chaalo cha Lida. 33 Óokwo, yaasaanga omuuntu oómo omukwaáta, alikwéetwa Ainea. Óogwo akaba alagéele omubili, alyaamile ahachitabo ha mwaanya gwe emyáaka munáana. 34 Peétero yaámugaambila, “Ainea, Yeézu Kristu naakuchiza. Yimuka! Oyale echitabo chaawe.” Ahonyini Ainea yaáyemeelela! 35 Kahaabaliile, abaantu bóona abo abaatwíile omuli Lida, no omwi holóola lya Saroni, baámubona Ainea, baáhiinduka kumwiíkiliza Omukáma Yeézu.
Peétero Naamuzóola Dorkasi
36 Omumuzihwa gwa Yopa hakaba heena omukazi oómo, ali omuheémba wa Yeézu, izíina lyoómwe Tabita. (Omululimi lwe Echiyunani, izíina éeli ni Dorkasi.) Weényini akaba asuumbuusa abahabi, kaandi akaba akola ebikolwa bizima. 37 Ebilo éebyo akalwáala, yaáfwa. Abaantu baayoza omubili gwoómwe, baágulyaámika omuchiseenge echoombeekilwe olugulu ye éenzu. 38 Obuchilo óobwo abaheémba bakahulila nka nikwo Peétero akaba ali Lida, baábasiíndika abakwaáta bábili hali Peétero, habwo kuba Lida ekaba eli héehi na Yopa. Áabo baámugaambila Peétero, “Nitukusaba, oyize owéetu bwaangu!”
39 Peétero yeémuka, yaázeenda hamo nábo. Obuchilo kebaahikile, baamutwáala omuchiseenge echoombekilwe olugulu ye éenzu. Omwo, abakazi bóona abakaambwiile baámuzoóngoloka nibachula. Baamwooleka enkaanzu, ne ebizwáalo ebiindi éebyo Dorkasi akaba abaziila obuchilo achili mwooyo.
40 Mala Peétero yaábasohoza bóona ahéelu, yaateela ebizwi, yaámusaba Múungu. Mála yaáguhiindukila óogwo mutuumbi, yaágaamba, “Tabita, yemeelela!” Tabita yaahuumbuulula améeso goómwe, yaámuleeba Peétero, mala yeékala ahachitabo. 41 Peétero yaamukwaata omukóno, yaamuhweela kwiimeelela. Yaábeeta áabo bakazi abakaambwiile na abatakatíifu abáandi, yaabooleka Tabita, nka nikwo yaábeele mwooyo. 42 Empola ze éebyo zaásaambaala bwooli óokwo hóona omuli Yopa, abaantu beenzi baámwiíkiliza Omukáma. 43 Mala Peétero yeekala áaho Yopa ebilo biinzi, natuúla omuunzu yo omuhazi we eémpu, izíina lyoómwe Simoni.