Okwaágalazwa Kwa Abeekiliza No Kulaluka Kwáabo
8
1-2 Sauli nawe akabona nka nikwo, echigaambo cho kumwíita Stefano yaakuundileene nacho. Kabaabaliile abakwaáta áabo abalikumwiíkiliza Múungu baámuziika Stefano no kumwaálamila bwooli.Echilo éecho baamwiísile Stefano, ekelezia ya Yeruzaléemu baabaanza kwaágalazwa bwooli. Abeekiliza bóona baálaluka, baásaambaalila omuunsi za Yudea na Samalia. Entumwa za Yeézu boónka nibo abasígeele Yeruzaléemu. 3 Sauli nawe yaabaanza kusiingaalicha ekelezia. Weényini yaaba natáaha buli nzu, naabakulula abakwaáta na abakazi lwa amáani, naabatwaála no kubachiíngila omwiibóhelo.
Filipo Omubyaalo Bya Samalia
4 Abo beekiliza abasaámbéele, baaba nibabeegesa abaantu Empola Nzima za Yeézu buli haantu áaho baabele nibazeénda. 5 Filipoa nawe yaazeenda omumuzihwa gúmo gwa Samalia, yaabaanza kubaátulila abaantu bo óokwo Empola za Masiya.b 6 Abaantu beenzi bakaba nibamuhuliiliza aha bweétegeeleza, nibahulila no kuleeba emanyiso éezo akaba naakola. 7 Akaba naabiínga amazimu kuluga omubaantu beenzi, nigabalugaho kunu nigahamuka ahi ilaka. Akaba naabachíza beenzi áabo bakaba bali enziíngami na abalageele emibili. 8 Habwéecho abaantu bo omumuzihwa óogwo bakaba beena amanulilwa maháango.
Omulozi Simoni
9 Omumuzihwa óogwo, hakaba heeno omuhike oómo, izíina lyoómwe Simoni. Aha mwaanya mula, Simoni akaba naabasobéza abaantu bo omuchaalo cha Samalia hakukola obuhike, naayebuga nka nikwo weényini no omuuntu mukúlu. 10 Abaantu bóona, abato na abakulu, bakaba nibamuhuliiliza ha kweétegeeleza nibagaamba, “Óogu niwe obuhicha bwa Múungu óogwo alikwéetwa Obuhicha Bukúlu!” 11 Abaantu áabo bakaba nibamweekomya batyo habwo kuba akabasobeza ha mwaanya mula ne ebisobezo byoómwe. 12 Náho obuchilo abaantu kabekiliize Filipo, naabolekeelela Empola Nzima zo obukáma bwa Múungu na ha bwi izíina lya Yeézu Kristu, baábatizwa, abakwaáta hamo na abakazi. 13 Na weényini Simoni yaámwiikiliza Yeézu, yaábatizwa, yaaba naalibata hamo na Filipo buli haantu. Obuchilo yaabweene emanyiso na amaleeba áago Filipo akaba naakola, yaásobelwa.
14 Óokwo Yeruzaléemu, entumwa kábaahuliile nka nikwo abaantu ba Samalia beékiliza echigaambo cha Múungu, baasiindika Peétero na Yohana kuza hali áabo. 15 Kábaahikile, baábasabila abaantu áabo babone kumwaánaankula Omwooyo Mutakatíifu. 16 Kuba, Omwooyo Mutakatíifu akaba atakatuukile noobu hali oómo wáabo. Áabo bakaba baábatiizwe kwoónka ahi izíina lyo Mukáma Yeézu. 17 Peétero na Yohana bakaba nibabateélaho emikono yáabo ahalugulu ya abeekiliza áabo, nabo beenaánkula Omwooyo Mutakatíifu.
18 Simoni, obuchilo yaabweene nka nikwo abaantu beenaankula Omwooyo Mutakatíifu aha kutéebwaho emikono ze entumwa, yaabaha Peétero na Yohana empilya, naabagaambila, 19 “Muúmpe néenye obuzizi óobu, mbone buli muuntu óogwo ndaamutéelaho emikono yaanze, ayanaánkule Omwooyo Mutakatíifu.”
20 Náho Peétero yaámusubiza, “Empilya záawe zisiingaálike hamo néewe habwo kuba nooteekuza obuhicha bwa Múungu nibuboneswa aha mpilya! 21 Íiwe, toyina mubalo nali omugabo gwoóna gwóona omumilimo éezi ya Múungu habwo kuba omuganya gwaawe tí gugololokile omuméeso ga Múungu. 22 Bityo, mazima lekela obufu bwáawe, omusábe Omukáma. Lúundi alaálamula kukuganyila habwe ensoonga mbi omumwooyo gwaawe. 23 Kuba niindeeba íiwe, nka nikwo oyizwíile ichubi ne ebiheno byáawe nibikubóha.” 24 Simoni yaásubya, “Íimwe, muunsabile ha Mukáma, kuba chitaambaho nóobu echigaambo chimo omuli áago ge mulikugaamba!”
25 Obuchilo Peétero na Yohana kabamazile okwaátula kwáabo no kubeégesa abaantu bo óokwo echigaambo cho Omukáma Yeézu, baábaanza oluzeendo lwáabo kusuba Yeruzaléemu. Baálabila omumitúulo miinzi za Abasamalia nibóolekeelela abaantu Empola Nzima éezo.
Filipo Naagaambila Omukúlu Empola Nzima za Yeézu
26 Maléeka wo Omukáma akamugaambila Filipo, “Yimuka, ozeénde ihaándagazi kwoólekela olubazu lwa Nyakaziinzakazi, elilikulugiilila Yeruzaléemu no kugolomoka kuza omu chaalo cha Gaza.” Ihaándagazi éeli likaba nililabila omuunsi yo obwoóma. 27 Bityo Filipo yaalugáho áaho. Obuchilo akaba ali omwiihaándagazi, yaabugana no omukúlu oómo we éensi ya Ethiopia, óogu akaba akonilwe.c Omukúlu óogwo akaba ali omwiímeelelezi mukúlu we ensabo ya Kaandake, ali omukamakázi wa Ethiopia. Akaba aziile Yeruzaléemu kumulámya Múungu. 28 Óobu akaba naasuba omúka, ayikeele omwiigáali lyoómwe lyo kukweeswa ne efaláasi, alyo omukusoma echitabu cho omubáasi Isaya.
29 Omwooyo Mtakatíifu yaámugaambila Filipo, “Zeénda bwaangu oyilile ahi gáali éelyo, ozeendáne nalyo.” 30 Niho Filipo yaáliilukiilila, yaalihikaho. Yaámuhuliiliza óogwo mukúlu alyoomukusoma omuchitabu cho omubáasi Isaya, yaámubuuza, “Mbweenu, amagaambo áago olikusoma, noogasoomboókelwa?”
31 Nawe yaámusubiza, “Niinhichaánta kusoombookelwa, obuchilo tihaliho omuuntu wo kuúnsoomboolela áago?” Bityo, yaámunyegeza Filipo ahaname igaali, ayikale hamo náze. 32 Amaandiko Matakatíifu áago akaba naasoma omukúlu óogwo, nigo áaga:
“Akatwáalwa nke entaama elikuzeenda kubáagwa,
na nko omwaana gwe entaama okwo gulikweésiza obuchilo nigunogolwa amooya,
bityo nyini talágaambile echigaambo choóna chóona.
33 Bakamugoola no kumwiima amazima goómwe obuchilo bwo omuchwaáziiko.
Noóha óogwo alaahicha kuhooyela empola zo oluzáalo lwoómwe?
Kuba obulami bwoómwe bukeehwaaho omuunsi.”d
34 Óogwo omukúlu akonilwe yaámubuuza Filipo, “Niinsaba ongaambile, amagaambo áago go omubáasi na habwo oóha? Na habwoómwe weényini, nali habwo omuuntu óndi?” 35 Ahonyini Filipo yaabaanza na amagaambo áago nyini ga Amaandiko Amatakatíifu, yaazeendelela kumusoomboolela Empola Nzima za Yeézu.
36 Obuchilo bakaba nibazeénda omumuhaanda, baahika ahaantu ahabeele heena améenzi. Óogwo omukúlu akonilwe yaámugaambila Filipo, “Leeba, áaha heena améenzi! Heena chiintu chi cho kunyaángila ndeke kubatizwa?” [ 37 Filipo yaámugaambila, “Koolamwiíkiliza Yeézu Kristu aha muganya gwaawe gwoóna, wakaáhicha kubatizwa.” Nawe yaámusubiza, “Niinyikiliza nka nikwo Yeézu Kristu no Omwaana wa Múungu.”] 38 Ahonyini yaalagila igáali liimeelezwe. Niho bóona bábili baatuuka kuluga omwiigáali, baatáaha omuli áago meenzi, nawe Filipo yaámubatiza. 39 Obuchilo nibalugamo omumeenzi, ahonyini Omwooyo gwo Omukáma gwaámutwáala Filipo. Omukúlu óogwo talamubweene kaandi, yaazeendelela no oluzeendo lwoómwe ali omukunulilwa. 40 Náho Filipo yeesaanga yaáhikile omu chaalo cha Azoto, na yaazeendelela kulabila omuli buli muzihwa gwo óokwo naabaátulila abaantu Empola Nzima mpaka akahika omumumuzihwa gwa Kaizaalia.